5
1 Baho iwandewa wose wa Waamoli wakalile okala umwambu wa kudihongela zuwa wa lwanda lwa Yolidani, na iwandewa wose wa Wakanaani wakalile okala behi ya bahali, viwahulike Mndewa Imulungu kaganyaza mazi ga lwanda lwa Yolidani mbuli ya iwanhu wa Izilaeli mbaka wose viwalokile, wadumba na kuduhu nguvu isigale kumwao mbuli ya iwanhu wa Izilaeli.
Waizilaeli okwingila kumbi ako Giligali
2 Kipindi acho Mndewa Imulungu kamulongela Yoshua, “Utende mizele ya mabwe na uwengize kumbi Waizilaeli wose hawanakwingila kumbi.”
3 Avo Yoshua katenda mizele ya mabwe na kawengiza kumbi iwana wa kimbigalo wa Waizilaeli ako Gibea Haalaloti.
4 Yoshua kawengiza kumbi awo kwavija iwambigalo wose walawile mwiisi ya Misili, wose wakalile odaha kuchola kuing'hondo wafa ako kuluwala mnzila viwalawile Misili.
5 Hamoja iwanhu wose walawile Misili wakala wengile kumbi, ila iwanhu wose waleleke mnzila kuluwala wakala wang'hali hawana kwingila kumbi.
6 Kwavija iwanhu wa Izilaeli watembela kuluwala kwa miyaka malongo mane, mbaka iwambigalo wose wadahile kuchola kuing'hondo wafa, kwavija hawamtegeleze Mndewa Imulungu. Mndewa Imulungu kaiduwila kamba honda wayone isi ayo iyaiduwile kwa iwahenga zao kamba kotugwaa siye, isi imemile maziwa na uki.
7 Avo iwana wa wanhu awo Mndewa Imulungu kawakuza hanhu hao, na ndio awo wengizigwe kumbi na Yoshua. Awo wakala hawengizigwe kumbi mnzila.
8 Avo iwambigalo wose viwengizigwe kumbi, wasigala kuko mna zing'hambi mbaka viwahonile.
9 Abaho Mndewa Imulungu kamulongela Yoshua, “Lelo niwasegesela ikinyala cha Misili.” Avo hanhu aho hakemigwa Giligali mbaka lelo.
10 Waizilaeli viwekile ng'hambi ako Giligali, waideng'helela Pasaka mna isiku ya longo na nne ya mwezi awo ichungulo, ako kudibawe da Yeliko.
11 Imitondo yake, waja ndiya ya isi ayo, gamagate hagageligwe hamila na ngano ikanzingigwe.
12 Avo kulawa siku dijo diwasongile kuja ndiya ya isi ayo, mana ileka kulagala. Kukala kuduhu mana mbuli ya iwanhu wa Izilaeli, lakini mwaka awo waja ndiya ya isi ya Kanaani.
Yoshua na imunhu yeli na panga
13 Siku dimoja Yoshua viyakalile behi na Yeliko, baho munhu imoja kema kuulongozi wake kuno kagoga sime dikutwa. Avo Yoshua kamcholela kamuuza, “Vino gweye kwa miyetu hebu kwa iwanhu otwihila?”
14 Na heyo kamwidika, “Aka, niye na imkulu wa iwakalizi wa Mndewa Imulungu, na sambi niza hano.”
Yoshua kaidulika mbaka hasi kamtambikila kamuuza, “Go mkulu wangu, niye msang'hanaji wako, kolonda nitende choni?”
15 Avo imkulu wa iwakalizi wa Mndewa Imulungu kamulongela Yoshua, “Vula vilatu vako kwavija hanhu aho hawimile hong'ala.” Avo Yoshua katenda vivo.