14
Yonatani kowahuma Wafilisiti
1 Siku dimoja Yonatani mwanage Sauli kamulongela mbwanga yompapila ivinhu va ing'hondo, “Izo tuchole umwambu wa ing'hambi ya Wafilisiti.” Lakini Yonatani kakala hamulongele bule tatake Sauli.
2 Sauli keka ng'hambi mdibiki da mkomamanga ako Migiloni, kunze ya buga da Gibea, hamoja na wanhu magana sita.
3 Mna iwanhu awo kakala Ahiya mwanage Ahitubu ndugu yake Ikabodi mwanage Finehasi, mzukulu wa Eli, mulava nhosa wa Mndewa Imulungu kudibuga da Shilo yakalile yovala kikoti cha ulava nhosa. Wanhu hawajuwile kamba Yonatani kasegela.
4 Nzila iyalondile kubita Yonatani kuvika kuna ing'hambi ya Wafilisiti, ikala na vigongo vibili va mabwe, lugongo lumoja lukemigwa Bosesi, na luyagwe lukemigwa Sene.
5 Lugongo lumoja lukala mwambu wa kasikazini behi na buga da Mikimashi na lugongo luyagwe lukala mwambu wa kusini behi na buga da Geba.
6 Avo Yonatani kamulongela ija imbwanga iyampapile ivinhu vake va ng'hondo, “Izo tuchole mwambu uja kuna ing'hambi ya iwanhu wano hawengile kumbi. Sengine Mndewa Imulungu kotutaza, kwavija Mndewa Imulungu kodaha kugombola kubitila wanhu wengi hebu wanhu kidogo.”
7 Ija imbwanga kamulongela, “Chochose chuulonda kutenda gweye tenda niye na hamoja na gweye, magesa gako gago magesa gangu.”
8 Yonatani kamulongela, “Tuloke na tuwacholele iwanhu awo ili watone.
9 Kamba wahatulongela, ‘Beteni mbaka tuvike aho hamwili,’ tokala baho hatuwacholela.
10 Lakini wahatulongela, ‘Izoni kumwetu,’ avo towacholela kwavija acho chokuwa kilaguso kamba Mndewa Imulungu kawagela mmakono getu.”
11 Avo wailagusa ili Wafilisiti wawone. Wafilisiti viwawone walonga, “Muwona waja Waizilaeli olawa mna imisimo iwakalile waifisile.”
12 Wafilisiti wakalile kuna ing'hambi wamkema Yonatani na ija imbwanga wawalongela, “Izoni kuno kumwetu na siye towalongela mbuli.”
Yonatani kamulongela ija imbwanga, “Niwinze kwavija Mndewa Imulungu kawagela mmakono ga Waizilaeli.”
13 Avo Yonatani kakwela kwa makono, kuno imbwanga komkweleleza. Yonatani kawavamila Wafilisiti na kawabwanha hasi na ija imbwanga yamkweleleze kawakoma.
14 Kuna ing'hondo ayo ya ichanduso Yonatani hamoja na imbwanga ayo wawakoma wanhu malongo mabili hanhu ha nusu heka.
15 Wakalizi wose wa Wafilisiti wengilwa bwembwe, wakalizi wakalile kuing'hambi, wakalizi wakalile kunze na wakalizi wakalile mvilingo na ivibumbila vicholile kuvamila wanhu, na isi yose igudaguda na ikala na bwembwe.
Kuhumwa kwa Wafilisiti
16 Wasepaji wa Sauli wakalile ako Gibea mwiisi ya Benjamini wawona wanhu okimbila chaka chaka.
17 Sauli kawalongela wanhu iwakalile na heyo, “Ipeteni ili tujuwe nani kahaduhu.” Viwaipetile wajuwa kamba Yonatani na mbwanga iyompapilaga ivinhu vake va kuing'hondo wahaduhu.
18 Avo Sauli kamulongela Ahiya imulava nhosa, “Genda kadisole disanduku da lagano da Imulungu.” Kipindi acho sanduku da Imulungu dikala hamoja na Waizilaeli.
