9
ZABULI YA 9
(Zabuli ya Daudi. Kwa kilanja, yatumie modeli ya lwila lwa, “Ifa ya Mwana wa Kimbigalo.”)
1 Nokushukulu Mndewa Imulungu kwa moyo wangu wose,
nogasimulila gose ga unzonza gautendile.
2 Nodeng'helela na kukwinula gweye,
noditogola twaga jako, gweye uli Uchanha Ng'hani.
3 Iwanhu onihila wabwela kuchugu,
waikwala na kupotela kuulongozi wako.
4 Kwavija kuigombela haki yangu,
kukala mkigoda chako cha undewa,
na kotagusa kamba viilondigwa.
5 Kuwakomhokela iwanhu wa isi ziyagwe,
na kuwabananga iwanhu wehile,
matwaga gao kugasegesa siku zose na milele.
6 Iwanhu otwihila wabanangwa milele,
kugang'ola mabuga gao na wose wasemwigwa.
7 Lakini Mndewa Imulungu kotawala milele,
keka kigoda chake cha undewa ili yataguse,
8 kowatagusa iwanhu wa mwiisi yose kwa haki,
kowatawala iwanhu kamba viilondigwa.
9 Mndewa Imulungu ayo ngome ya awo odununzwa,
heyo ayo ngome mkipindi cha magazo.
10 Wose odijuwa twaga jako okutamanila,
kwavija gweye Mndewa Imulungu huwasemwile bule wose okwizila.
11 Mtogoleni Mndewa Imulungu, yokala Sayuni!
Walongeleni iwanhu wose sang'hano zake!
12 Kwavija ayo yolihaga mbuli ya kwita damu kokumbuka,
haisemwile ikililo cha wakiwa.
13 Go Mndewa Imulungu, unyonele bazi,
lola magazo gangu kulawa kwa awo onihila,
uninule kulawa mmilango ya ifa,
14 ili nizisimulile nhogolwa zako mmilango ya biti Sayuni,
na kuko nideng'helele ukombola wako.
15 Iwanhu wa isi ziyagwe wadumbukila mdisimo diwahimbile,
kuna ulwavu waufisile, onzeka magulu gao.
16 Mndewa Imulungu kaigubula mwenyego kwa haki yake,
iwanhu wehile wagogigwa mna umtego wa sang'hano za makono gao wenyego.
17 Iwanhu otenda gehile obwela kuzimu,
iwanhu wa isi zose omsemwa Imulungu.
18 Lakini ngaengae hawasemwigwa milele,
na tamanilo da wakiwa hadisegela milele.
19 Go Mndewa Imulungu, winuke,
sikuumuleke munhu yehile yahume,
leka iwanhu wa isi zose watagusigwe kuulongozi wako.
20 Go Mndewa Imulungu, wagele bwembwe,
leka iwanhu wa isi zose wajuwe kamba hewo wanhu tu.