119
ZABULI YA 119
1 Wamweda iwanhu okala bila kitala,
awo ogagoga malagizo ga Mndewa Imulungu.
2 Wamweda iwanhu ozigoga amuli zake,
awo omzahila kwa mizoyo yao yose.
3 Awo hawatenda gehile,
okweleleza nzila za Mndewa Imulungu.
4 Gweye kutugwaa usi,
ili siye tuugoge ng'hani.
5 Nolonda nzila zangu zikale goya,
nigagoge malagizo gako.
6 Abaho niye sigwa kinyala bule,
nahagagelegeza malagizo gako gose.
7 Nokushukulu kwa moyo unogile,
nahaifunza nhaguso za haki yako.
8 Nogagoga malagizo gako,
sikuundeke hata kidogo.
9 Koigendeleza vilihi mbwanga nzila yake ing'ale?
Kwa kutegeleza na kukweleleza mbuli yako.
10 Kwa moyo wangu wose nikuzahila,
sikuundeke nyage kutali na malagizo gako.
11 Mmoyo wangu niika mbuli yako,
ili sikunikutende nzambi.
12 Go Mndewa Imulungu, utogolwe,
unifunze malagizo gako.
13 Kwa mulomo wangu nolonga,
nhaguso zose za mulomo wako.
14 Nodeng'helela kukweleleza amuli zako,
kamba munhu kuwa na mali nyingi.
15 Noifunza malagizo gako,
nogagelegeza goya mafundizo gako.
16 Nogadeng'helela malagizo gako,
siisemwa mbuli yako.
17 Unitendele ganogile niye msang'hanaji wako vivino vinili mgima,
ili niigoge mbuli yako.
18 Ugafumbule meso gangu,
ili niulole unzonza wa malagizo gako.
19 Niye na mgeni hano mwiisi,
sikuunifise malagizo gako.
20 Loho yangu yoluma siku zose,
kwa kusulukila malagizo gako.
21 Gweye kowakomhokela awo oitapaga,
waduwiligwa iwanhu ogaleka malagizo gako.
22 Nisegesele bezi na maligo,
kwavija nizigoga amuli zako.
23 Hata kamba iwakulu okala kiseto mbuli yangu,
niye msang'hanaji wako nogagelegeza malagizo gako.
24 Amuli zako azo deng'ho jangu,
azo zingwaa magesa.
25 Loho yangu igogwa na timbwisi,
unigwelele ugima kamba vuulongile kotenda.
26 Nikusimulila nzila zangu na gweye kunidika,
nifunze malagizo gako.
27 Nifunze avija vilondigwa kugoga nzila zako,
na niye nozigelegeza sang'hano zako ng'hulu.
28 Nidonha kwa usungu,
unibwezele nguvu kamba vuulongile kotenda.
29 Unisegesele nzila za uvizi,
unifunze malagizo gako kwa bazi.
30 Nisagula nzila ya kutamanilwa,
nigagoga malagizo gako.
31 Nizifagatila amuli zako gweye Mndewa Imulungu,
sikuundeke nigwe kinyala.
32 Nokweleleza malagizo gako,
kwavija konigwaa nzewele ng'hani.
33 Go Mndewa Imulungu, unifunze kugagoga malagizo gako,
na niye nogagoga mbaka kuuhelelo.
34 Ngwelele nzewele ili nigagoge malagizo gako,
nigagoge kwa moyo wangu wose.
35 Nilongoze mnzila ya malagizo gako,
kwavija kulawa mumo nodeng'helela.
36 Ubidule moyo wangu ukweleleze amuli zako,
na sikunilonde uzulumati.
37 Uhindule meso gangu sikunilole avija havifaya,
unigwelele ugima mnzila yako.
38 Ugavikize gaja gaulongile kwa msang'hanaji wako,
gaja gouwagwelela waja okudumba.
39 Unisegesele maligo gonidumba,
kwavija malagizo gako ganoga.
40 Nosulukila kugagoga malagizo gako,
unigwelele ugima kwa haki yako.
41 Go Mndewa Imulungu, unogelo wako hawishaga unizile,
unikombole kamba vuulongile,
42 na niye nomwidika ayo yoniliga,
kwavija notamanila mbuli yako.
43 Unitende nilonge ukweli wako siku zose,
kwavija notamanila malagizo gako.
44 Nogagoga malagizo gako siku zose,
ona, nogagoga siku zose na milele.
45 Na niye notembela kwa nyafasi,
kwavija niifunza usi wako.
46 Nozilonga amuli zako kuulongozi wa iwandewa,
na sikona kinyala bule.
