9
Lagano na iwanhu wa Gibeoni
1 Iwandewa wose wakalile umwambu wa lwanda lwa Yolidani, mna iisi ya vigongo na kudibawe na isi yose ili behi na ibahali ing'hulu kulongozela Lebanoni, Wahiti na Waamoli na Wakanaani na Wapelizi na Wahivi na Wayebusi viwahulike mbuli ayo,
2 waiting'hana hamoja na wakala kinhu kimoja waitowe na Yoshua na Waizilaeli.
3 Lakini iwenekae wa ako Gibeoni viwahulike kiyatendile Yoshua mna gamabuga ga Yeliko na Ai,
4 watenda ubala. Watanda ndiya na wawakweza vihongwe wao migunia ya umwaka na isonigwe na imifuko ya ng'hwembe ya divai ya umwaka na isonigwe,
5 na hewo wavala vilatu vitoboke toboke na viwalo vilalile. Ndiya yao ikala inyalile na ikala na kimvuguya.
6 Avo, wamcholela Yoshua kuna ing'hambi ako Giligali, wamulongela heyo hamoja na iwanhu wa Izilaeli, “Siye tulawa isi ya kutali, chonde towapula mutende lagano na siye.”
7 Lakini iwanhu wa Izilaeli wawedika awo Iwahivi, “Vino siye todahaze kutenda lagano na mweye? Sengine mweye mokala behi na siye.”
8 Hewo wamulongela Yoshua, “Siye twa wasang'hanaji zako.” Yoshua kawauza, “Mweye mwa kina nani na molawa kwahi?”
9 Wamwidika, “Siye wasang'hanaji zako, tulawa isi ya kutali na twiza mbuli ya twaga da Mndewa Imulungu, Imulungu wenu, na tuhulika ukulu wake na gose gayatendile mwiisi ya Misili,
10 tugahulika gose gayawatendele iwandewa wabili wa Waamoli wakalile umwambu wa lwanda lwa Yolidani, mndewa Sihoni wa Heshiboni na mndewa Ogu wa Bashani yakalile ako Ashitaloti.
11 Avo iwavele wetu na iwanhu wose wa isi yetu, watulongela tutande ndiya mbuli ya mwanza wa kwiza kuiting'hana na mweye na tuwalongele kamba siye twa wasang'hanaji zenu, chonde towapula mutende lagano na siye.
12 Lola magate getu gakala gang'hali moto vitusegele kulawa ukae, lakini sambi ganyala na gana kimvuguya.
13 Imifuko ino ya ng'hwembe ikala tuimemeze divai na ikala ya sambi, lakini sambi idegeka degeka. Viwalo vetu na vilatu vetu vinangika kwavija mwanza ukala mtali.”
14 Avo Waizilaeli wavibokela vinhu avo, na hawamuuzile bule Mndewa Imulungu.
15 Yoshua kailumba na hewo na katenda nao lagano da kuwatogolela kukala. Vilongozi wa Waizilaeli waiduwila kutenda kija kiwailagane.
16 Vizibitile siku ndatu tangu viwatendile lagano na hewo, Waizilaeli wajuwa kamba wanhu awo wakala okala behi na hewo na wakala hagati yao.
17 Avo Waizilaeli wasegela na siku da kadatu wavika mna gamabuga ga iwanhu awo. Mabuga gago gakala Gibeoni na Kefila na Beeloti na Kiliati Yealimu.
18 Lakini Waizilaeli hawawakomile bule iwanhu awo kwavija vilongozi wao wakala waiduwile kwa twaga da Mndewa Imulungu, Imulungu wa Izilaeli. Avo Waizilaeli wose wawanung'unikila awo vilongozi wao.
19 Lakini vilongozi wa Izilaeli wawalongela wanhu awo, “Tuiduwila kumwao kwa twaga da Mndewa Imulungu, Imulungu wa Izilaeli, avo hatudaha bule kuwakoma.
20 Towaleka wakale wagima, ili sambi tukobozigwe na Imulungu, mbuli ya kuiduwila kututendile.”
21 Awo ivilongozi wawalongela iwanhu, “Walekeni wakale.” Avo wakala okanha ngodi na kudeha mazi kwa Waizilaeli wose, kamba ivilongozi viwawalongele.
22 Yoshua kawakema awo iwenekae wa Gibeoni kawalongela, “Habali mtuvizila kamba molawa isi ya kutali, kumbe mokala hagati yetu?
23 Avo muduwiligwa na siku zose mokuwa watumwa zetu wa kutukanhila ngodi na kutudehela mazi mbuli ya ng'anda ya Imulungu wangu.”
24 Wamwidikila Yoshua, “Kwavija siye wasang'hanaji wako tulongeligwa kamba Mndewa Imulungu, Imulungu wenu, kamulagiza msang'hanaji wake Musa yawagwee mweye isi yose na yawakome iwenekae wose wa isi ili kuulongozi wenu avo tudumba mbuli ya ugima wetu, lekaavo tutenda mbuli ino.
25 Avo sambi siye twa mmakono gako, avo vovose viukona vinoga na haki mgameso gako, ututendele.”
26 Avo, Yoshua kawahonya mmakono ga iwanhu wa Izilaeli, na hawawakomile bule.
27 Lakini kulawa siku dijo Yoshua kawatenda wanhu awo wakanhe ngodi na kudeha mazi mbaka vino lelo mbuli ya Waizilaeli wose na mbuli ya upango wa Mndewa Imulungu, hanhu hohose hayasagule.