116
ZABULI YA 116
1 Nomnogela Mndewa Imulungu kwavija konihulika,
kanihulika vinimpulile yanyonele bazi.
2 Kwavija kahinduka yanitegeleze,
avo nomkema heyo siku zose za ugima wangu.
3 Nzabi za ifa zinizunguluka,
bwembwe da ifa dingubika,
nimema magazo na usungu.
4 Abaho nipula kwa twaga da Mndewa Imulungu,
“Go Mndewa Imulungu, chonde mhonye!”
5 Mndewa Imulungu kana moyo unogile na kana haki,
Imulungu wetu kamema bazi.
6 Mndewa Imulungu kowakaliza wanyunyuwale,
viwanyonele kanikombola.
7 Gweye moyo wangu bwihila kabili,
kwavija Mndewa Imulungu kanitendela ganogile.
8 Kwavija gweye Mndewa Imulungu kumhonya na ifa,
na kuhangusa mahozi gangu,
kunihonya sikuniikwale mmagulu.
9 Notembela kuulongozi wa Mndewa Imulungu,
mwiisi ya iwanhu wagima.
10 Nimtamanila Mndewa Imulungu vinongile,
“Niye nigazika ng'hani.”
11 Vivija nilonga kwa bwembwe jangu,
“Wanhu wose wavizi.”
12 Nimbwezele choni Mndewa Imulungu,
kwa ganogile gose gayanhendele?
13 Nomulavila nhosa ya divai kwa kunikombola,
nopula kwa twaga da Mndewa Imulungu.
14 Nomvikizila Mndewa Imulungu gaja ganilongile,
kuulongozi wa iwanhu wake wose.
15 Ifa ya iwanhu omtamanila Mndewa Imulungu,
siyo mbuli ndodo mgameso gake.
16 Go Mndewa Imulungu, niye na msang'hanaji wako,
niye msang'hanaji wako,
mwana wa mtumwa wako, kunifungula nzabi.
17 Nokulavila nhosa ya kushukulu,
na nopula kwa twaga da Mndewa Imulungu.
18 Nigavikiza gaja gose ganongile kwa Mndewa Imulungu,
kuulongozi wa iwanhu wake wose,
19 waiting'hane muuluwa lwa Mndewa Imulungu,
mgati yako gweye Yelusalemu.
Mndewa Imulungu yatogolwe.