8
Kuhunguka kwa mazi mengi
1 Lakini Imulungu hamsemwile bule Nuhu na wanyama wose yakalile nao mdisafina. Avo kagala beho mwiisi na mazi gasonga kuhunguka.
2 Baho nzasa za mazi geli mwiisi zihindigwa na nyivi za mazi geli kuulanga zihindigwa. Mvula ileka kutowa,
3 na mazi gagendelela kuhunguka mholemhole kwa siku gana na malongo matano.
4 Mna isiku ya longo na saba muumwezi wa saba, safina dima uchanha kuvigongo va Alalati.
5 Mazi gagendelela kuhunguka mholemhole, na siku ya ichanduso ya mwezi wa longo, nhembeti za vigongo zoneka.
6 Vizibitile siku malongo mane, Nuhu kavugula zonzo diyatendile,
7 kamulava kunze bondwa, kaguluka uko na uko mbaka mazi viganyalile mwiisi.
8 Abaho Nuhu kamulava huwa yalole kamba mazi gahunguka mwiisi.
9 Lakini kwavija mazi gakala gagubike isi yose, huwa ayo hapatile hanhu ha kwima, avo kaguluka kabwela mdisafina. Nuhu kagolosa mkono wake na kambweza huwa ayo mdisafina.
10 Nuhu kabeta siku saba ziyagwe, abaho kamulava kabili huwa iija.
11 Ichungulo huwa kabwela kwa Nuhu, mmulomo wake kakala yalumile lujani lwa mzeituni. Avo Nuhu kajuwa kamba mazi gakala gahunguke mwiisi.
12 Abaho kabeta siku saba ziyagwe na kamulava huwa ayo kabili, mwanza uno huwa ayo habwelile bule.
13 Nuhu viyakalile na miyaka magana sita na moja, siku da ichanduso da mwezi wa ichanduso, mazi gakala ganyalile mwiisi yose. Nuhu kagubula ingubiko ya disafina, kawegesela, kona isi ikala inyalile.
14 Siku ya malongo mabili na saba ya mwezi wa kabili isi yose ikala inyalile.
15 Baho Imulungu kamulongela Nuhu,
16 “Lawa kunze mdisafina, gweye hamoja na mwehe wako na wanago na wehe zao.
17 Lava kunze vinhu vose vili na ugima vikalile hamoja na gweye, ndege na wanyama na kila mng'onyo yotambala ili walele ng'hani mwiisi, ongezeke na kwenela kila hanhu mwiisi.”
18 Avo Nuhu kalawa mdisafina hamoja na wanage na mwehe wake na wehe wa wanage.
19 Wanyama wose na vinhu vose vili na ugima mwiisi na ndege wose na kila mng'onyo yotambala mwiisi vilawa mdisafina kamba viwengile.
Nuhu kolava nhosa
20 Nuhu kamzengela Mndewa upango wa kulavila nhosa. Kasola wanyama wayagwe odigwa na ndege odigwa, kamulavila Mndewa Imulungu nhosa ya kusoma moto.
21 Kunung'hila goya kwa nhosa kumnogeza Mndewa Imulungu, na heyo kailongela mwenyego, “Honda niiduwile isi kabili mbuli gaja gowotenda wanhu, nojuwa kulawa kipindi viwakalile wabwanga magesa gao geha. Sibwelela ng'o! kabili kuvibananga vinhu vose vili na ugima kamba vinhendile.
22 Isi vonda igendelele, hokuwa na msimu wa kuhanda na msimu wa kusenga, msimu wa vuke na msimu wa kihuhwe, msimu wa zuwa kali na msimu wa masika, imisi na ikilo vokuwa baho siku zose.”