5
Nhosa ziyagwe za kusegesa nzambi
1 “ ‘Kamba munhu yahalondigwa kulava usindila mkitala mbuli ya kija kiyaone hebu kuhulika na heyo kolema kulonga chochose, avo kokuwa kabananga na kolondigwa yagae mbuli ya nzambi ayo.
2 “ ‘Kamba munhu yoyose hagati yenu yahaifitiza kwa kukwasa kinhu kihile bila kulonda mwenyego, uwe mtufi wa mnyama wa kumuhulo hebu mnyama wa kufugigwa hebu mng'onyo, munhu ayo kokuwa kabananga.
3 “ ‘Kamba munhu yahakwasa kinhu chochose kifitile cha mulukuli lwa munhu bila kulonda mwenyego, avo vonda yajuwe kokuwa kabananga.
4 “ ‘Kamba munhu yahaiduwila kutenda kinhu chochose kinogile hebu kihile bila kugelegeza, avo vonda yajuwe kokuwa kabananga.
5 “ ‘Munhu yoyose yahabananga mbuli, yatogole na yaitambule nzambi ayo,
6 na yalihe deni da nzambi yake iyatendile, yamgalile Mndewa Imulungu ng'hondolo wa kitwanzi hebu yagale mbuzi kulawa mdibumbila jake kamba nhosa ya kusegesa nzambi, na mulava nhosa yamtendele loholo.
7 “ ‘Lakini kamba yahalemelwa kugala ng'hondolo, yamgalile Mndewa Imulungu huwa wabili hebu makinda mabili ga njiwa, mbuli ya nzambi yake iyaitendile. Imoja kokuwa nhosa ya kusegesa nzambi na iyagwe kokuwa nhosa ya kusoma moto.
8 Munhu ayo yawagale kwa mulava nhosa, na heyo mulava nhosa yasonge kulava inhosa ya kusegesa nzambi kwa kumbota isingo bila kudumula dipala.
9 Yasole damu kidogo yaimizile kumgwazo wa upango wa nhosa, damu isigale yaigide hasi ya dako da uupango wa nhosa. Ino ayo nhosa ya kusegesa nzambi.
10 Abaho ayo imulava nhosa yalave inhosa iyagwe kamba nhosa ya kusoma moto kamba viyalagizwe. Mulava nhosa kolohola nzambi za munhu ayo, na nzambi zake zogeligwa kumgongo.
11 “ ‘Kamba munhu kolemelwa kugala huwa wabili hebu makinda mabili ga njiwa, yagale vibaba vibili va usage unogile kamba nhosa ya kusegesa nzambi zake. Lakini sikuyaugele mavuta hebu ubani kwavija nhosa ayo ya kusegesa nzambi.
12 Yaugale kwa mulava nhosa, na heyo yadehe ganza dimoja da usage awo na yausome muumoto uli muupango wa nhosa, kamba kinhu cha kukumbuka kamba usage awo wose ulavigwa kwa Mndewa Imulungu, hamoja na nhosa ziyomulavila Mndewa Imulungu kwa moto. Ino ayo nhosa ya kusegesa nzambi.
13 Baho mulava nhosa kolohola nzambi za munhu ayo, na nzambi zake zogeligwa kumgongo. Usage usigale okuwa wa mulava nhosa kamba viikalile kwa indiya ilavigwe kamba nhosa.’ ”
Nhosa za kulihila deni
14 Mndewa Imulungu kamulongela Musa,
15 “Kamba munhu katenda nzambi bila kulonda kwa kuleka kugala vinhu ving'alile vigalagwa kwa Mndewa Imulungu, avo yagale ng'hondolo wa kimbigalo yelibule kilema chochose kulawa mdibumbila jake. Avo bei ya ng'hondolo ayo igelegezwe kamba viwapimaga hanhu hong'ala. Ino ayo nhosa ya kulihila deni.
16 Abaho munhu ayo yalihe unanzi wose utendigwe kwa vinhu ving'alile na yengeze asilimia malongo mabili. Yamgwee mulava nhosa, na heyo mulava nhosa yalohole nzambi za munhu ayo kwa ng'hondolo mbigalo wa nhosa ya kusegesa nzambi na nzambi zake zogeligwa kumgongo.
17 “Munhu yoyose yahatenda nzambi bila kulonda kwa kubena lagizo da Mndewa Imulungu, hata kamba hajuwile, munhu ayo kokuwa kabananga na kolondigwa yalihe.
18 Yamgalile mulava nhosa ng'hondolo mbigalo yelibule kilema chochose kulawa mdibumbila jake, ng'hondolo ayo yawe na bei kamba viyolondigwa kuliha. Na heyo imulava nhosa kolohola nzambi za munhu ayo, na nzambi yake yogeligwa kumgongo.
19 Ino ayo nhosa ya kulihila deni kwa nzambi ziyamtendele Mndewa Imulungu.”