26
Isaka na Abimeleki
1 Abaho kukala na lufilili lwa nzala mwiisi, siyo ija ilawilile kipindi cha Abulahamu. Avo Isaka kamgendela Abimeleki, mndewa wa Wafilisiti, ako Gelali.
2 Mndewa Imulungu kamulawilila Isaka, kamulongela, “Sikuuchole mwiisi ya Misili, lakini ukakale mwiisi yonda nikulongele.
3 Kala baho, na niye nokuwa hamoja na gweye, nokutendela ganogile. Nokugwaa gweye na ulelo wako isi ino yose. Notenda kija kinongile kwa tatako Abulahamu.
4 Noutenda ulelo wako wengezeke kamba vizili nhondo za kuulanga na nowagwaa isi zose zino. Kubitila ulelo wako, wanhu wa makabila gose omweda,
5 kwavija Abulahamu kamhulika na katenda gaja ganimulongele na katenda gaja ganimulagize na kagoga gaja ganimfundile.”
6 Avo Isaka kakala ako Gelali.
7 Wenekae wa ako viwauzile mbuli ya mwehe wake, kawalongela kakala lumbu jake. Kadumba kuwalongela kamba kakala mwehe wake, kwavija kadumba wahamkomile na kumsola Lebeka, yakalile yanogile ng'hani.
8 Viyakalile ako kwa kipindi, Abimeleki, mndewa wa Wafilisiti kasungulila mdidilisha kamona Isaka komfagatila mwehe wake.
9 Abimeleki kamkema Isaka, kamulongela, “Kumbe iyo mwehe wako! Habali kulonga kakala lumbu jako?” Isaka kamwidika, “Nidumba nahakomigwe maza nongile kakala mwehe wangu.”
10 Abimeleki kalonga, “Kutenda choni kumwetu? Imoja wa wanhu zangu yahadahile kuwasa na mwehe wako na gweye wahatendile toneke tubananga.”
11 Avo Abimeleki kawazuma wanhu wose, kawalongela, “Munhu yoyose yonda yamtendele vihile munhu ino hebu mwehe wake, kokomigwa.”
12 Mwaka awo Isaka kahanda mbeyu mwiisi ija, kaigwisa ndiya kwavija Mndewa Imulungu kakala yamtendele ganogile.
13 Isaka kagendelela goya, kakala na vinhu vingi.
14 Wafilisiti wamonela migongo kwavija kakala na mabumbila bwando ga ng'hondolo na ng'ombe na watumwa.
15 Avo wagasila masima gose tatake gayawalagize wasang'hanaji wake wagahimbe viyakalile mgima.
16 Abaho Abimeleki kamulongela Isaka, “Segela mwiisi yetu, gweye kuna nguvu kubanza siye.”
17 Avo Isaka kasegela, keka ng'hambi yake kubonde da Gelali, na kakala kuko.
18 Isaka kagahimba kabili masima gahimbigwe kipindi Abulahamu tatake yang'hali hanakufa na kusiligwa na Wafilisiti viyafile Abulahamu. Isaka kagagwaa masima gago matwaga gagaja gakemigwe na tatake.
19 Wasang'hanaji wa Isaka viwahimbile kubonde wapata mazi ga nzasa.
20 Wasusilaji wa Gelali wakala ogomba na wasusilaji wa Isaka, walonga, “Mazi gano ga kumwetu.” Avo Isaka kadikema sima dijo, “Eseki,” fambulo jake bwato.
21 Wasang'hanaji wa Isaka wahimba sima diyagwe, sima dijo vivija wadigombela kabili, avo kadikema, “Sitina,” fambulo jake kuihila.
22 Kasegela hanhu aho, kahimba sima diyagwe. Lakini sima dijo hawadigombele bule, avo kadikema, “Lehoboti,” fambulo jake kulekeswa. Kalonga, “Sambi Mndewa Imulungu katulekesa tukale mwiisi, na tomweda ng'hani.”
23 Isaka kasegela, kachola ako Beelisheba.
24 Mndewa Imulungu kamulawilila ikilo, kamulongela, “Niye na Imulungu wa tatako Abulahamu. Sikuudumbe kwavija niye na hamoja na gweye. Nokutendela ganogile na nokugwaa ulelo mkulu mbuli ya kija kinongile kwa msang'hanaji wangu Abulahamu.”
25 Avo Isaka kazenga upango wa kulavila nhosa, kamtambikila Mndewa Imulungu. Abaho keka ng'hambi yake kuko na wasang'hanaji zake wahimba sima diyagwe.
Isaka koitogolela na Abimeleki
26 Abimeleki hamoja na mbwigake Ahuzasi na Fikoli mkulu wake wa iwakalizi, wasegela Gelali, wachola kumulola Isaka.
27 Avo Isaka kawauza, “Habali mwiza kundola, mweye munihile na kuniwinga mwiisi yenu?”
28 Wao wamwidika, “Sambi tojuwa kamba Mndewa Imulungu kahamoja na gweye, avo tolonda gweye na siye tuilagane. Tokulonda ulonge,
29 kamba hututendela vihile, kamba siye vitulekile kukutendela vihile. Tukutendela ganogile na tukuleka usegele kwa tindiwalo. Sambi yokoneka Mndewa Imulungu kakutendela ganogile.”
30 Avo Isaka kawatendela nyimwilinyimwili, nao waja na kung'wa.
31 Imitondo yake, kila munhu kaiduwila kwa miyage. Isaka kawalaga, na hewo wamuleka moyo kwatu.
32 Siku didija wasang'hanaji wa Isaka wamwizila, wamulongela mbuli ya sima diwahimbile, walonga, “Tugavika mazi.”
33 Avo Isaka kadikema sima dijo, “Shiba,” fambulo jake kuiduwila, na mbaka sambi buga dijo dokemigwa Beelisheba.
Esau kosola wehe ako Kanaani
34 Esau viyavikize miyaka malongo mane, kasola wehe wabili Wahiti, Yudisi mndele wa Beeli na Basemati mndele wa Eloni.
35 Watwanzi awo wamtenda Isaka na mwehe wake wakale moyo nyunguwaa.