20
Abulahamu na Abimeleki
1 Kulawa Mamule, Abulahamu kafunga mwanza kachola mwiisi ya Negebu, keka ukazi wake hagati ya Kadeshi na Shuli. Abaho kakala kidogo ako Gelali.
2 Ako kawalongela wanhu kamba Sala kakala lumbu jake. Avo mndewa Abimeleki wa Gelali kamsola Sala.
3 Lakini ikilo Mndewa Imulungu kamulawila Abimeleki mwiinzozi, kamulongela, “Gweye kofa kwavija mtwanzi yuumsolile kasoligwa.”
4 Lakini Abimeleki kakala yang'hali hanawasa na Sala bule, avo kalonga, “Vino Mndewa, kowakoma wanhu welibule gehile?
5 Abulahamu mwenyego iyo yalongile kamba Sala kakala lumbu jake na Sala vivija kalonga Abulahamu kakala lumbu jake. Niye nhenda avo moyo kwatu! Sitendile dihile bule.”
6 Mwiinzozi ayo, Imulungu kamulongela, “Ona, nojuwa viutendile vivo kukala moyo kwatu, na niye iyo nikutendile sikuutende nzambi, lekaavo nikugomesa sikuuwase nayo mtwanzi ayo.
7 Sambi mbweze mtwanzi ayo kwa mkasano wake. Abulahamu ni mtula ndagu wangu, avo kokupulila sambi ufe. Lakini kamba humbweza bule, nokuzuma, gweye na wanhu zako wose mofa.”
8 Avo, imitondo yake, Abimeleki kawakema wasang'hanaji zake wose na kuwapetela viyalotile, na wao wadumba ng'hani.
9 Abaho Abimeleki kamkema Abulahamu, kamuuza, “Gweye, kunhendela choni? Nikutenda choni mbaka kutenda toneke tubananga niye na wanhu wa undewa wangu? Kuduhu munhu yotenda viunhendele gweye.”
10 Abimeleki kamuuza Abulahamu, “Vino, kilamuso cha kutenda vino choni?”
11 Abulahamu kamwidika, “Niye nigesa kuwa hanhu hano kuduhu munhu yomdumba Imulungu, avo wahang'homile ili wamsole mwehe wangu.
12 Ukweli heyo ni lumbu jangu, tuleleka tata imoja kila imoja na mamake, lekaavo nimsola.
13 Avo Imulungu viyanhendile ndeke ng'anda ya tatangu na kuchola isi ya kutali, nimulongela mwehe wangu, ‘Kulagusa unogelwa wako kumwangu, kokose konda tuchole, walongele wanhu niye na lumbu jako.’ ”
14 Abaho Abimeleki kambwezela Abulahamu imwehe Sala, kamgwaa na ng'hondolo, ng'ombe na watumwa wa kimbigalo na wa kitwanzi.
15 Abimeleki kamulongela Abulahamu, “Lola, isi yose ino yangu, kala kokose kuulonda.”
16 Abaho kamulongela Sala, “Nomgwaa lumbu jako magana kwa magana ga sente ili kulagusa kwa wanhu zako kamba gweye kwabule ubananzi, kila munhu kojuwa kamba hutendile mbuli yoyose ihile.”
17 Abaho Abulahamu kampula Imulungu, nayo kamuhonya Abimeleki na mwehe wake na watumwa zake wa kitwanzi avo wadaha kulela wana kabili,
18 kwavija Mndewa Imulungu kakala yawatendile watwanzi wose mng'anda ya Abimeleki sikuwalele wana mbuli ya Sala.