11
Wanyama odigwa na hawadigwa
(Kumbukumbu 14:3-21)
1 Mndewa Imulungu kamulongela Musa na Haluni,
2 “Walongele wanhu wa Izilaeli, ‘Mna iwanyama weli mwiisi, wano awo wakudigwa.
3 Modaha kumuja mnyama yoyose yatulike mmibang'ho na ija yoselula gaja gayadile na kogaja kabili.
4 Sikumuje mnyama yoyose yoselula lakini mibang'ho yake haitulike hebu mnyama yeli na mibang'ho itulike lakini haselula bule. Sikumuje ngamiya kwavija koselula lakini mibang'ho yake haitulike bule. Mnyama ayo kumwenu mweye kafita.
5 Ndezi sikumuje, ayo koselula lakini kabule mibang'ho itulike, avo ayo kafita kumwenu.
6 Buga sikumuje, ayo koselula lakini mibang'ho yake haitulike, avo ayo kafita kumwenu.
7 Nguluwe sikumuje, ayo kana mibang'ho itulike lakini haselula bule, avo ayo kafita kumwenu.
8 Wanyama awo wafita kumwenu, avo sikumuje nyama yao hebu kukwasa mitufi yao.
9 “ ‘Viumbe wose okala mbahali na okala muulwanda, modaha kuwaja wano, waja weli na minzaka nzaka na makalabamba.
10 Lakini kiumbe chochose kikala mbahali hebu muulwanda, kamba chabule minzaka nzaka hebu makalabamba sikumuje, avo vose vifita kumwenu.
11 Kwavija viumbe avo vifita kumwenu, sikumuje nyama yao hebu kukwasa mitufi yao.
12 Chochose kikala mgamazi na kuno chabule minzaka nzaka na makalabamba acho kifita kumwenu.
13 “ ‘Ndege wano wafita kumwenu, avo sikumuwaje, mhungu, jola, kimhanga,
14 kidumule na makungule na ndege wose wayagwe waigalile na hewo,
15 na ndege wose waigalile na bondwa.
16 Sikumuje mbuni na kilopo na dudumizi na vimhanga wayagwe,
17 bundi na mumbi na bundi mkulu,
18 bundi mzelu na bundi luwala na kinyang'huwi,
19 lawalawa na aina zose za nyamkuta, lugawa na gombalima.
20 “ ‘Wang'onyo wose oguluka na otambala wao wafita kumwenu, sikumuje.
21 Lakini wang'onyo weli na mabawa na ogenda kwa kuzumha zumha modaha kuwaja.
22 Mna iwang'onyo awo modaha kuwaja wano, kila aina ya nzige, kila aina ya senene, kila aina ya mbalangulu na kila aina ya nyenze.
23 Lakini wang'onyo wose wayagwe oguluka na otambala, awo wafita kumwenu.
24 “ ‘Munhu yoyose yokwasa imitufi ya iwanyama awo kokuwa kafita mbaka ichungulo.
25 Munhu yonda yaipape imitufi ayo kokuwa kafita mbaka ichungulo na yafuwe viwalo vake.
26 Mnyama yoyose mibang'ho yake haitulike hebu haselula, ayo kafita kumwenu, na munhu yoyose yonda yakwase mtufi wake kokuwa kafita.
27 Wanyama wose ogenda kwa mifumbi ya mibang'ho yao hamoja wana magulu mane awo wafita kumwenu, munhu yoyose yonda yakwase imitufi yao kokuwa kafita mbaka ichungulo.
28 Munhu yoyose yonda yapape mitufi yao yafuwe viwalo vake na kokuwa kafita mbaka ichungulo.
29 “ ‘Mna iwang'onyo ogenda kwa magulu, wano wafita kumwenu, lukwili na mbewa na kila aina ya ng'henge,
30 gong'ole na mbulu luwala na guluguja na ng'hakala na lwihu.
31 Wang'onyo awo wose wafita kumwenu, munhu yoyose yonda yakwase mitufi yao kokuwa kafita mbaka ichungulo.
32 Mtufi wa wang'onyo awo wahagwila kinhu chochose kiwe cha mbiki hebu kiwalo hebu ng'hwembe hebu kiloba hebu kiya chochose, kisunhigwe kwa mazi, na chokuwa kifita mbaka ichungulo.
33 Kamba mtufi wa wang'onyo awo ulagalila mnongo, chochose kili mnongo ayo kifita na nongo ayo ituligwe.
34 Ndiya yoyose yahakwasigwa na mazi golawa mnongo ayo yokuwa ifita, na kinhu chochose cha kung'wa kili mnongo ayo, chokuwa kifita.
35 Mtufi wa mng'onyo ayo wahalagalila mkinhu chochose, kinhu acho chokuwa kifita. Kamba kinhu acho tanuli hebu jiko da ulongo avo dituligwe. Viya avo vifita kumwenu.
36 Lakini kisima hebu nzasa vokuwa ving'ala, hamoja kinhu chochose kiyagwe chahakwasa mtufi awo chokuwa kifita.
37 Mtufi wa mng'onyo yoyose wahalagalila mzimbeyu za kuhanda, mbeyu azo hazifita bule.
38 Lakini kamba mbeyu zilowekigwa mgamazi na mtufi wa mng'onyo yoyose wahalagalila mumo, mbeyu azo zifita kumwenu.
39 “ ‘Kamba mng'onyo yoyose yumulongeligwe modaha kumuja kafa mwenyego, munhu yonda yakwase mtufi wake kokuwa kafita mbaka ichungulo.
40 Munhu yoyose yoja ng'hone yafuwe viwalo vake, na kokuwa kafita mbaka ichungulo. Munhu yoyose yonda yapape ng'hone yafuwe viwalo vake na kokuwa kafita mbaka ichungulo.
41 “ ‘Mng'onyo yoyose yotambala mwiisi kafita kumwenu, sikumuje.
42 Sikumuje mng'onyo yoyose yogenda kwa inda yake hebu yogenda kwa magulu gake gose mane hebu yeli na magulu mengi, awo wafita kumwenu.
43 Avo sikumuifitize kwa kuja wang'onyo awo na sikumuifitize kwa kukwasa imitufi yao.
44 Niye na Mndewa Imulungu wenu, ilaveni wenyego kumwangu na muwe wanhu wang'alile kwavija niye ning'ala. Avo sikumuifitize kwa mng'onyo yoyose mwiisi.
45 Kwavija niye ayo Mndewa Imulungu niwalavile mweye mwiisi ya Misili ili niwe Imulungu wenu, avo muwe wanhu wang'alile kwavija niye ning'ala.
46 “ ‘Gano gago malagizo ga wanyama na ndege na wang'onyo wose ogenda mgamazi na waja otambala mwiisi.
47 Avo mujuwe kusagula, wang'onyo wafitile na hawafitile na wang'onyo odigwa na hawadigwa.’ ”