47 Na niye nodeng'helela mmalagizo gako,
gago niganogela.
48 Nosulukila malagizo gako,
gago niganogela,
na nogagelegeza mafundizo gako.
49 Kumbuka mbuli yako kwa msang'hanaji wako,
kwavija kunigwaa tamanilo.
50 Deng'ho jangu mmagazo gangu ajo dino,
gaja gaulongile gonigwaa ugima.
51 Iwanhu oitapa onibezeli siku zose,
ila niye sigaleka malagizo gako.
52 Go Mndewa Imulungu, nogakumbuka malagizo gako ga umwaka,
gago gouhoza moyo wangu.
53 Nogevuzika ng'hani mbuli ya iwanhu wehile,
awo wagalekile malagizo gako.
54 Malagizo gako awo lwila wangu,
hohose honda nikale.
55 Go Mndewa Imulungu, ikilo nodikumbuka twaga jako,
na niye nogagoga malagizo gako.
56 Ganogile gano geza kumwangu,
kwavija nigagoga malagizo gako.
57 Mndewa Imulungu ayo fungu jangu,
nolonga kamba noigoga mbuli yako.
58 Nikuzahila gweye kwa moyo wangu wose,
unyonele bazi kamba vuulongile kotenda.
59 Nizigelegeza nzila zangu,
na niye nibwela nikweleleza amuli zako.
60 Nilopola na sikawile,
kugagoga malagizo gako.
61 Hata kamba iwanhu wehile onifunga kwa nzabi,
sigasemwa malagizo gako.
62 Kilo kikulu nolamuka na nokugwaa nhogolwa,
mbuli ya nhaguso zako za haki.
63 Niye na mbwiga wa wose okudumba gweye,
wose okweleleza malagizo gako.
64 Go Mndewa Imulungu, isi yose imema unogelo wako hawishaga,
unifunze malagizo gako.
65 Go Mndewa Imulungu, kunitendela ganogile niye msang'hanaji wako,
kamba vuulongile kotenda.
66 Nifunze nzewele na magesa ganogile,
kwavija notamanila malagizo gako.
67 Ning'hali sinadununzwa niye ng'hala nyagile,
lakini sambi niigoga mbuli yako.
68 Gweye kunoga na kotenda ganogile,
nifunze malagizo gako.
69 Iwanhu oitapa olonga uvizi kumwangu,
lakini niye nogagoga malagizo gako kwa moyo wangu wose.
70 Mizoyo yao haigesa ga wanhu,
lakini niye nodeng'helela malagizo gako.
71 Vinoga kumwangu kamba nigazika,
avo niifunza malagizo gako.
72 Malagizo gako ganoga kumwangu,
kubanza maelufu ga zahabu na shaba.
73 Makono gako ganilumba na ganizenga,
unigwelele nzewele niifunze malagizo gako.
74 Wanhu okudumba gweye wanilole na kudeng'helela,
kwavija nitamanila mbuli yako.
75 Go Mndewa Imulungu, notanga kamba gweye kotagusa kwa haki,
kwa kutamanilwa kwako kunikoboza.
76 Nopula unogelo wako hawishaga unihoze umoyo,
kamba vuulongile kwa msang'hanaji wako.
77 Bazi jako dinizile ili mhate ugima,
kwavija malagizo gako ajo deng'ho jangu.
78 Wanhu oitapa wone kinyala kwavija wanideta kwa uvizi,
lakini niye nogagelegeza malagizo gako.
79 Iwanhu okudumba gweye wanibwelele,
awo ozijuwa amuli zako.
80 Moyo wangu utelele kwa kugoga malagizo gako,
ili sikunigwe kinyala.
81 Loho yangu yosulukila ukombola wako,
notamanila mbuli yako.
82 Meso gangu hagalola goya kwa kugabeta gaja gaulongile,
nilonga, “Gweye konihoza umoyo lini?”
83 Hamoja niwa kamba mfuko wa ng'hwembe unyalile mdiyosi,
lakini sigalekile malagizo gako.
84 Msang'hanaji wako kokala miyaka mingahi?
Lini kowatagusa iwanhu onidununza?
85 Wanhu oitapa wanihimbila simo,
awo iwanhu hawagakweleleza malagizo gako.
86 Malagizo gako gose ga kweli,
unitaze kwavija wanhu onigaza bila kitala chochose.
87 Wakala behi kunibananga mwiisi,
ila sigalekile malagizo gako.
88 Ukalize ugima wangu kwa unogelo wako hawishaga,
ili niye nizigoge amuli za mulomo wako.
89 Go Mndewa Imulungu, mbuli yako yosigala milele,
yosigala milele ako kuulanga.
