24
1 Avo, Balaamu kajuwa kamba Mndewa Imulungu kolonda kuwatambikila Waizilaeli, avo hacholile kabili kulagula ila kakala kolola kuluwala.
2 Kawona Waizilaeli weka ng'hambi, kila kabila dikala hanhu hake. Abaho Loho ya Imulungu imwizila,
3 na heyo kalonga usenga uno wa ulaguzi,
“Usenga wangu niye Balaamu mwanage Beoli,
Usenga wa munhu yafumbuligwe gameso.
4 Usenga wa munhu yahulike mbuli za Imulungu.
Munhu yalagusiligwe kinhu na Mndewa Imulungu yeli na Udahi wose.
Munhu yagwile kingubanguba na kugona gose.
5 Vibanda venu vinoga mweye iwanhu wa Yakobo,
Ona, ng'hambi zenu zinoga mweye wanhu wa Izilaeli!
6 Kamba mabonde golava mazi.
Kamba kihati kili behi na lwanda,
Kamba mikuyu ihandigwe na Mndewa Imulungu.
Kamba mikenge ili behi na mazi.
7 Okuwa na mazi mengi,
Mbeyu zao zofonza mazi mengi.
Mndewa wao kokuwa mkulu kubanza Agagi.
Undewa wao okwenela kila hanhu.
8 Imulungu kawalava mwiisi ya Misili.
Heyo kowagombela kwa nguvu zake kamba simba viyowagombela wanage.
Kowakoboza wanhu wa isi owehila.
Koibena mizege yao.
Kowahoma kwa migoha yake.
9 Kowasa kamba simba.
Nani yogeza kumulamusa?
Yatambikiligwe munhu yoyose yowatambikila mweye Waizilaeli.
Yaduwiligwe yoyose yowaduwila mweye.”
10 Balaki kamgevuzikila Balaamu, katowa makono gake kamulongela, “Nikukema uwaduwile iwanhu onihila, lakini miyanza yose midatu kuwatambikila!
11 Avo, sambi baha ulawanye, nilonda kukugwaa nhunza, lakini lola Mndewa Imulungu kakugomesa sikuupate nhunza azo.”
12 Balaamu kamwidika Balaki, “Vino siwalongele iwasenga wautumile kumwangu,
13 hata kamba Balaki yahanigwelela ng'anda yake imemile sente na zahabu, niye sidaha kulema lagizo da Mndewa Imulungu, kwa kutenda kamba vinilonda niye mbuli yoyose inogile hebu ihile. Nilonga chochose chonda yalonge Mndewa Imulungu acho chonda nilonge.
14 Avo nobwela kwa wanhu zangu, lakini ning'hali sinasegela beta nikulongele mbuli zonda watende wanhu awo kwa wanhu wako ako kumwande.”
Balaamu kolagula lwa ikane
15 Avo Balaamu kalonga usenga uno wa ulaguzi,
“Usenga wangu niye Balaamu mwanage Beoli,
usenga wa munhu yafumbuligwe gameso,
16 usenga wa munhu yahulike mbuli za Imulungu.
Munhu yagajuwile gaja ga Imulungu yeli Uchanha Ng'hani.
Munhu yalagusiligwe vinhu na Mndewa Imulungu yeli na Udahi wose.
Munhu yagwile kingubanguba na meso gake gona gose.
17 Nomona ayo yonda yeze, lakini aho kumwande nomulola.
Nomona lakini heli habehi.
Nhondo yolawa muulelo wa Yakobo.
Kolawila mndewa mna iwanhu wa Izilaeli.
Kwa fimbo yake kowazabula vilongozi wa Wamoabu.
Kowakoma wanhu wose wa ulelo wa Seti.
18 Kowahuma iwanhu omwihila kulawa Edomu na Seili,
lakini Waizilaeli ogendelela kuhuma.
19 Munhu imoja kulawa muulelo wa Yakobo kotawala.
Na kowakoma iwanhu onda wasigale kudibuga.”
Balaamu komambukiza kulagula
20 Abaho Balaamu kawalola Waamaleki, kalonga usenga uno wa ulaguzi,
“Waamaleki ni wanhu wa isi ili na nguvu kubanza zose.
Lakini ako kumwande yopotela yose.”
21 Abaho Balaamu kawalola Wakeni, kalonga usenga uno wa ulaguzi,
“Kae zenu mweye Wakeni zihola,
kamba mvulu izengigwe uchanha ya dibwe kulu.
22 Lakini mweye Wakeni mokomigwa
kipindi Ashulu vonda yawagoge.”
23 Vivija Balaamu kalonga usenga uno wa ulaguzi,
“Vino nani yonda yahone, Imulungu vonda yatende mbuli azo?
24 Ngalawa zokwiza kulawa Kitimu,
owavamila Ashulu na Ebeli,
na hewo vivija obanangigwa.”
25 Avo Balaamu kenuka, kasegela kabwela ukae kumwake, vivija Balaki nayo kasegela.