7
Nhosa za kulihila gehile
1 “ ‘Gano gago malagizo ga nhosa ya kulihila gehile. Nhosa ayo ing'ala ng'hani.
2 Mnyama wa nhosa ya kulihila gehile yachinjiligwe hanhu howochinjilagwa wanyama wa nhosa za kusoma moto, na idamu imizigwe banzi zose za upango wa nhosa.
3 Mavuta gake gose galavigwe nhosa, mavuta ga umkila na mavuta gogubika uusapi,
4 hamoja na figo mbili na gamavuta gake na hanhu hanogile ha maini.
5 Mulava nhosa yavisome moto muupango wa nhosa kamba nhosa ilavagwa kwa moto kwa Mndewa Imulungu. Ino ayo nhosa ya kulihila gehile.
6 Wambigalo waiyeka wa ulelo wa walava nhosa awo odaha kuja nhosa ayo, nhosa ino ing'ala ng'hani, avo idiligwe hanhu hong'ala.
7 Malagizo ni gagano kwa nhosa ya kusegesa nzambi na nhosa ya kulihila gehile, imulava nhosa yotenda diloholo, ayo yonda yasole inyama.
8 Mulava nhosa yolava nhosa ya kusomigwa moto ya munhu yoyose, ayo yonda yasole ing'hwembe ya mnyama ayo.
9 Nhosa yoyose ya ndiya hebu usage okigwe hebu utelekigwe hebu ukanzingigwe, yasole imulava nhosa yolava inhosa.
10 Nhosa yoyose ya ndiya hebu usage ugeligwe mavuta hebu ulibule mavuta, yokuwa ya Haluni na ulelo wake, wose waigolele sawa.
Nhosa za kugala kuilumba
11 “ ‘Gano gago malagizo ga nhosa za kugala kuilumba kamba munhu kolonda kumulavila Mndewa Imulungu.
12 “ ‘Kamba munhu kogala nhosa ya kugala kuilumba mbuli ya kumgwaa nhogolwa Imulungu, yailave na gate digeligwe mavuta ila sikudigeligwe hamila, na vigate visisili vibakigwe mavuta na magate ga usage ulibule midundulu na ugeligwe mavuta.
13 Hamoja na nhosa ayo, yagale na magate gageligwe hamila.
14 Mna ikila nhosa yamgalile Mndewa Imulungu magate mane, kila aina gate dimoja, magate gago gokuwa ga mulava nhosa yomiza idamu ya inhosa ya kugala kuilumba muupango.
15 Nyama ya nhosa ayo idigwe siku dijo diilavigwa, sikukisigasigwe chochose mbaka imitondo.
16 “ ‘Lakini kamba nhosa ayo ya kugala kuilumba mbuli ya kija kiyaiduwile munhu hebu kalonda mwenyego, idigwe siku dijo diilavigwa na kamba yosigala yodaha kudigwa imitondo yake.
17 Lakini nyama yoyose ya nhosa ayo yahasigala mbaka siku da kadatu isomigwe moto.
18 Kamba nyama ya nhosa ayo yodigwa mbaka siku da kadatu, nhosa ayo honda itogoligwe. Munhu yalavile nhosa ayo honda yapate chochose, kwavija nhosa ayo ifita na munhu yoyose yonda yaije kogaya.
19 Nyama yoyose ikwasigwe na kinhu kifitile sikumuje. Nyama ayo isomeni moto.
“ ‘Wanhu wang'alile odaha kuja nyama,
20 ilavigwe nhosa ya kugala kuilumba. Lakini munhu yoyose yafitile yahaja, yabaguligwe na wanhu zake.
21 Munhu yoyose yokwasa kinhu chochose kifitile, iwe uchafu wa munhu hebu mnyama yagomesigwe kudigwa hebu chochose kimgevuza Mndewa, kamba yahaja nyama ya nhosa ayo ilavigwa kwa Mndewa Imulungu, munhu ayo yabaguligwe na wanhu zake.’ ”
22 Mndewa Imulungu kamulongela Musa,
23 “Walongele vino wanhu wa Izilaeli, ‘Sikumuje mavuta ga ng'ombe hebu ng'hondolo hebu mbuzi.
24 Mavuta ga mnyama yoyose yafile mwenyego hebu ga mnyama yakomigwe na mnyama iyagwe modaha kugeka goya kwa sang'hano iyagwe, lakini sikumugaje.
25 Munhu yoyose yahagaja mavuta ga mnyama yalavigwe kwa Mndewa Imulungu kwa moto, yabaguligwe na wanhu zake.
26 Vivija sikumuje damu yoyose, iwe ya ndege hebu mnyama, kokose konda mukale.
27 Munhu yoyose yahaja damu, yabaguligwe na wanhu zake.’ ”
28 Mndewa Imulungu kamulongela Musa,
29 “Walongele vino wanhu wa Izilaeli, ‘Munhu yoyose yahagala nhosa ya kugala kuilumba, yamgwee Mndewa Imulungu hanhu ha inhosa ayo.
30 Yamgalile kwa makono gake mwenyego kamba nhosa ya kusoma moto. Yamgalile gamavuta hamoja na ikidali chonda yakinule uchanha kamba kilaguso cha kumulavila Mndewa Imulungu.
31 Mulava nhosa yagasome moto mavuta gose muupango wa nhosa, lakini ikidali chokuwa cha Haluni na ulelo wake.
32 Kihili cha mkono wa ukudila wa mnyama wa nhosa zenu za kugala kuilumba mumgwee mulava nhosa.
33 Kihili acho chokuwa cha imulava nhosa wa ulelo wa Haluni yolava idamu na gamavuta ga inhosa ya kugala kuilumba.
34 Niye Mndewa Imulungu niwalagiza wanhu wa Izilaeli wamgwee Haluni na ulelo wake kidali na ikihili cha mnyama ayo wa nhosa ya kugala kuilumba, kwavija wekiligwa hewo siku zose.’ ”
35 Dino dijo fungu diwekiligwe Haluni na ulelo wake mna zinhosa zilavagwa kwa Mndewa Imulungu kwa moto, kulawa siku diwasaguligwe wawe walava nhosa wa Mndewa Imulungu.
36 Viwalavigwe kwa Mndewa kwa kugidiligwa mavuta, Mndewa Imulungu kawalagiza wanhu wa Izilaeli wawagwee fungu dijo da nhosa, siku zose yokuwa vivo.
37 Avo gano gago malagizo ga nhosa ya kusoma moto na nhosa ya ndiya na nhosa ya kusegesa nzambi na nhosa ya kulihila gehile na nhosa ya munhu yahasaguligwa yawe mulava nhosa na nhosa ya kugala kuilumba.
38 Mndewa Imulungu kamgwaa Musa malagizo gano gose kulugongo lwa Sinai siku dija diyawalagize wanhu wa Izilaeli wamgalile sadaka zao, ako kuluwala lwa Sinai.