109
ZABULI YA 109
(Kwa kilanja, Zabuli ya Daudi.)
1 Gweye Imulungu wa nhogolwa zangu sikuunyamale,
2 kwavija wanhu wehile na wavizi onilonga vihile,
onilonga vihile kwa uvizi.
3 Ona, kwa mbuli za kubezeli wanizunguluka,
wanilonga vihile bila kitala chochose.
4 Oniliha gehile kwa unogelo wangu,
lakini niye nowapulila.
5 Waniliha gehile hanhu ha ganogile,
na wanihila hanhu ha unogelo wangu.
6 Mwike msemi yehile mbuli ya imunhu yonihila,
na imunhu yomtagusa yeme mkono wake wa ukudila.
7 Mkitala yoneke kabananga,
na kupula kwake koneke kamba nzambi.
8 Siku zake za kukala ziwe ndodo,
wimilizi wake usoligwe na munhu iyagwe.
9 Wanage wawe wakiwa,
na mwehe wake yawe mgane.
10 Wanage wawe tanga nzulule na wapule,
wazahile ndiya kutali na vihame va ng'anda zao.
11 Imunhu yomdai yasole vinhu vose viyeli navo,
wageni wasole sang'hano ya makono gake.
12 Sikuyawe na munhu wa kumonela bazi,
hebu munhu wa kuwalela wanage wakiwa.
13 Ulelo wake wose usegele,
twaga jake disemwigwe muulelo wa kabili.
14 Gehile ga iwahenga zake gakumbukwe mgameso ga Mndewa Imulungu,
na nzambi ya mamake sikuifutigwe.
15 Mndewa Imulungu yazikumbuke nzambi zao siku zose,
na hewo wasemwigwe mwiisi siku zose.
16 Kwavija munhu ayo hagesile kuwa na bazi,
ila kawadununza ngaengae na wakiwa,
mbaka imunhu yanyunyuwale mmoyo kadanganika.
17 Heyo kanogelwa kuduwila,
na gago gampate.
Hanogelwe kutambikila wayagwe,
avo kinhu acho kikale kutali na heyo.
18 Kavala makungu kamba kiwalo chake.
Makungu gamwingile mmoyo kamba mazi,
na kamba mavuta mmizege yake.
19 Kumwake iwe kamba kiwalo cha kuigubika,
kamba mkwiji yoifunga siku zose.
20 Mndewa Imulungu yawalihe gago awo wose onitagusa niye,
na awo onibezeli niye.
21 Gweye Mndewa Imulungu,
unitendele ganogile mbuli ya twaga jako,
kwavija unogelo wako hawishaga unoga, avo unikombole.
22 Kwavija niye na mkiwa na ngaengae,
moyo wangu olumila mgati yangu.
23 Nobita kamba sisila disegelaga,
nohembeluswa kamba nzige.
24 Mavindi gangu gadonha kwa kufunga kuja,
na lukuli lwangu lusoka kwa kuswela mavuta.
25 Niwa kinhu cha kubezeli kumwao,
wahanyona ominula milomo yao.
26 Gweye Mndewa Imulungu, Imulungu wangu nitaze,
unikombole kamba unogelo wako hawishaga viwili.
27 Waleke wajuwe kamba uno udahi wako,
gweye Mndewa Imulungu, kutenda mbuli ayo.
28 Waleke waduwile,
ila gweye unitambikile.
Wose onivamila ogwa kinyala,
lakini msang'hanaji wako kodeng'helela.
29 Awo onitagusa ovazwa kinyala,
ovala kinyala chao kamba kanzu.
30 Nomshukulu Mndewa Imulungu kwa mulomo wangu,
ona nomtogola hagati ha umting'hano.
31 Kwavija kokwima mkono wa ukudila wa mkiwa,
yamgombele na iwanhu omtagusa.