103
ZABULI YA 103
(Zabuli ya Daudi.)
1 Gweye moyo wangu, mtogole Mndewa Imulungu,
vose vili mgati yangu ditogoleni twaga jake ding'ala.
2 Gweye moyo wangu, mtogole Mndewa Imulungu,
sikuuisemwe ganogile gake gose,
3 heyo ayo yogela kumgongo gehile gangu gose,
na konihonya mitamu yangu yose.
4 Kowika ugima wangu kutali na panga,
heyo ayo yonizungulusila bazi na unogelo hawishaga,
5 heyo konishibisha vinhu vinogile,
na niye nopata nguvu za ubwanga kamba jola.
6 Mndewa Imulungu ayo yotenda kamba viilondigwa,
na kotagusa goya kwa awo okoneligwa.
7 Kamulagusila Musa nzila zake,
na iwana wa Izilaeli sang'hano zake.
8 Mndewa Imulungu kamema bazi na ng'hekewa,
hagevuzika himahima,
heyo kamema unogelo hawishaga.
9 Heyo hakomhoka milele,
na hagevuzika milele.
10 Heyo hatukoboze kamba viilondigwa,
na hatulihile kamba gehile getu vigali.
11 Kamba ulanga viwili uchanha ng'hani,
vivo viwili unogelo wake hawishaga kwa iwanhu omdumba.
12 Kamba mwambu wa kudilawila zuwa viwili kutali,
na mwambu wa kudihongela zuwa,
vivo viyagekile gehile getu kutali na siye.
13 Kamba tata viyowonela bazi wanage,
vivo Mndewa Imulungu viyowonela bazi iwanhu omdumba.
14 Kwavija heyo katujuwa vitwili,
na heyo kokumbuka kamba siye twa timbwisi.
15 Lakini munhu siku zake kamba mijani,
kamba luwa da kubonde vijalika,
16 kwavija beho dobita uchanha yake,
najo dolawanya na hanhu hake hahakoneka kabili.
17 Ila unogelo hawishaga wa Mndewa Imulungu okala kulawa milele mbaka milele na ochola kwa awo omdumba,
na haki yake yokala kwa iwana na wazukulu zao.
18 Kwa awo odigoga lagano jake,
na okumbuka kugoga malagizo gake.
19 Mndewa Imulungu kasimika kigoda chake cha ukulu kuulanga,
na undewa wake ovitawala vinhu vose.
20 Mtogoleni Mndewa Imulungu mweye iwasenga zake,
mweye muli magalu mudigoga lagizo jake,
na moitegeleza sauti ya lagizo jake.
21 Mtogoleni Mndewa Imulungu mweye iwakalizi zake wose wa kuulanga,
mweye wasang'hanaji wake musang'hana gomnogeza.
22 Mtogoleni Mndewa Imulungu mweye viumbe wake wose,
mtogoleni kila hanhu hamwili muutawala wake.
Gweye moyo wangu, mtogole Mndewa Imulungu.