19 Sauli yang'hali yolonga na imulava nhosa, nyangi zibanza ng'hani kuna ing'hambi ya Wafilisiti, avo Sauli kamulongela imulava nhosa, “Leka sambi udisole disanduku da lagano da Mndewa Imulungu.”
20 Sauli hamoja na wanhu zake waitanda goya kuitowa ng'hondo na Wafilisiti. Lakini wona Wafilisiti wasonga kuivamila wao kwa wao.
21 Waja Waizilaeli wakalile hamoja na Wafilisiti kuja kuna ing'hambi, wawahinduka na wailumba na Waizilaeli wakalile hamoja na Sauli na Yonatani.
22 Na waja Waizilaeli wakalile waifisile kuvigongo va Efulaimu, viwahulike kamba Wafilisiti okimbila, na hewo vivija wawakweleleza kuing'hondo.
23 Ng'hondo yenela kubanza Beti Aveni, na siku dijo Mndewa Imulungu kawatenda Waizilaeli wahume.
Mbuli zilawile viishile ing'hondo
24 Avo siku dijo Waizilaeli wagazika kwavija Sauli kakala yawafungile iwanhu kwa kuiduwila, “Kuduhu munhu yonda yaje mbaka ichungulo, mbaka niwabwezele iwanhu onihila.” Avo siku ngima haduhu munhu yadile hebu kulanza kinhu chochose.
25 Wanhu wose wengila mmuhulo wavika uki hasi ya ulongo onyeng'hela.
26 Wanhu viwengile mmuhulo na kuwona uki odwendweka, lakini haduhu munhu yoyose yagezile kuulanza, kwavija wadumba nduwilo iyaiduwile Sauli.
27 Lakini Yonatani hahulike kamba tatake kakala yawafungile iwanhu kwa kuiduwila, avo kengiza fimbo iyakalile nayo mmakono gake kaizabika mdilala da uki, abaho kaja na kapata nguvu.
28 Munhu imoja kamulongela, “Tatako kawafunga iwanhu kwa kuiduwila, kalonga, ‘Munhu yonda yaje kinhu chochose lelo koduwiligwa,’ lekaavo kowona iwanhu wose wadonha mbuli ya nzala.”
29 Yonatani kalonga, “Tatangu kowagaza bule wanhu. Niye sambi baha mhata nguvu kwavija nilanza uki kidogo.
30 Maza iwakalizi wahadile lelo ivinhu va iwanhu owehila, Wafilisiti wahahumigwe ng'hani.”
31 Siku dijo, Waizilaeli wawakoboza Wafilisiti kulawa Mikimashi mbaka Aiyaloni. Waizilaeli wakala wadonhile mbuli ya nzala na kuwakoboza Wafilisiti.
32 Avo wanhu wakimbilila vija ivinhu viwawabokile Wafilisiti, ng'ombe, ng'hondolo, na mibofu ya ng'ombe wawachinjila bahaja kuwakalile na waja inyama hamoja na idamu.
33 Wanhu wayagwe wamulongela Sauli, “Lola wanhu waja otenda mbuli ihile kwa Mndewa Imulungu oja nyama ili na damu.”
Sauli kawalongela, “Mweye mubena gamalagizo. Dibimbiliseni ajo idibwe dikulu mdigale hano kumwangu.”
34 Avo Sauli kawalongela, “Gendeni mkawalongele wanhu wagale ng'hondolo na ng'ombe na wachinjigwe na kudigwa bahano, sambi watende nzambi kwa Mndewa Imulungu kwa kuja nyama ili na damu.” Avo wanhu wose kilo kija kila imoja kagala ng'ombe wake wachinjigwa bahaja.
35 Baho Sauli kamzengela upango Mndewa Imulungu. Awo ukala upango wa ichanduso wa Sauli kumzengela Mndewa Imulungu.
36 Sauli kawalongela wanhu, “Tucholeni tukawavamile Wafilisiti na tusole vinhu vao mbaka yahavika imitondo, kokuwa kuduhu munhu yonda tumuleke mgima.”
Wanhu wamulongela, “Tenda chochose chuuwona kumwako chofaya.”
