7
ZABULI YA 7
(Kuiyalala kwa Daudi kwa Mndewa Imulungu mbuli ya Kushi wa kabila da Benjamini.)
1 Go Mndewa Imulungu, Imulungu wangu, kumwako gweye nokimbilila,
nikombole na umhonye na wose onikweleleza niye.
2 Buleavo okwiza kunivamila kamba simba,
na onibalula vihande vihande,
na kuduhu munhu wa kunihonya.
3 Go Mndewa Imulungu, Imulungu wangu,
kamba niye nitenda mbuli ino,
kamba nitenda gehile kwa makono gangu,
4 kamba nimuliha gehile mbwigangu,
hebu nimvamila bila ugomvi imunhu yonihila,
5 avo ayo yonihila na yanikweleleze na kunigoga,
na yawite ugima wangu hasi,
na yawike lukuli lwangu mditimbwisi.
6 Go Mndewa Imulungu, winuke mna ing'hasiliki yako,
winuke mbuli ya kugevuzika kwa iwanhu onihila,
lamuka Imulungu wangu, ulaguse haki yako.
7 Leka umting'hano wa iwanhu waiting'hane mbuli yako,
na uchanha yake ukale utawale.
8 Go Mndewa Imulungu, uwatagusaga iwanhu,
Go Mndewa Imulungu, unitaguse kamba haki yangu viili,
na kamba vizili nzila zigoloke mgati mmwangu.
9 Leka gehile ga iwanhu otenda gehile gavike kuuhelelo,
na gweye uwemize iwanhu otenda ganogile,
gweye ugezaga nzewele na mizoyo,
gweye Imulungu wa haki.
10 Imulungu ayo ngao yangu,
heyo kowakombola iwanhu wene mizoyo inogile.
11 Imulungu ayo imsemi wa haki,
Imulungu yowagevuzikila iwanhu wehile kila siku.
12 Kamba munhu haleka bule nzambi zake,
Imulungu konola panga jake,
heyo koukwega upinde wake na kolenga.
13 Kaitanda silaha igala ifa,
kaisongola imisale yake.
14 Lola, munhu yehile kagoga inda ya gehile
na kana inda ya kilozo na kalela uvizi.
15 Kahimba simo dingila ng'hani,
na heyo kagwila mmo mdisimo diyahimbile.
16 Kilozo chake kimbwelela mdipala jake mwenyego,
na ago gehile gake gombwelela mdindosi jake.
17 Nomgwelela nhogolwa Mndewa Imulungu mbuli ya haki yake,
na noditogola twaga da Mndewa Imulungu, yeli Uchanha Ng'hani.