19
Mulawi na mtumwa wake wa kitwanzi
1 Kipindi vikukalile kuduhu mndewa mwiisi ya Izilaeli, kukala na mulawi imoja yakalile kamba mgeni mwiisi ya kuvigongo va Efulaimu. Munhu ayo kasola mtumwa wa kitwanzi yolawa Beselehemu mwiisi ya Yuda.
2 Lakini mtwanzi ayo kamgevuzikila mulawi ayo, kamuleka kabwela ukae kwa tatake ako Beselehemu, kakala ako kwa miyezi mine.
3 Siku dimoja mkasano wake kamuwinza, kalonda walonge goya abaho yambweze ukae kumwake. Ayo imbigalo kachola hamoja na msang'hanaji wake na vihongwe wabili. Avo mtwanzi ayo kamgala mng'anda kwa tatake, ayo itata mkwe viyamone kambokela kwa deng'ho.
4 Tata mkwe kamgoma yakale, na heyo kakala kwa siku ndatu, mulawi ayo na msang'hanaji wake wakala aho wang'wa na wawasa.
5 Siku ya ikane, walamuka ulukwili, waitanda kusegela, lakini ayo itata wa ayo imtwanzi kamulongela ayo imukwe, “Tanhu diya kidogo, abaho kochola.”
6 Avo wanhu awo iwabili tata mkwe na imbigalo waja ndiya na kung'wa hamoja. Abaho ayo itata mkwe kamulongela, “Chonde, uwase baha lelo na udeng'helele.”
7 Munhu ayo viyalondile kusegela, tata mkwe wake kamsusumiza yasigale, na heyo kasigala na kilo acho kawasa kabili.
8 Siku ya tano munhu ayo kalamuka ulukwili, kalonda kusegela. Lakini tata wa ayo imtwanzi kamulongela, “Tanhu uje, abaho ubete mbaka imisi kochola.” Avo wose wabili waja indiya hamoja.
9 Mulawi ayo na mtwanzi wake viwenuke wasegele na imsang'hanaji wao, tata mkwe kamulongela ayo Imulawi, “Imisi imala na zuwa dohonga, uwase baha na udeng'helele. Mayo imitondo kolamuka na kobwela ukae kumwako.”
10 Lakini munhu ayo kalema kuwasa kuko kilo acho. Avo kenuka kasegela kavika behi na buga da Yebusi, sambi dokemigwa Yelusalemu. Kakala hamoja na awo ivihongwe wake wabili na mtwanzi wake.
11 Viwakalile behi kuvika buga da Yebusi, zuwa dikala dohonga, ayo imsang'hanaji kamulongela imkulu wake, “Beta twingile kudibuga dino da Wayebusi tuwase mumo ikilo kino.”
12 Imkulu wake kamwidika, “Hatwingila bule kudibuga da wanhu baki, awo haweli Waizilaeli. Tuchole mbaka Gibea.
13 Tuchole tukawase ako Gibea hebu ako Lama.”
14 Avo, wagendelela na mwanza mbaka zuwa diwahongela viwakalile behi kuvika Gibea dibuga da iwanhu wa kabila da Benjamini,
15 wengila kudibuga wawase mumo kilo acho. Viwengile kudibuga wachola kukala kulubuga lwa dibuga, lakini haduhu munhu yawalongele wakawase ukae kumwake.
16 Viwakalile aho mvele imoja kavika kalawa kumgunda. Mvele ayo kakala mwenekae wa isi ya kuvigongo va Efulaimu kakala ako Gibea kamba mgeni. Wenekae wa buga da Gibea wakala wanhu wa kabila da Benjamini.
17 Mvele ayo viyalolile kamona munhu ayo yakalile mmwanza aho kulubuga, kamuuza, “Kolawa kwahi na kochola kwahi?”
18 Munhu ayo kamwidika, “Tulawa Beselehemu mwiisi ya Yuda na tochola ako kuvigongo va Efulaimu kuko kunilawa. Ng'hala Beselehemu ya Yuda na sambi nobwela ukae, haduhu munhu hano yatubokele tukawase ukae kumwake.
19 Lakini siye tunayo misanze na ivinhu va kuja ivihongwe wetu. Vivija tunago magate na divai, avo vokuwa ndiya yangu niye na mtwanzi wangu na msang'hanaji wangu. Hatulonda kinhu chochose.”
20 Mvele ayo kamulongela, “Mwize mkale mng'anda yangu nowagwaa kila kinhu kimulonda, lakini sikumuwase hano kulubuga.”
21 Avo kawagala ukae kumwake na kawagwaa ivihongwe ndiya. Wanhu awo wasunha magulu gao waja ndiya na kung'wa.
22 Viwakalile woja na kudeng'ha, wambigalo wayagwe wehile wa kudibuga dijo weza waizunguluka ing'anda na wagong'onda ulwivi. Wamulongela imvele mwene ng'anda, “Mulave kunze ayo imbigalo yengile mng'anda tumuwase.”
23 Lakini ayo imvele mwene ng'anda kalawa kunze, kawalongela, “Aka iwandugu zangu, chonde, sikumtende kinhu kamba acho kihile. Ayuno mgeni wangu, avo sikumtende avo.
24 Kabaha mwanangu mwali, na vivija kabaha mtwanzi wa mgeni wangu. Nowalavila hewo kunze, muwasole muwatendele kamba vimulonda, lakini munhu ayo mulekeni sikumtende kinhu kamba acho kigela kinyala.”
25 Lakini awo iwambigalo hawamtegeleze. Avo ayo imulawi kamsola mtwanzi ayo kamulava kunze. Hewo wamsola wamtenda vihile kilo kigima mbaka imitondo. Imitondo wamuleka yasegele.
26 Imitondo, ayo imtwanzi keza mbaka haulwivi lwa ing'anda iyakalile mkulu wake, kagwa hasi na kakala aho kulwivi mbaka zuwa vidilawile.
27 Imkulu wa ayo imtwanzi viyalamuke imitondo, kavugula ulwivi lwa ing'anda, kalawa kunze yagendelele na mwanza. Baho kamona ayo imtwanzi wake kawasa hasi haulwivi, akuno makono gake gagogeleza ikizingiti cha umulango.
28 Kamulongela, “Winuke tuchole.” Lakini heyo hedike mbuli. Kamsola, kamkweza kuna ikihongwe wake na kamgala mbaka ukae kumwake.
29 Viyavikile ukae kumwake kasola mwele na kamkanha kanha maunde longo na mabili. Abaho kagagala maunde gago mwiisi yose ya Izilaeli.
30 Iwanhu wose wagonile gago walonga, “Mbuli kamba ino hainakoneka kulawa siku dija Waizilaeli viwasegele mwiisi ya Misili mbaka lelo. Tugelegeze, tuilonge mbuli ino na tulamule.”