132
ZABULI YA 132
(Lwila lwa kuchola uchanha.)
1 Go Mndewa Imulungu, mkumbuke Daudi,
na magazo gake gose gayasitahimili.
2 Heyo kaiduwila kwa Mndewa Imulungu,
heyo kailagana na heyo mwene udahi wose wa Yakobo.
3 “Singila mwiing'anda yangu,
hebu kuwasa mulusazi wangu,
4 Sigaleka meso gangu gapate utulo,
hebu ng'humbitu zangu kukukila,
5 mbaka mhate hanhu mbuli ya Mndewa Imulungu,
ukazi mbuli ya heyo yeli na udahi wose wa Yakobo!”
6 Tuhulika olonga, “Sanduku da lagano da ako Efulata,
tudivika mmigunda ya Yealimu.”
7 Avo tulonga, “Tucholeni mwiing'anda ya Imulungu,
tukatambike kuulongozi wa kigoda chake cha kwikila magulu.”
8 Go Mndewa Imulungu, inuka uchole hanhu hako ha kukala,
winuke na sanduku jako da lagano dili na udahi wako.
9 Iwalava nhosa zako wavazigwe haki,
wanhu wako otamanilwa wembe kwa deng'ho.
10 Kwa mbuli ya Daudi msang'hanaji wako,
sikuumuleme ayo yuumsagule.
11 Mndewa Imulungu kaiduwila kwa Daudi,
kaiduwila kinhu hakisegesigwa,
“Imoja wa ulelo wako,
nomtenda yawe mndewa hanhu hako.
12 Kamba wanago wahadigoga lagano jangu,
na amuli ziniwafunza,
vivija wanao ohazi undewa wako milele.”
13 Kwavija Mndewa Imulungu kaisagula Sayuni,
kalonda hawe hanhu hake ha kukala.
14 Heyo kalonga, “Hano baho hanhu hangu ha kukala milele,
hano nokala kuno notawala,
kwavija nohalonda.
15 Noditendela ganogile kwa kudigwaa ndiya,
nowagwaa ndiya wakiwa mbaka wegute.
16 Iwalava nhosa zake nowavaza ukombola,
na wanhu zake otamanilwa okwimba kwa deng'ho.
17 Baho nomtenda imoja wa ulelo wa Daudi yawe mndewa mkulu,
nitanda taa mbuli ya ayo inimsagule.
18 Wanhu omwihila nowavaza kinyala,
lakini heyo nomvaza taji ing'ala ng'hani.”