90 Kutamanilwa kwako kosigala ulelo mbaka ulelo,
kuika isi hanhu hake nayo yosigala baho.
91 Kwa lagizo jako vinhu vose vosigala mbaka lelo,
kwavija vinhu vose vokusang'hanila gweye.
92 Maza malagizo gako hagakuwile deng'ho jangu,
baho nahadanganike kwa magazo.
93 Milele siisemwa malagizo gako,
kwavija kubitila gago kunigwaa ugima.
94 Niye wako gweye, unikombole,
kwavija nigeza kugoga malagizo gako.
95 Wanhu wehile onisepa ili wanikome,
ila niye nozigelegeza amuli zako.
96 Nitanga kamba kila kinhu chohuhwa,
ila malagizo gako hagahuhwa.
97 Malagizo gako nogalonda ng'hani,
nogagelegeza imisi yose.
98 Malagizo gako gokala na niye milele,
gonigwaa ubala kubanza iwanhu onihila.
99 Notanga ng'hani kubanza wose wanifunzile,
kwavija nozigelegeza amuli zako.
100 Niye na mbala kubanza iwavele,
kwavija nogagoga gaja goulonga.
101 Niigomesa mwenyego sikunitende gehile,
ili niigoge mbuli yako.
102 Sigalekile malagizo gako,
kwavija gweye mwenyego kunifunza.
103 Mbuli zako zamulile ng'hani kumwangu,
ona zamulile kubanza uki.
104 Kubitila malagizo gako nopata nzewele,
avo nogehila gaja ga uvizi.
105 Mbuli yako ayo taa ya magulu gangu,
na mulenge mnzila yangu.
106 Niiduwila na nogavikiza gaja ganilongile,
kamba nogagoga malagizo gako ga haki.
107 Go Mndewa Imulungu, nogaya ng'hani,
unigwelele ugima kamba vuulongile.
108 Go Mndewa Imulungu, utogole kupula kwangu kwa kushukulu,
na unifunze malagizo gako.
109 Ugima wangu wamdizumozumo,
lakini sigasemwa malagizo gako.
110 Wanhu wehile wanitegela mitego,
ila sigaleka gaja gaulongile.
111 Amuli zako awo uhazi wangu milele,
ajo deng'ho da moyo wangu.
112 Nisagula kulawa mmoyo wangu,
kugagoga malagizo gako milele.
113 Nowehila iwanhu watapitapi,
ila noganogela malagizo gako.
114 Gweye kwa ngao yangu, kumwako nokimbilila,
nodika tamanilo jangu mmbuli yako.
115 Segeleni kumwangu mweye iwanhu wehile,
ili nigagoge malagizo ga Imulungu wangu.
116 Unigangamize kamba vuulongile na niye nokuwa mgima,
sikuutogole mhate kinyala mditamanilo jangu.
117 Unigoge ng'hale goya,
siku zose nigategeleze malagizo gako.
118 Gweye kowalema wose ogaleka malagizo gako,
avo ogaya bule kuviza.
119 Wanhu wose wehile kuwasegesa kamba mikupi,
avo niye nozinogela amuli zako.
120 Nogwaya kwa kukudumba gweye,
nimema bwembwe kwa nhaguso zako.
121 Nitenda ganogile na ga haki,
sikuundeke mmakono ga iwanhu onihila.
122 Unizamini niye msang'hanaji wako,
sikuuleke iwanhu oitapa wanyonele.
123 Meso gangu gavulala kwa kubeta ukombola wako,
nobeta uvikize gaja gaulongile.
124 Unitendele niye msang'hanaji wako kamba unogelo wako hawishaga viwili,
na unifunze malagizo gako.
125 Niye na msang'hanaji wako, unigwelele nzewele,
ili nizijuwe amuli zako.
126 Go Mndewa Imulungu, sambi acho kipindi cha kutenda kinhu,
kwavija wanhu obena malagizo gako.
127 Niye noganogela malagizo gako kubanza zahabu,
ona kubanza zahabu ing'ala ng'hani.
128 Avo, nogoga malagizo gako gose,
nogehila gaja ga uvizi.
129 Amuli zako za unzonza,
avo nozigoga kwa moyo wose.
130 Kusimulila malagizo gako kogala mulenge,
kowagwaa nzewele iwanhu mizozolo.
131 Nofungula mulomo na nosulukila kamba umbwa mwene ng'hilu,
kwavija nogalonda ng'hani malagizo gako.
132 Unibwelele na unyonele bazi,
kamba vuuwatendela iwanhu odinogela twaga jako.