Lakini imulava nhosa kawalongela, “Beteni tanhu tumuuze Imulungu.”
37 Avo Sauli kamuuza Imulungu, “Vino, ny'hole nikawakoboze Wafilisiti? Kowagela mmakono ga Waizilaeli?” Lakini Mndewa Imulungu hamwidike bule siku dijo.
38 Sauli kawakema, “Izoni hano vilongozi wose wa iwanhu, ili tujuwe nzambi gani ituitendile lelo.
39 Kamba Mndewa Imulungu viyokala na viyoigombola Izilaeli, hata kamba yabanange mwanangu Yonatani na yahalondigwa kukomigwa yakomigwe.” Lakini haduhu munhu yamwidike.
40 Avo Sauli kawalongela Waizilaeli wose, “Mweye mose mwime ubanzi uja, abaho niye na mwanangu Yonatani tokwima ubanzi uno.”
Wamulongela, “Tenda chochose chuuwona chofaya kumwako.”
41 Avo Sauli kampula Mndewa Imulungu kalonga, “Mndewa Imulungu, Imulungu wa Izilaeli habali hunongela niye msang'hanaji wako? Go Mndewa Imulungu, Imulungu wa Izilaeli, kamba kuna mbuli ihile inhendile hebu mwanangu Yonatani, avo ditende dibwe da Ulimu dilave kilaguso. Lakini kamba mbuli ayo ihile yakuna iwanhu wako wa Izilaeli, avo ditende dibwe da Tumimu dilave kilaguso.” Avo, Sauli na mwanage wao wakoneke wabananga lakini wanhu hawoneke wabananga.
42 Sauli kampula kabili kalonga, “Mndewa Imulungu ditende dibwe dilave kilaguso kamba niye nibananga hebu mwanangu Yonatani kabananga.” Dibwe dilagusa Yonatani kabananga.
43 Sauli kamulongela Yonatani, “Nilongele mbuli gani yuutendile.”
Yonatani kamulongela, “Nilanza uki kidogo na fimbo yangu, na hano notogola kukomigwa.”
44 Sauli kalonga, “Imulungu yanhendele vivo hata kubanza vivo, kweli Yonatani kolondigwa ukomigwe.”
45 Wanhu wamulongela Sauli, “Habali Yonatani yakomigwe, na heyo ayo yagalile mhumo ng'hulu mwiisi ya Izilaeli? Mbuli ayo haidahika hata kidogo kamba vija Mndewa Imulungu viyokala mgima, hata luvili lumoja lwa kudipala jake halulagala hasi, kiyatendile lelo katenda kwa mbuli ya Imulungu.” Avo wanhu wamgombola Yonatani avo hakomigwe bule.
46 Avo Sauli kagimbula kuwakweleleza Wafilisiti, Wafilisiti nao wabwela ukae kumwao.
Sauli koitowa ng'hondo ng'hani
47 Sauli viyawile mndewa wa Izilaeli kakala yoitowa na iwanhu omwihila kila ubanzi, kaitowa na Wamoabu na Waamoni na Waedomu na wandewa wa Soba na Wafilisiti. Kila viyaitowile na hewo kawahuma.
48 Kaitowa na hewo kwa udahi, na kawahuma Waamaleki na kawagombola Waizilaeli kulawa mmakono ga awo wawavamile na kusola vinhu vao.
49 Wanage Sauli wakala Yonatani na Ishivi na Malikishua. Wanage wa ikitwanzi wakala wabili, imkulu kakemigwa Melabu na imdodo kakemigwa Mikali.
50 Mwehe wake Sauli kakemigwa Ahinoamu, mwanage Ahimaasi. Imkulu wa iwakalizi wa Sauli kakemigwa Abeneli mwanage Neli, tata mdodo wa Sauli.
51 Tatake Sauli kakemigwa Kishi na tata wa Abeneli kakemigwa Neli, awo ukala ulelo wa Abieli.
52 Kipindi chose cha utawala wa Sauli kukala na ng'hondo ng'hulu na Wafilisiti. Sauli kila viyamonile munhu mwene nguvu hebu galu wa kuitowa kamsola yailumbe na wakalizi wake.