46
Yakobo kochola Misili
1 Avo, Izilaeli kasonga mwanza wake, hamoja na vinhu vake vose. Viyavikile Beelisheba kamulavila nhosa Imulungu wa Isaka tatake.
2 Imulungu kalonga na Izilaeli ikilo mwiinzozi kamkema, “Yakobo, Yakobo.” Yakobo kedika, “Nabaha.”
3 Imulungu kamulongela, “Niye ayo Imulungu, Imulungu wa tatako. Sikuudumbe kuchola Misili, wahawa kuko nokutenda uwe na ulelo onda uwe kabila kulu.
4 Niye mwenyego nochola hamoja na gweye ako Misili na nokubweza kuno. Wahafa mkono wa Yusufu uwo onda ukufumbe meso gako.”
5 Avo, Yakobo kasegela Beelisheba. Wanage wamsola tatao, na wanao ving'hele hamoja na wehe zao, wawakweza mna imituka iyagalile Falao impape.
6 Vivija wasola fugo zao na vinhu vao vose viwapatile mwiisi ya Kanaani, wachola Misili. Yakobo kasola lukolo lwake lose,
7 wanage, wazukulu zake wa kitwanzi na wa kimbigalo, wose kawagala mwiisi ya Misili.
8 Gano gago matwaga ga wana wa Izilaeli wacholile ako Misili.
Lubeni mwanage wa chaudele,
9 hamoja na wana wa Lubeni,
wakalile Hanoki na Palu na Hesiloni na Kalimi.
10 Simeoni na wanage, Yemueli na Yamini na Ohadi na Yakini na Sohali na Shauli mwana wa mtwanzi Mkanaani.
11 Lawi na wanage, Gelishoni na Kohati na Melali.
12 Yuda na wanage, Eli na Onani na Shela na Pelesi na Zela. Lakini Eli na Onani wafa mwiisi ya Kanaani. Pelesi na wanage, Hesiloni na Hamuli.
13 Isakali na wanage, Tola na Puva na Yashubu na Shimuloni.
14 Zabuloni na wanage, Seledi na Eloni na Yaleeli.
15 Wano wao wana wa kimbigalo wa Lea iyamulele Yakobo ako Padani Alamu, wahaleka mndele wake Dina. Wanage na iwazukulu wose kwa wose wakala malongo madatu na ndatu.
16 Gadi na wanage, Sifioni na Hagi na Shuni na Esiboni na Eli na Alodi na Aleli.
17 Asheli na wanage, Imina na Ishiva na Ishivi na Belia na Sela na lumbu jao. Belia na wanage, Hebeli na Malikieli.
18 Wanhu longo na sita ni wana na wazukulu wa Yakobo na Zilipa, mtumwa yagweleligwe Lea na tatake Labani.
19 Laheli kamulelela Yakobo wana wabili Yusufu na Benjamini.
20 Ako Misili Asenati mndele wa Potifela yakalile mulava nhosa wa buga da Oni, kamulelela Yusufu wana wabili wakalile Manase na Efulaimu.
21 Benjamini na wanage, Bela na Bekeli na Ashibeli na Gela na Naamani na Ehi na Loshi na Mupimu na Hupimu na Alidi.
22 Wanhu wao longo na nane ni wana na wazukulu wa Yakobo waleligwe na Laheli mwehe wake.
23 Dani na mwanage Hushimu.
24 Nafutali na wanage, Yaseeli na Guni na Yeseli na Shilemu.
25 Wanhu wao saba ni wana na wazukulu wa Yakobo yalelile na Biliha, mtumwa wa Laheli iyagweleligwe na Labani tatake.
26 Wanhu wose waleligwe mulukolo lwake Yakobo, wakala malongo sita na sita, wahaleka kuwapeta wehe wa wanage. Wanhu awo wose wao wacholile mwiisi ya Misili.
27 Ako Misili Yusufu kakala na wana wabili. Avo, wanhu wose wa ulelo wa Yakobo ako Misili wakala malongo saba.
Yakobo na lukolo lwake ako Misili
28 Yakobo kamulongela Yuda yalongole kwa Yusufu yampule waiting'hane ako Gosheni. Viwavikile Gosheni,
29 Yusufu kakwela mtuka wa kubululigwa na falasi, kachola kumbokela Izilaeli, tatake, ako Gosheni. Viyamvikile tatake kamfagatila na kalila kwa kipindi kitali.
30 Izilaeli kamulongela Yusufu, “Hata sambi nahafa siyo mbuli kwavija nichona kihanga chako na njuwa kamba gweye kwa mgima.”
31 Abaho Yusufu kawalongela ndugu zake na wanhu wa mng'anda ya tatake, “Niye nochola kumulongela Falao kamba ndugu zangu na wanhu wa mng'anda ya tatangu wakalile okala mwiisi ya Kanaani wavika.
32 Nomulongela kamba mweye mwa wasusilaji na mwiza na ng'ombe na mbuzi na ng'hondolo na vinhu venu vose.
33 Avo, Falao yahawakema na kuwauza, ‘Sang'hano yenu choni?’
34 Mmwidike, ‘Siye wasang'hanaji zako tosusila fugo toka muubwanga wetu, kamba viyakalile tataetu.’ Baho kowatogolela mukale ako Gosheni, kwavija kwa wanhu wa Misili wanhu osusila hawawalonda.”