96
ZABULI YA 96
1 Mwimbileni Mndewa Imulungu lwila lwa sambi,
Mwimbileni Mndewa Imulungu mweye iwanhu wa isi zose.
2 Mwimbileni Mndewa Imulungu, ditogoleni twaga jake,
longeni ukombola wake kila siku.
3 Ulongeni ukulu wake hagati ha wanhu wa isi zose,
na sang'hano zake za unzonza kwa wanhu wa isi zose.
4 Kwavija Mndewa Imulungu ayo imkulu,
yofaya kutogoligwa kubanza wose,
heyo wa kudumbigwa kubanza imilungu yose.
5 Kwavija imilungu yose ya iwanhu wa isi ziyagwe ayo minyago,
lakini Mndewa Imulungu ayo yalumbile ulanga.
6 Ukulu na kung'ala vimzunguluka,
nguvu na unovu va hanhu hake hong'ala.
7 Mgweleleni nhogolwa Mndewa Imulungu,
mweye ng'holo zose za mwiisi,
mgweleleni Mndewa Imulungu ukulu na nguvu.
8 Mgweleleni Mndewa Imulungu ukulu ufaya kwa twaga jake,
galeni sadaka na mwingile kuuluwa lwake.
9 Mtambikileni Mndewa Imulungu mna ukunoga kwa hanhu hake hong'ala,
gwayeni kuulongozi wake mweye iwanhu wa isi yose.
10 Longeni mwiisi yose, “Mndewa Imulungu kotawala,
ona isi yose igogwa sikuitigisigwe,
kowatagusa iwanhu kamba viilondigwa!”
11 Ulanga udeng'helele na isi ideng'helele,
bahali ibume na vose vili mgati yake.
12 Migunda ideng'helele na vinhu vose vili mgati yake,
abaho mibiki yose ya kumuhulo imbe kwa deng'ho,
13 kuulongozi wa Mndewa Imulungu yokwiza,
ona heyo kokwiza yaitaguse isi.
Koitagusa isi yose kamba viilondigwa,
na iwanhu wose kwa kweli yake.