9
Haluni kolava nhosa
1 Vizishile siku azo saba za kutendigwa walava nhosa Haluni na wanage, avo mwiisiku ya nane Musa kawakema Haluni na wanage na iwavele wa Izilaeli.
2 Musa kamulongela Haluni, “Sola bofu da ng'ombe wa kimbigalo wa nhosa ya kusegesa nzambi, vivija sola mwana ng'hondolo wa kimbigalo kwa nhosa ya kusoma moto, wanyama wose awo sikuwawe na kilema chochose. Abaho walavigwe nhosa kuulongozi wa Mndewa Imulungu.
3 Walongele wanhu wa Izilaeli wagale mbuzi wa kimbigalo yalavigwe nhosa ya kusegesa nzambi, vivija wagale mwana ng'hondolo na bofu da ng'ombe weli na mwaka umoja na sikuwawe na kilema chochose ili walavigwe nhosa ya kusoma moto,
4 na wagale ng'ombe wa kimbigalo na ng'hondolo wa kimbigalo ili walavigwe nhosa ya kugala kuilumba. Wamgalile Mndewa Imulungu nhosa ayo na nhosa ya ndiya ihanganyigwe na mavuta kwavija lelo Mndewa kowalawila.”
5 Wanhu wa Izilaeli wavigala vinhu avo vose hana dihema da mting'hano kamba Musa viyawalagize na wanhu wose wa Izilaeli wachola kwima kuulongozi wa Mndewa Imulungu.
6 Musa kawalongela, “Vino avo viyalagize Mndewa Imulungu mweye mutende, ili ukulu wake oneke kumwenu.”
7 Musa kamulongela Haluni, “Genda hana uupango wa nhosa, ulave nhosa ya kusegesa nzambi na nhosa ya kusoma moto ili kulohola nzambi zako na nzambi za wanhu wose. Lava nhosa ayo ya kulohola nzambi za wanhu kamba Mndewa Imulungu viyalagize.”
8 Avo Haluni kachola muupango wa nhosa na kachinja imwana ng'ombe wa nhosa ya kusegesa nzambi zake mwenyego.
9 Wanage wamgalila idamu, na heyo kazabika kidole chake mwiidamu na kazibaka zimhembe zili muupango wa nhosa, damu isigale kaigida mdidako da upango wa nhosa.
10 Lakini gamavuta na zifigo na hanhu hanogile ha maini vose kavisoma moto muupango wa nhosa kamba Mndewa Imulungu viyamulagize Musa.
11 Nyama na ing'hwembe kavisoma moto kunze ya ing'hambi.
12 Abaho kachinja ing'hondolo wa nhosa ya kusoma moto. Wanage wamgalila idamu, na heyo kaimiza idamu banzi zose za upango wa nhosa.
13 Abaho wamgalila dipala na vihande viyagwe va ing'hondolo ayo na heyo kavisoma moto muupango wa nhosa.
14 Abaho kasunha ivinhu va mgati na imigong'ho na kavisoma moto muupango wa nhosa na ija inhosa ya kusoma moto.
15 Abaho Haluni kailava inhosa iwaigalile iwanhu. Kamchinja imbuzi wa nhosa ya kusegesa nzambi za wanhu, katenda kamba viyatendile kwa ing'ombe wa kusegesa nzambi zake mwenyego.
16 Abaho keka kuulongozi ija inhosa ya kusoma moto, imwana ng'hondolo na imwana ng'ombe na katenda kamba viyalagizwe.
17 Abaho kagala inhosa ya indiya, kadeha ganza dimoja kadisoma muupango wa nhosa hamoja na nhosa ya kusoma moto. Katenda vino kwa kwengeza inhosa ya kusoma moto ilavagwa kila siku imitondo.
18 Abaho Haluni kachinja ing'ombe wa kimbigalo na ing'hondolo wa kimbigalo kamba nhosa ya kugala kuilumba. Wanage wamgalila idamu, na heyo kaimiza banzi zose za upango wa nhosa.
19 Lakini gamavuta ga ing'ombe ayo na ing'hondolo ayo na mavuta geli muusapi na zifigo na hanhu hanogile ha maini na mavuta geli mumkila wa ing'hondolo,
20 wavigela mvidali na Haluni kavisoma moto muupango wa nhosa.
21 Haluni kavinula uchanha ividali na ivihili va ukudila va ing'hondolo na ing'ombe, kamba kilaguso cha kumulavila Mndewa Imulungu, kamba Musa viyalagize.
22 Abaho Haluni viyamambukize kulava nhosa zose, kenula makono gake kawatambikila wanhu, abaho kahumuluka hasi.
23 Abaho Musa na Haluni wachola kuna dihema da mting'hano. Viwalawile kunze wawatambikila wanhu, na ukulu wa Mndewa Imulungu uwalawilila wanhu wose.
24 Moto ulawa muukulu wa Mndewa Imulungu uzisoma nhosa zose na gamavuta geli muupango wa nhosa. Wanhu viwone avo, wakemelela kwa deng'ho waidulika mbaka hasi wamtambikila Mndewa Imulungu.