27
1 Sambi uitape mbuli ya mayo,
hutanga choni chonda kilawile lelo.
2 Leka wanhu wayagwe wakutogole,
na siyo gweye mwenyego kuitogola.
3 Dibwe zito na msanga vivija,
lakini kugazigwa na mbozi kubanza ng'hani.
4 Ng'hasiliki yoluma na kugevuzika kobananga,
lakini nani yodaha kuibamila na migongo?
5 Vinoga kwa munhu yokuzuma kunze kunze,
kubanza ija yofisa unogelwa wake.
6 Kukomhokeligwa na mbwiga wako kolagusa unogelwa,
lakini kufagatilwa na munhu yokwihila awo uvizi.
7 Munhu yegute hata uki koulema,
lakini kwa munhu yeli na nzala hata ndiya ili usungu kumwake yamulile.
8 Kamba ndege yokala kutali na mvulu yake,
vivo yeli munhu yokala kutali na ukae kumwake.
9 Mavuta na mnung'ho vounogeza moyo,
na umulile wa mbwiga olawa mmagesa gake ganogile.
10 Sambi uwasemwe mbwiga zako hebu mbwiga wa tatako.
Uhapatwa na gehile sikuukimbilile kwa ndugu yako yeli kutali,
vinoga ukimbilile kwa munhu yeli behi yako.
11 Mwanangu uwe na ubala ili uunogeze moyo wangu,
ili sambi ng'hose kinhu cha kumwidika munhu yonibezeli.
12 Munhu mbala koyona ng'hondo na kuifisa,
lakini zozolo koilagusa kuulongozi yakalumile.
13 Munhu yahaiduwila kumwikila lahani mgeni sola kiwalo chake,
kigoge kiwalo chake mbaka yalihe lahani iyamwikile mgeni.
14 Munhu yomulamusa miyage kwa sauti ng'hulu ulukwili,
yotangigwa kamba makungu.
15 Mtwanzi mgomvi kaigala na mawaga hagamala siku ya mvula.
16 Munhu yolonda kumkimila kaigala na munhu yodikimila beho,
hebu kugagoga mavuta kwa mkono.
17 Zuma dopisha zuma diyagwe,
vivo munhu viyofunzigwa na miyage.
18 Yoditunza biki da mtini koja matunda gake.
Yomsang'hanila mkulu wake kotogoligwa.
19 Kamba kihanga vichoneka mgamazi,
vivo munhu viyoitanga mwenyego mmoyo wake.
20 Kuzimu na Kuubananzi haviguta,
vivo viili kwa meso ga munhu hageguta.
21 Zahabu na shaba vopimigwa muumoto,
na munhu kogezigwa kwa nhogolwa zake.
22 Hata uhamuhonda mbozi mdituli,
uhamuhonda kwa mtoho kamba muhindi,
ubozi wake huusegesa bule.
23 Ilole goya fugo yako,
weke goya ng'ombe wako,
24 kwavija ugoli haukala milele,
na taji hadikala ulelo wose.
25 Mijani yahanyala na mijani iyagwe yozuka,
na mijani ya kuvigongo yolundizwa,
26 ng'hondolo okugwaa mibahila mbuli ya viwalo,
na mbuzi kowachuuza na kogula migunda,
27 kokuwa na maziwa mengi ga mbuzi,
kukutosha gweye na wanhu wa mng'anda mmwako,
na ndiya kwa wasang'hanaji zako wa kitwanzi.