133 Uzigoge hatua zangu kamba vuulongile,
sikuutogole gehile ganilongoze.
134 Unikombole na uzulumati wa iwanhu,
ili nigagoge malagizo gako.
135 Unimwemwesele kihanga chako niye msang'hanaji wako,
na unifunze malagizo gako.
136 Meso gangu kolava mahozi kamba lwanda,
kwavija wanhu hawagagoga malagizo gako.
137 Go Mndewa Imulungu, gweye kwa mwene haki,
na nhaguso zako za haki.
138 Amuli zako zuulavile za haki,
na zotamaniligwa ng'hani.
139 Unogelo wangu kumwako onitenda nyone usungu,
kwavija wanhu onihila hawazigelegeza mbuli zako.
140 Gaja gaulongile gang'ala,
na niye msang'hanaji wako nogalonda ng'hani.
141 Niye na mdodo na onibezeli,
ila sigasemwa malagizo gako.
142 Haki yako inoga milele,
na malagizo gako ga ukweli.
143 Magazo na giogio vingoga,
lakini malagizo gako dijo deng'ho jangu.
144 Milele amuli zako za haki,
unigwelele nzewele ili ng'hale mgima.
145 Nokulilila kwa moyo wangu wose,
unidike gweye Mndewa Imulungu,
na niye nogagoga malagizo gako.
146 Nokulilila unikombole,
na niye nozigoga amuli zako.
147 Usiku ung'hali haunakucha nolamuka na nokupula unitaze,
notamanila mbuli zako.
148 Nokala meso ikilo chose,
ili nigelegeze mbuli yako.
149 Go Mndewa Imulungu, kwa unogelo wako hawishaga unitegeleze,
ukalize ugima wangu kwa haki yako.
150 Awo wehile onikwesela behi,
ila wakutali na malagizo gako.
151 Lakini gweye Mndewa Imulungu kwa behi na niye,
na malagizo gako gose ga ukweli.
152 Tangu umwaka niifunza amuli zako,
azo ziwikile zisigale milele.
153 Ulole magazo gangu na unikombole,
kwavija sigasemwile malagizo gako.
154 Unigombele na unikombole,
ukalize ugima wangu kamba vuulongile.
155 Wanhu wehile hawakomboligwa ng'o,
kwavija hawageza kugoga malagizo gako.
156 Go Mndewa Imulungu, gweye kumema bazi,
ukalize ugima wangu kamba vuulongile.
157 Iwanhu onidununza na onihila wengi,
lakini niye sizileka amuli zako.
158 Nowalola iwanhu hawatamanilwa na nowehila,
kwavija hawagagoga malagizo gako.
159 Lola go Mndewa Imulungu, vinigalonda malagizo gako,
ukalize ugima wangu kamba unogelo wako hawishaga viwili.
160 Gose kwa gose kwa mbuli yako awo ukweli,
malagizo gako gose ga haki na gosigala milele.
161 Iwakulu wanidununza bila kitala chochose,
lakini niye noidumba mbuli yako kwa moyo wangu wose.
162 Noideng'helela mbuli yako,
kamba munhu yapatile kinhu cha bei ng'hulu.
163 Nowihila ng'hani uvizi,
lakini noganogela malagizo gako.
164 Nokutogola miyanza saba kwa siku dimoja,
kwavija malagizo gako ga haki.
165 Awo oganogela malagizo gako wamema tindiwalo,
haduhu kinhu chonda kiwagwise.
166 Go Mndewa Imulungu, nokubeta unikombole,
niye nogoga malagizo gako.
167 Moyo wangu uzigoga amuli zako,
nozinogela kwa moyo wangu wose.
168 Nigagoga malagizo gako na amuli zako,
gweye kuzijuwa nzila zangu zose.
169 Kililo changu kivike kumwako gweye Mndewa Imulungu!
Unigwelele nzewele kamba vuulongile.
170 Kupula kwangu kuvike kumwako,
unikombole kamba vuulongile.
171 Nolonga nhogolwa zako siku zose,
kwavija konifunza malagizo gako.
172 Lulimi lwangu lokwimba kwa mbuli yako,
kwavija malagizo gako gose ga haki.
173 Siku zose ulonde kunitaza,
kwavija nisagula kugoga mafundizo gako.
174 Go Mndewa Imulungu, nosulukila ng'hani unikombole,
malagizo gako dijo deng'ho jangu.
175 Leka niwe mgima na nikutogole gweye,
na malagizo gako ganitaze.
176 Niwa tanga nzulule kamba ng'hondolo yagile,
wize unizahile niye msang'hanaji wako,
kwavija sigasemwile malagizo gako.