43
Ndugu obwela Misili hamoja na Benjamini
1 Lufilili lwa nzala lubanza ng'hani mwiisi ya Kanaani.
2 Viishile ndiya ija iwagulile kulawa Misili, Yakobo kawalongela wanage, “Gendeni kabili Misili, mkatugulile ndiya kidogo.”
3 Lakini Yuda kamulongela tatake, “Munhu ija katuzuma ng'hani, kalonga, ‘Siwabokela bule kamba hamwizile na ndugu yenu imdodo.’
4 Kamba kotogola tuchole na ndugu yetu imdodo, tochola kukugulila ndiya.
5 Lakini kamba wahalema, hatuchola bule, kwavija munhu ija katulongela, ‘Sikumuchone kihanga changu kamba hamwiza na ndugu yenu.’ ”
6 Izilaeli kalonga, “Habali mungela mdizumozumo kwa kumulongela munhu ayo kamba muna ndugu iyagwe?”
7 Wamwidika, “Munhu ija katuuza goya mbuli ya lukolo lwetu, ‘Tataenu yang'hali mgima, muna ndugu iyagwe?’ Avo siye tumwidika, twahajuwile vilihi kamba yahalongile, ‘Mgaleni ndugu yenu?’ ”
8 Yuda kamulongela Izilaeli tatake, “Nitogolele niye nichole nayo ili tusegele sambi baha, tuchole tukagule ndiya, sikutufe kwa nzala gweye na wanetu.
9 Niye iyo yonda nidaigwe. Gweye nidai niye, kamba simbweza kumwako, nidaigwe niye siku zose.
10 Maza hatukawile bule, twahacholile na kubwela miyanza mibili.”
11 Baho Izilaeli, tatao, kawalongela, “Ona, kwavija vivo ilondigwa, tendeni avo, soleni mmikoba yenu vinhu vinogile ng'hani va isi ino, mumgalile nhunza mkulu ayo. Soleni mavuta ga nyemba kidogo na uki kidogo, ubani, manemane, kungu na lozi.
12 Soleni sente miyanza mibili ya zija zilondigwa kwavija molondigwa mubweze sente zija zikalile mmilomo ya mikoba yenu, sengine zibwezigwa kwa kuisemwa.
13 Msoleni ayo ndugu yenu muchole nayo kwa munhu ayo.
14 Imulungu yeli na Udahi wose yawatende moneligwe bazi na munhu ayo, yamulekese ija ndugu yenu iyagwe na Benjamini wabwele hamoja na mweye. Kumwangu niye kamba yahakuwa kwagiligwa na wanangu iwe vivo.”
15 Baho wasola zija zinhunza na sente miyanza mibili ya zija za ichanduso, wachola Misili hamoja na Benjamini. Viwavikile wachola kwima kuulongozi wa Yusufu.
16 Yusufu viyamonile Benjamini hamoja nao, kamulongela ija yololesa ng'anda yake, “Wagale wanhu wano ukae kumwangu ukachinje mnyama na umtande vinogile, kwavija wanhu wano woja na niye ndiya ya imisi.”
17 Mulolesaji ayo katenda kamba viyalagizwe, kawagala wanhu awo ukae kwa Yusufu.
18 Viwonile ogaligwa mng'anda ya Yusufu wadumba, wailongela, “Tugaligwa kuno mbuli ya zija zisente zibwezigwe mna imikoba yetu vitwizile mwanza wa ichanduso, katenda vino ili yapate kilamuso cha kutuboka vihongwe wetu na kututenda watumwa zake.”
19 Avo wamgendela ija imulolesaji wa ng'anda ya Yusufu walonga na heyo kipindi wahaulwivi,
20 wamulongela, “Chonde go mkulu! Siye tukala twizile mwanza wa ichanduso kugula ndiya,
21 lakini ikilo vituvikile hanhu ha kuwasa wanhu baki, tufungula mikoba yetu na kila munhu kayona sente yake vivija kamba viyalavile, ikala mmulomo wa mkoba. Avo tuzibweza.
22 Vivija tugala sente ziyagwe kugula ndiya. Hatumjuwile munhu yekile zisente mna imikoba yetu.”
23 Mulolesaji ayo kawedika, “Sikumudumbe, Imulungu wenu, Imulungu wa tata zenu, kawagwaa ngama mna imikoba yenu. Niye nizibokela sente zenu.” Abaho kamgala Simeoni kumwao.
24 Mulolesaji ayo viyawagoneke mng'anda ya Yusufu tanhu kawagwaa mazi wasunhe magulu gao na vivija kawagwaa ndiya vihongwe wao.
25 Na wao wazitanda nhunza zao za kumgwaa Yusufu, kwavija wahulika kamba woja hamoja nayo.
26 Yusufu viyabwelile ukae wamgwaa zija zinhunza ziwakalile nazo, wamfugamila mbaka hasi.
27 Yusufu kawalamusa na kawauza, “Vilihi tataenu imvele mgima? Vino yang'hali mgima?”
28 Wamwidika, “Msang'hanaji wako, tataetu, kogendelela goya, na yang'hali mgima.” Abaho wamfugamila mbaka hasi.
29 Yusufu viyenule kihanga chake kamona Benjamini mdodo wake, mwana wa mamake, kalonga, “Ino iyo mdodo wenu yumulongile?” Kalonga, “Imulungu yakonele bazi mwanangu!”
30 Bahaja, Yusufu kasegela hanhu aho, kwavija mahozi gakala golonda kumulawa mbuli ya kumnogela mdodo wake, kengila mdigati jake kasonga kulila.
31 Viyamambukize kusunha kihanga chake, kalawa kunze kuno kaifunga umoyo, kalagiza wagale indiya.
32 Yusufu kekiligwa ndiya yaiyeka na ndugu zake wekiligwa waiyeka na vivija Wamisili wakalile aho wekiligwa waiyeka, kwavija ikala mwiko kwa Wamisili kuja ndiya hamoja na Waebulania.
33 Ndugu zake Yusufu wakala kuulongozi wake kwa kuipanga kusongela imkulu mbaka imdodo na wakala oilola kuno okanganya.
34 Ndiya ikala ilawa kwa Yusufu na igoligwa kumwao, lakini Benjamini kagweleligwa miyanza mitano ng'hani ya kija kiwagweleligwe ndugu zake. Avo waja na kung'wa kuno odeng'helela hamoja na heyo.