49
Yakobo kolonga na wanage
1 Yakobo kawakema wanage kawalongela, “Kweseni behi niwalongele gaja gonda gawalawilile baho kumwande.”
2 “Kaleni hamoja mutegeleze, mweye wana wa Yakobo,
nhegelezeni niye Izilaeli tataenu.”
3 “Gweye Lubeni kwa mwanangu wa chaudele, gweye kwa nguvu zangu,
na tunda da ubwanga wangu,
gweye kuwabanza wayagwe kwa ukulu na nguvu,
4 gweye kuigala na mazi ga sika kulu,
lakini honda uwe mkulu kabili,
kwavija kumuwasa msang'hanaji wangu yeli kamba mwehe wangu,
gweye kulufitiza lusazi lwangu.”
5 “Simeoni na Lawi ni ndugu,
osang'hanila misime yao kwa kubananga.
6 Lakini niye siilumba nao mna ikija kiwolonda kutenda,
niye siilumba nao mumting'hano wao,
kwavija kwa ng'hasiliki yao wawakoma wanhu na kwa utundu wao wakanha migiha ya ng'ombe.
7 Noiduwila ng'hasiliki yao kwavija ibanza ukwiha
na kugevuzika kwao kwabule bazi.
Nowapwililisa mwiisi ya Yakobo,
nowatimulila mwiisi ya Izilaeli.”
8 “Gweye Yuda ndugu zako okugwaa nhogolwa.
Wanhu wakwihile kowabota singo
na ndugu zako okufugamila.
9 Gweye Yuda mwanangu kuigala na simba yapatile kija kiyasakile na kubwela hoyokala.
Kamba simba koigolola na kutambalala hasi,
simba yeli na nguvu nani yonda yamulamuse?
10 Mkongoja wa ukulu honda usegele mmakono ga Yuda,
na mkongoja wa utawala honda usegele muulelo wake
mbaka vonda yeze ija mwenyego
heyo makabila gose gomtegeleza.
11 Kwavija kokuwa na mizabibu mingi
komfunga kihongwe wake mumzabibu
ili yaje majani ga mzabibu.
Kwavija kokuwa na divai nyingi
kofuwila viwalo vake
na makanzu gake kogafuwila mna idivai inogile ng'hani.
12 Meso gake madung'hu mbuli ya kung'wa divai
na meno gake mazelu mbuli ya kung'wa maziwa.”
13 “Zabuloni kokala mwiimwhani,
mwhani yake yokuwa hanhu ha kwika ngalawa ng'hulu.
Isi yake yoibakana na isi ya Sidoni.”
14 “Isakali kaigala na kihongwe yeli na nguvu
yotambalala mna zimbahasha zake.
15 Kaona kamba hanhu ha kubwihila hanoga
na kaona isi inoga,
kainama mgongo wake yapape mzigo,
kawa mtumwa kusang'hana sang'hano ndala.”
16 “Dani kokuwa msemi wa wanhu zake
kokuwa kamba makabila gayagwe ga Izilaeli.
17 Dani kokuwa mgendela hasi mnzila,
mgendela hasi yeli na sumu mumgwazo wa nzila,
yoluma visiginho va falasi,
nayo munhu yamkwelile kogwa.”
18 “Go, Mndewa Imulungu nobeta unihonye.”
19 “Gadi kokumbigwa na wabavi,
lakini heyo kowasondelela kukisogo na kowabunda.”
20 “Isi yookala Asheli yolela ndiya ng'hani
nayo kolava ndiya iyolonda mndewa.”
21 “Nafutali kaigala na mhala yalekesigwe,
yolela wana wanogile.”
22 “Yusufu kaigala na biki dilela matunda,
biki dilela mumgwazo wa nzasa, matambi gake gokwenela mbaka mna uluwa.
23 Wanhu oitowa kwa migoha wammemela ng'hani
wampigisila migoha na wamgaza.
24 Lakini upinde wake ukala goya mmakono gake,
na makono gake gang'hali na nguvu,
kwa udahi wa ija Yodaha wa Yakobo
na Msusilaji na Dibwe da Izilaeli,
25 mbuli ya Imulungu wa tatako, yakutazile,
mbuli ya Imulungu yeli na Udahi wose yakutendile umwede
kwa mbuli zinogile za kuulanga,
na kumweda kulawa hasi mwiibahali,
kumweda kwa kuwa na fugo nyingi na wana heleketwaa.
26 Kumweda kwa tatako kukula ng'hani
kubanza kumweda kwa vigongo va umwaka.
Kumweda ako kuwe kudipala da Yusufu,
kuwe mkihanga cha ayo yatendigwe mkulu kwa ndugu zake.”
27 “Benjamini kaigala na mbwizi mkali,
imitondo koja kiyasakile na ichungulo kogola kija kiyasakile.”
28 Gano gago makabila longo na mabili ga Izilaeli na zino azo mbuli ziyalongile tatao kuwatambikila kamba viilondigwa.
Ifa ya Yakobo
29 Abaho Izilaeli kawalagiza vino wanage, “Niye sambi nofa na kuilumba na wahenga zangu wafile umwaka, nizikeni hamoja na wavele zangu mna imhango ili mumgunda wa Efuloni Muhiti,
30 ako Makipela, mwambu wa kudilawila zuwa wa Mamule, mwiisi ya Kanaani. Abulahamu kagula mhango na mgunda awo kwa Efuloni Muhiti, uwe mhango ya kuzikila.
31 Kuko kuwazikigwe Abulahamu na mwehe wake Sala, vivija kuko kuwazikigwe Isaka na mwehe wake Lebeka na vivija kuko nimzikile mwehe wangu Lea.
32 Mgunda awo na mhango ayo viguligwa kwa Wahiti.”
33 Yakobo viyamambukize kuwalagiza wanage keka magulu gake mulusazi, kakanha loho, kailumba na wahenga zake wafile umwaka.