1 Ako Gileadi kukala na munhu yadahile kuitowa vinogile yokemigwa Yefisa, mwana wa mtwanzi imoja mgoni, na tatake kakemigwa Gileadi. 2 Mwehe wa Gileadi vivija kamulelela Gileadi wana wa kimbigalo, avo wana awo viwakulile wamuwinga Yefisa na wamulongela, “Gweye hudaha bule kupata uhazi kulawa kwa tataetu, kwavija gweye kwa mwana wa mtwanzi iyagwe.” 3 Avo, Yefisa kawakimbila ndugu zake kachola kukala mwiisi ya Tobu. Ako wanhu wene vimvoko waiting'hana na kuilumba na heyo, wamkweleleza mna imiyanza yake.

4 Ako kumwande, Waamoni wawavamila Waizilaeli. 5 Waamoni viwawavamile iwanhu wa Izilaeli, iwavele wa Gileadi wachola kumsola Yefisa kulawa isi ya Tobu, 6 wamulongela, “Wize utulongoze tuwatowe Waamoni.” 7 Lakini Yefisa kawalongela awo iwavele wa Gileadi, “Mweye munihila na muniwinga kulawa mng'anda ya tatangu. Avo habali monizila sambi mmagazo genu?” 8 Awo iwavele wa Gileadi wamulongela Yefisa, “Gago galeke, sambi siye tukuhindukila gweye ili tuchole wose kuwatowa Waamoni, na gweye kokuwa kilongozi wetu na wenekae wose wa Gileadi.” 9 Yefisa kawalongela awo iwavele wa Gileadi, “Kamba mwahanibweza ukae kuitowa na Waamoni na abaho Mndewa Imulungu yahawagela mmakono gangu, niye nokuwa kilongozi wenu.” 10 Awo iwavele wa Gileadi wamulongela Yefisa, “Mndewa Imulungu ayo msindila wetu, siye totenda kamba viulongile.” 11 Avo Yefisa kawakweleleza iwavele wa Gileadi, na wanhu wamtenda mkulu wa iwakalizi na kilongozi wao. Yefisa kalonga mbuli zake zose ako Misipa kuulongozi wa Mndewa Imulungu.

12 Abaho Yefisa katuma wasenga kwa imndewa wa Amoni kamulongela, “Tuna ugomvi gani niye na gweye mbaka kwiza kuivamila isi yangu?” 13 Ayo imndewa wa Amoni kawedika awo iwasenga wa Yefisa, “Waizilaeli viwasegele Misili, wasola isi yangu kulawa lwanda lwa Alinoni mbaka lwanda lwa Yaboki na lwanda lwa Yolidani. Avo ibwezeni isi ayo kwa tindiwalo.”

14 Yefisa katuma wasenga kabili kwa imndewa wa Amoni, 15 wamulongele, “Yefisa kolonga vino Waizilaeli hawasolile isi ya Wamoabu hebu ya Waamoni, 16 lakini Waizilaeli viwasegele Misili, wabitila kuluwala kuna ibahali ya Shamu na kuvika Kadeshi. 17 Abaho Waizilaeli watuma wasenga kwa mndewa wa Edomu walonga, ‘Chonde tutogolele tubite mwiisi yako,’ lakini mndewa wa Edomu kalema. Avo, wampula mndewa wa Moabu na heyo vivija kalema. Avo Waizilaeli wasigala ako Kadeshi. 18 Abaho wachola wabitila kuzunguluka isi ya Edomu na Moabu mbaka wavika mwambu wa kudilawila zuwa wa Moabu, weka ng'hambi kumgwazo wa lwanda lwa Alinoni. Lakini hawengile bule mwiisi ya Moabu, kwavija ulwanda lwa Alinoni awo ukalile imbaka ya Moabu. 19 Avo Waizilaeli watuma wasenga kwa mndewa Sihoni wa Waamoli ako Heshiboni, wamulongela, ‘Chonde tutogolele tubitile mwiisi yako tuchole mwiisi yetu,’ 20 lakini Sihoni kawalemela Waizilaeli sikuwabite mwiisi yake, avo Sihoni kawating'haniza wanhu zake wose, weka ng'hambi ako Yahasa, waitowa na iwanhu wa Izilaeli. 21 Mndewa Imulungu, Imulungu wa Izilaeli, kamgela Sihoni na iwanhu zake mmakono ga Waizilaeli, na hewo wahumwa. Avo Waizilaeli waisola isi yose ya Waamoli iwakalile okala kuko. 22 Waisola isi yose ya Waamoli kulawa lwanda lwa Alinoni mbaka lwanda lwa Yaboki na kulawa kuluwala mbaka lwanda lwa Yolidani. 23 Avo Mndewa Imulungu, Imulungu wa Izilaeli kawaboka Waamoli isi ayo kuulongozi wa Waizilaeli. Avo gweye kolonda kutuboka isi yetu? 24 Gweye sola gaja gaugweleligwe na imulungu wako Kemoshi. Lakini isi yose Mndewa Imulungu, Imulungu wetu iyabokile na katugwaa siye, ayo yokuwa yetu. 25 Vino kogesa kwa msede kubanza Balaki mwanage Sipoli yakalile mndewa wa Moabu? Heyo hagombile na Waizilaeli hebu kuitowa na hewo ili yaisole isi ayo. 26 Kipindi chose Waizilaeli viwakalile kudibuga da Heshiboni na ivijiji vake, na kudibuga da Aloeli na ivijiji vake, na mna gamabuga gose geli mwiingema ya lwanda lwa Alinoni kwa miyaka magana madatu, habali hugakombole kipindi acho? 27 Avo, niye sikutendele kinhu kihile, gweye kobananga kuitowa na niye. Mndewa Imulungu yeli msemi kolamula lelo hagati ya Waizilaeli na Waamoni.” 28 Lakini imndewa wa Waamoni hazitegeleze mbuli za Yefisa ziyalongile kumwake.

