1 Wano awo iwandewa wahumigwe na Waizilaeli na wabokigwa isi yao ikalile mwambu wa kudilawila zuwa wa lwanda lwa Yolidani, kulawa kubonde da Alinoni mbaka kulugongo lwa Helimoni na isi yose ya Alaba mwambu wa kudilawila zuwa, 2 Sihoni mndewa wa Waamoli yakalile ako Heshiboni na katawala buga da Aloeli dikalile kumgwazo wa bonde da Alinoni, vivija katawala kulawa kubonde mbaka lwanda lwa Yaboki, ukalile imbaka ya isi ya Waamoni ayo ikala nusu ya isi ya Gileadi. 3 Vivija katawala isi ya Alaba kulawa umwambu wa kudilawila zuwa wa ibahali ya Kineleti, mbaka Beti Yeshimoti kuna ibahali ya Alaba, vivija yojuwigwa kamba bahali ya Mkele na kugendelela kusini mbaka hasi ya ulugongo lwa Pisiga.

4 Iyagwe kakala mndewa Ogu wa ako Bashani, imoja wa awo Walefai wasigale, yakalile ako Ashitaloti na ako Edilei, 5 heyo katawala kulugongo lwa Helimoni na ako Saleka na isi yose ya Bashani mbaka ako kuna zimbaka za Wageshuli na Wamaaka na nusu ya Gileadi na kuna imbaka ya isi ya Sihoni mndewa wa Heshiboni.

6 Musa imsang'hanaji wa Mndewa Imulungu na iwanhu wa Izilaeli wawahuma iwandewa awo, na Musa kawagolela isi ayo iwanhu wa kabila da Lubeni na Gadi na nusu ya kabila da Manase.

7 Wano awo iwandewa wa isi ziyazihumile Yoshua na iwanhu wa Izilaeli, ako kuna umwambu wa kudihongela zuwa wa lwanda lwa Yolidani, kulawa Baali Gadi kubonde da Lebanoni mbaka kulugongo lwa Halaki behi na Seili. Yoshua kawagolela isi ayo makabila ga Izilaeli kamba vigeli. 8 Isi ili kuvigongo na kudibawe na isi ya Alaba na kumtelemuko na kuluwala na isi ya Negebu, isi ikalile ya Wahiti na Waamoli na Wakanaani na Wapelizi na Wahivi na Wayebusi. 9 Waizilaeli wawahuma wandewa wakalile imoja imoja, mndewa wa Yeliko na mndewa wa Ai, buga dili behi na Beseli, 10 na mndewa wa Yelusalemu na mndewa wa Hebuloni, 11 na mndewa wa Yalimuti na mndewa wa Lakishi, 12 na mndewa wa Eguloni na mndewa wa Gezeli, 13 na mndewa wa Debili na mndewa wa Gedeli, 14 na mndewa wa Holima na mndewa wa Aladi, 15 na mndewa wa Libina na mndewa wa Adulamu, 16 na mndewa wa Makeda na mndewa wa Beseli, 17 na mndewa wa Tapua na mndewa wa Hefeli, 18 na mndewa wa Afeka na mndewa wa Lashaloni, 19 na mndewa wa Madoni na mndewa wa Hazoli, 20 na mndewa wa Shimuloni Meloni na mndewa wa Akishafu, 21 na mndewa wa Taanaki na mndewa wa Megido, 22 na mndewa wa Kedeshi na mndewa wa Yokineamu ako Kalimeli, 23 na mndewa wa Doli ako Nafoti Doli na mndewa wa Goiimu ako Giligali, 24 na mndewa wa Tiliza. Wose kwa wose wakala wandewa malongo madatu na imoja.