45
ZABULI YA 45
(Kwa kilanja, yatumie modeli ya lwila lwa besa. Lwila lwa ulelo wa Kola, lwila lwa mapenzi.)
1 Moyo wangu umema magesa ganogile.
Nomulongela mndewa mashaili gangu,
lulimi lwangu kamba kalamu ya mwandikaji yanogile.
2 Gweye kunoga kubanza iwanhu wose,
bazi digidigwa kululimi lwako,
avo Imulungu kakutambikila milele.
3 Funga sime jako mdihaza jako, gweye mwene nguvu,
gweye imkulu na utogoligwa.
4 Muukulu wako gendelela kwa kuhuma,
mbuli ya kweli na uhole na haki,
mkono wako wa ukudila ulaguse mbuli ng'hulu.
5 Misale yako ina nhonga,
yohoma mizoyo ya wanhu omwihila mndewa,
wanhu ogwa hasi yako.
6 Go Imulungu, kigoda chako cha ukulu chosigala siku zose na milele,
fimbo ya undewa wako yokuwa fimbo ya haki.
7 Koinogela haki na kogehila gehile,
avo Imulungu, Imulungu wako kakusagula,
kwa kukugwaa deng'ho kubanza wayago wose.
8 Viwalo vako vose vonung'hila manemane na udi na mdalasini,
kulawa mding'anda da kindewa dihambigwe kwa mhembe zinogile, iwanhu okwimbila kwa bango.
9 Wandele wa wandewa wa mumo mna iwatwanzi wako,
mkono wa ukudila kema mndewa wa ikitwanzi yaihambile zahabu ya Ofili.
10 Tegeleza gweye mndele,
gelegeza na utege digwiti.
Uwasemwe wanhu wako,
na iwanhu wa mng'anda ya tatako.
11 Mndewa koulonda unovu wako.
Kwavija heyo ayo mkulu wako,
avo idulike mbaka hasi.
12 Wanhu wa Tilo okugalila nhunza,
wanhu matajili ozahila unogelo wako.
13 Unovu wose wa mndele wa mndewa wa mdigati jake,
kiwalo chake kilukigwa kwa nzabi za zahabu.
14 Kuno kavala viwalo vihambigwe langi nyingi kolongozwa kwa mndewa,
wali wayage omkweleleza na ogaligwa kumwake.
15 Olongozwa kwa deng'ho na daba,
na okwingila mng'anda ya mndewa.
16 Wana wenu osola nyafasi za tata zenu,
mowatenda wana wa kindewa mwiisi yose.
17 Nokutenda ukumbukwe ulelo wose.
Avo wanhu wa isi zose okutogola siku zose na milele.