34
Dina kowasigwa kwa nguvu
1 Avo Dina mndele wake Lea, ija Lea yalelile na Yakobo, kachola kuwatembelela wandele wa isi ayo.
2 Baho, Shekemu mwanage Hamoli, Muhivi mkulu wa isi viyamone kamgoga kamuwasa kwa nguvu na kamgela kinyala.
3 Moyo wake uilumba na Dina mndele wa Yakobo, kamnogela mndele ayo, kalonga nayo mbuli zamulile.
4 Shekemu kamulongela Hamoli, tatake, “Nisolele mndele ino yawe mwehe wangu.”
5 Yakobo viyahulike kamba mndele wake Dina kawasigwa kwa nguvu na Shekemu, kanyamala mbaka viwabwelile wanage kwavija wanage wakala mmigunda na zifugo zose.
6 Hamoli tatake Shekemu, kamcholela Yakobo, kalonga nayo.
7 Kipindi acho wanage Yakobo wabwela mmigunda. Viwahulike mbuli ayo wagevuzika ng'hani kwavija Shekemu kawaliga wanhu wa Izilaeli kwa kumuwasa kwa nguvu mndele wa Yakobo kinhu kigomesigwe.
8 Hamoli kawalongela, “Moyo wa mwanangu Shekemu omulonda mndele wenu. Chonde mulekeni yamsole.
9 Tuisolele mweye na siye, mutugwee wandele zenu na mweye musole wandele zetu.
10 Mweye modaha kukala na siye, na isi ino yokuwa haulongozi wenu, kaleni amo muchuuze vinhu venu, na soleni vinhu mumo.”
11 Abaho Shekemu kamulongela tatake Dina na iwalumbu, “Nhogoleleni, na niye nowagwaa chochose kimulonda.
12 Nongeleni kinhu chochose cha zengele na nhunza, hata zahawa nyingi nolava ili nimsole.”
13 Wanage Yakobo wamwidika Shekemu na tatake Hamoli, kwa uvizi, kwavija kamfitiza Dina, lumbu jao.
14 Wamulongela, “Hatudaha kutenda vivo, lumbu jetu yasoligwe na munhu hengile kumbi. Mbuli kamba ayo yotugela kinyala.
15 Lakini towatogolela kwa mbuli ino imoja, muwe kamba siye, kila mbigalo kumwenu yengile kumbi.
16 Baho towagwaa mndele wetu, na siye tosola wandele zenu, tokala na mweye, na siye tokuwa kinhu kimoja.
17 Lakini mwahalema kwingila kumbi, siye tomsola lumbu jetu na tosegela.”
18 Mbuli ayo iwanogela Hamoli na mwanage Shekemu.
19 Mbwanga ayo yakalile yotegelezigwa ng'hani mng'anda ya tatake, hakawile bule kutenda mbuli ayo, kwavija kakala yamnogele mndele wa Yakobo.
20 Hamoli na imwana Shekemu wachola kuna ulwivi lwa dibuga kuko koiting'hanaga na walonga na wambigalo wayao wa buga dijo.
21 Wawalongela, “Wanhu wano mbwiga zetu, tuwaleke wakale mwiisi yetu na wachuuze kinhu chochose, isi ino ng'hulu kumwetu siye na wao. Todaha kuwasola wandele zao na wao odaha kusola wandele zetu.
22 Lakini wanhu wano watogola kukala kumwetu na kuwa kinhu kimoja kwa mbuli ino, siye tuwengize kumbi wambigalo wose kamba hewo viwengile kumbi.
23 Vino, ng'hondolo zao, na wanyama wao wose honda wawe kumwetu? Avo, tuilumbe nao, nao okala kumwetu.”
24 Avo wambigalo wose wacholile kuna ulwivi wa dibuga wawatogolela Hamoli na mwanage Shekemu, avo kila mbigalo kudibuga kengila kumbi.
25 Siku da kadatu kumwande, kuno wang'hali na usungu wa kwingila kumbi, wana wabili wa Yakobo, Simeoni na Lawi lumbu zake Dina, wasola misime yao, wengila kwa kinyelegezi kudibuga wawakoma wambigalo wose.
26 Wawakoma kwa misime Hamoli na mwanage Shekemu na wamsola Dina mng'anda ya Shekemu wasegela.
27 Wana wayagwe wa Yakobo wawezila wanhu awo wafile wavisola vinhu va buga dijo kwavija wamfitiza lumbu jao.
28 Wasola ng'hondolo na mbuzi na ng'ombe na vihongwe na kila kinhu kikalile kudibuga na mmigunda.
29 Wasola kila kinhu kinogile, wawagoga watwanzi zao na wanao na walawanya na kila kinhu kikalile mzing'anda.
30 Yakobo kawalongela Simeoni na Lawi, “Mweye mungalila zumozumo na sambi Wakanaani na Wapelizi na kila munhu mwiisi ino konihila. Wanhu zangu niye wadodo kamba awo wose wahailumba ili wanivamile onikoma niye na wanhu wose wa mng'anda yangu.”
31 Lakini hewo wamwidika tatao, “Vino, vinoga viwamtendele lumbu jetu kamba mgoni?”