13
Kuvumbuka kwa Samsoni
1 Waizilaeli wamtendela gehile kabili Mndewa Imulungu, na heyo kawagela mmakono ga Wafilisiti kwa miyaka malongo mane.
2 Kukala na munhu imoja ako Sola, kolawa kabila da Dani, twaga jake Manoa. Mwehe wake kakala mgumba na kakala kabule wana.
3 Siku dimoja msenga wa Mndewa Imulungu kamulawila mtwanzi ayo, kamulongela, “Gweye kwa mgumba, hudaha kulela wana, lakini kogoga inda na kolela mwana wa kimbigalo.
4 Avo witeganye, uleke kung'wa divai hebu ugimbi na sikuuje kinhu chochose kigomesigwe,
5 kwavija kogoga inda na kolela mwana wa kimbigalo. Mvili za mwana ayo sikuzibeigwe, heyo Mnazili kwavija mwana ayo kalavigwa kwa Mndewa Imulungu yang'hali mmunda. Na heyo kosonga kuwakombola Waizilaeli kulawa mmakono ga Wafilisiti.”
6 Avo, mtwanzi ayo kachola kumulongela mbigalo wake, “Imunhu wa Imulungu kanizila, kihanga chake choneka kamba msenga wa Imulungu. Niye simuuzile bule kolawa kwahi na heyo hanongele bule twaga jake nani.
7 Lakini kanongela kamba nogoga inda na nolela mwana wa kimbigalo. Kanilagiza sikuning'we divai hebu ugimbi hebu kuja kinhu chochose kigomesigwe, heyo Mnazili kwavija mwana ayo kalavigwa kwa Imulungu yang'hali mna iinda mbaka vonda yafe.”
8 Abaho Manoa kampula Mndewa Imulungu, kalonga, “Nokupula Imulungu, chonde umtume kabili imunhu wako yumtumile ili yatufunze gaja golondigwa kumtendela mwana ayo yonda yavumbuke.”
9 Imulungu kamuhulika Manoa, imsenga wa Imulungu kamcholela kabili mtwanzi ayo viyakalile kumgunda. Lakini imbigalo Manoa kakala kahaduhu, hakalile na imwehe bule.
10 Mtwanzi ayo kakimbila himahima, kamulongela imbigalo, “Agweye! Imunhu ija yanizile siku dija kanizila kabili.”
11 Manoa kailongoza na imwehe mbaka kwa imunhu ayo na kamuuza, “Gweye ayo imunhu yalongile na mtwanzi ino?” Imunhu ayo kamwidika, “Ona, iyo niye.”
12 Avo Manoa kalonga, “Ago gaulongile gahalawilila, tumtendele choni ayo imwana? Na mwana ayo kotenda choni?”
13 Msenga wa Mndewa Imulungu kamulongela Manoa, “Mwehe wako yagoge gose ganimulongele.
14 Yaleke kuja kinhu chochose kilawa mumzabibu na yaleke kung'wa divai hebu ugimbi na sikuyaje kinhu chochose kigomesigwe. Yagagoge gose ganimulagize.”
15 Manoa kamulongela ayo imsenga wa Mndewa Imulungu, “Chonde, ukale kidogo mbaka tukutelekele mwana mbuzi.”
16 Ayo imsenga wa Mndewa Imulungu kamulongela Manoa, “Hata kamba monisusumiza kukala kidogo, sija bule ndiya yenu. Lakini kamba wahalonda utende nhosa ya kusoma moto, umulavile Mndewa Imulungu.” Manoa hajuwile bule kamba ayo kakala msenga wa Mndewa Imulungu.
17 Avo, Manoa kamulongela imsenga ayo wa Mndewa Imulungu, “Tulongele twaga jako nani, ili gaja gaulongile gahalawila tukutogole.”
18 Imsenga wa Mndewa Imulungu kamwidika, “Habali kolonda kujuwa twaga jangu, twaga jangu da unzonza.”
19 Avo Manoa kamtanda imwana mbuzi na nhosa ya indiya, kavika uchanha ya dibwe na kamulavila Mndewa Imulungu. Ayo imsenga katenda unzonza kuno Manoa na imwehe olola.
20 Avo, Manoa na imwehe viwakalile olola milambi ya umoto viikwela uchanha kuulanga, wamona imsenga kakala mmilambi ayo kochola kuulanga. Avo Manoa na imwehe wagwa kingubanguba.
21 Msenga ayo hawalawile bule kabili Manoa na imwehe. Manoa kajuwa kamba ayo kakala msenga wa Mndewa Imulungu.
22 Manoa kamulongela imwehe, “Siye tofa, kwavija tumona Imulungu.”
23 Lakini imwehe kamwidika, “Maza Mndewa Imulungu yalondile kutukoma sambi yabokele nhosa yetu ya kusoma moto na nhosa ya indiya, vivija sambi yatulagusile gaja gose na kutugwaa malagizo.”
24 Abaho mwehe wa Manoa kaifungula mwana wa kimbigalo, na kamgwaa twaga Samsoni. Mwana ayo kakula na Mndewa Imulungu kamtenda yamwede.
25 Loho wa Mndewa Imulungu kasonga kumgaza viyakalile ako Mahane Dani isi ikalile hagati ya Sola na Eshitaoli.