29 Abaho Loho ya Mndewa Imulungu imwingila Yefisa, na heyo kasegela kabitila Gileadi na Manase, na kulawa Misipa mwiisi ya Gileadi na kagendelela na mwanza mbaka kavika kwa Waamoni. 30 Yefisa kaiduwila kwa Mndewa Imulungu kalonga, “Uhawagela Waamoni mmakono gangu, 31 avo, chochose chonda kilawe kunze kulawa mng'anda yangu kunibokela vonda nibwele kuwabiga Waamoni, acho chokuwa chako gweye Mndewa Imulungu. Acho nokilava nhosa ya kusoma moto.”

32 Avo, Yefisa kaloka ulwanda kaitowa na Waamoni, Mndewa Imulungu kawagela Waamoni mmakono gake. 33 Kawabiga vinogile ng'hani, kagasola mabuga malongo mabili kulawa Aloeli mbaka Miniti na mbaka ako Abeli Kelamimu. Avo, Waamoni wahumwa na Waizilaeli.

34 Abaho Yefisa viyakalile kobwela ukae kumwake ako Misipa, mndele wake kalawa kunze kumbokela kuno kotowa kilongelonge na kucheza. Mndele ayo kakala mwana yaiyeka wa Yefisa. Yefisa kakala kaduhu mwana iyagwe, wa kitwanzi hebu wa kimbigalo. 35 Yefisa viyamone, kadega viwalo vake kwa usungu kalonga, “Mndele wangu! Kunibena nguvu. Habali kongalila gehile. Niiduwila kwa Mndewa Imulungu na niye sidaha kugimbula gaja ganongile.”

36 Imwana kamwidika, “Tata kamba kuiduwila kwa Mndewa Imulungu kinhu, avo sang'hana kamba viulongile, kwavija sambi kakutenda uwabwezele gehile awo wakwihile Waamoni.” 37 Abaho kamulongela tatake, “Nokupula kinhu kimoja, unigwee miyezi mibili, nichole na mbwiga zangu kuvigongo, nikaiyalale mbuli ya kufa kwangu ning'hali sinasoligwa.” 38 Tatake kamtogolela yachole kuko kwa miyezi mibili. Na heyo kachola na mbwiga zake, waiyalala mbuli ya kufa kwake yang'hali hanasoligwa. 39 Viishile ayo imiyezi mibili kabwela ukae, abaho tatake kamtendela kamba viyaiduwile. Mndele ayo kakala hanawasa na mbigalo yoyose. Avo kulawa kipindi acho wanhu wa Izilaeli wakala otenda kamba vivo, 40 kila mwaka iwandele wa Izilaeli wacholaga kuiyalala kwa siku nne mbuli ya kufa kwa mndele wa Yefisa wa Gileadi.