7
Nzambi ya Akani
1 Lakini iwanhu wa Izilaeli hawatamaniligwe bule kwa ivinhu vilavigwe ili vibanangigwe kwavija Akani kasola ivinhu viyagwe vilavigwe ili vibanangigwe. Akani kakala mwanage Kalimi, Kalimi mwanage Zabidi, Zabidi mwanage Zela, kulawa kabila da Yuda. Avo Mndewa Imulungu kawagevuzikila iwanhu wa Izilaeli.
2 Abaho Yoshua kawatuma wanhu kulawa Yeliko wachole buga da Ai, dili behi na Beti Aveni mwambu wa kudilawila zuwa wa Beseli, kawalongela, “Choleni mkaisungulile isi ayo.” Wanhu awo wachola na wadisungulila buga da Ai.
3 Viwabwelile wamulongela Yoshua, “Sikuwachole wanhu wose, ila wachole wanhu kamba elufu mbili hebu ndatu wakadivamile dibuga da Ai. Sikuuwagaze iwanhu wose wachole kuko kwavija iwanhu wa buga dijo wadodo.”
4 Avo wanhu kamba elufu ndatu wachola kudivamila dibuga, lakini wawingigwa na iwanhu wa buga da Ai,
5 iwanhu wa Ai wawawinga iwanhu wa Izilaeli kulawa haulwivi lwa dibuga mbaka kumtelemuko wa Shebalimu na wawakoma wanhu malongo madatu na sita kuko. Waizilaeli wabenigwa zinguvu na wakala debwee.
6 Abaho Yoshua kadega viwalo vake kwa usungu, kagwa kingubanguba kuulongozi wa disanduku da Mndewa Imulungu mbaka ichungulo. Heyo na iwavele wa Izilaeli, waigela mitimbwisi mmapala gao.
7 Yoshua kalonga, “Go Mkulu Mndewa Imulungu! Habali kututenda tuloke lwanda lwa Yolidani ili utugele mmakono ga Waamoli watubanange? Vahanogile twahasigale umwambu wa lwanda lwa Yolidani.
8 Go Mndewa, nonge choni kwavija Waizilaeli wawakimbila iwanhu owehila?
9 Kwavija Wakanaani hamoja na iwenekae wose wa isi ino oihulika mbuli ino na otuzunguluka na kutusegesa mwiisi sikutoneke. Avo kotenda choni kulagusa ukulu wa twaga jako?”
10 Mndewa Imulungu kamulongela Yoshua, “Inuka! Habali kuibwanha hasi?
11 Waizilaeli watenda nzambi, wabena lagano jangu diniwalagize, wavisola vinhu viyagwe vilavigwe ili vibanangigwe, waviba na waviza, wavika hamoja na ivinhu vao.
12 Avo Waizilaeli hawadaha kuwahuma iwanhu owehila. Wawakimbila iwanhu owehila kwavija walavigwa ili wabanangigwe. Honda niwe na mweye kabili mbaka muvinange ivinhu vilavigwe ili vibanangigwe vili hagati yenu.
13 Avo inuka! Uwahunge iwanhu na uwalongele, waihunge wenyego mbuli ya mayo kwavija niye Mndewa Imulungu, Imulungu wa Izilaeli, nolonga vino, ‘Hagati yenu hana vinhu vilavigwe ili vibanangigwe. Hamudaha kuwahuma iwanhu owehila mbaka muvisegese ivinhu vilavigwe ili vibanangigwe vili hagati yenu!
14 Avo mayo imitondo wose mwize kuulongozi wangu, kabila dimoja dimoja. Kabila donda nidisagule dobita kuulongozi wangu, lukolo lumoja lumoja. Lukolo londa nilusagule lobita kuulongozi wangu, ng'anda imoja imoja. Ng'anda yonda niisagule yobita kuulongozi wangu, munhu imoja imoja.
15 Munhu yonda yagogigwe na vinhu vilavigwe ili vibanangigwe kosomigwa moto, heyo hamoja na vinhu vake vose kwavija kadibena lagano da Mndewa Imulungu, na katenda mbuli igela kinyala mna iwanhu wa Izilaeli.’ ”
16 Avo Yoshua kalamuka imitootondo ng'hani, kawagala Waizilaeli wose behi, kabila dimoja dimoja, na kabila da Yuda disaguligwa.
17 Kazigala behi zing'holo za kabila da Yuda, na lukolo lwa Zela lusaguligwa. Kalugala behi ulukolo lwa Zela, ng'anda imoja imoja, na ng'anda ya Zabidi isaguligwa.
18 Yoshua kaigala ng'anda ya Zabidi, munhu imoja imoja na Akani mwanage Kalimi, Kalimi mwanage Zabidi, Zabidi mwanage Zela, kulawa kabila da Yuda kasaguligwa.
19 Abaho Yoshua kamulongela Akani, “Mwanangu mtogole Mndewa Imulungu, Imulungu wa Izilaeli, na umgwelele nhogolwa. Nilongele gaja gautendile na sikuunifise chochose.”
20 Akani kamwidika Yoshua, “Kweli nimtenda nzambi Mndewa Imulungu, Imulungu wa Izilaeli, niye nitenda vino,
21 vinyonile kiwalo kinogile mna ivinhu avo kulawa ako Shinali, na sente magana mabili na kibimhi cha zahabu kili na uzito wa nusu kilo, nivisulukila na nivisola. Nivifisa nivihimbila hasi ya kibanda changu na zisente za hasi ya ivinhu avo.”
22 Avo Yoshua kawatuma wasenga wachole kuna ikibanda na wavona vinhu avo vifisigwa mna ikibanda chake na zisente zikala hasi.
23 Avo wavisola vinhu avo kulawa mkibanda wavigala kwa Yoshua na iwanhu wose wa Izilaeli. Wavika hasi kuulongozi wa Mndewa Imulungu.
24 Avo Yoshua na Waizilaeli wose, wamsola Akani mwanage Zela na zisente na ikiwalo na ikibimhi cha zahabu na wanage wa ikimbigalo na wa ikitwanzi na ng'ombe zake na vihongwe na ng'hondolo na ikibanda chake na vinhu vose viyakalile navo, wavigala kubonde da Akoli.
25 Yoshua kamuuza Akani, “Habali kutugalila magazo? Lelo Mndewa Imulungu kokugalila magazo gweye.” Waizilaeli wose wamtowa mabwe Akani mbaka kafa na wawatowa kwa mabwe wanage mbaka wafa na wavisoma moto vose.
26 Abaho walundiza mibwe mingi uchanha yake na ing'hali kuko mbaka lelo. Abaho Mndewa Imulungu kaleka kugevuzika. Avo, mbaka lelo twaga da hanhu aho dokemigwa bonde da Akoli.