29
Daudi kolemigwa na Wafilisiti
1 Wafilisiti wawating'haniza wakalizi zao wose na weka ng'hambi yao ako Afeka, Waizilaeli nao weka ng'hambi yao behi na nzasa ikalile ako Yezileeli.
2 Wakulu watano wa Wafilisiti viwakalile obita na mabumbila magana kwa maelufu ga wakalizi, Daudi na wanhu zake hamoja na Akishi wakala owakweleleza kukisogo.
3 Wakulu wa wakalizi wa Wafilisiti wamuuza Akishi, “Waizilaeli wano hano otenda choni?”
Akishi kawalongela, “Ino Daudi msang'hanaji wa mndewa Sauli wa Izilaeli, nayo kana siku nyingi tangu viyakimbilile kumwangu, kuduhu mbuli yoyose ihile iyatendile.”
4 Lakini wakulu wa Wafilisiti wamgevuzikila ng'hani Akishi, wamulongela, “Mbweze yakakale kuja kuumgwelele. Halondigwa yachole na siye kuing'hondo, kamba twahachola na heyo kodaha kutuhinduka kuing'hondo. Vino kotenda choni ili yatogoligwe na mndewa wake kamba siyo kwa kugakanha mapala ga wanhu zetu?”
5 Vino, ino siyo Daudi ija watwanzi wakala okwimba na kucheza,
“Sauli kakoma maelufu gake,
lakini Daudi kakoma maelufu longo?”
6 Akishi kamkema Daudi kamulongela, “Kamba Mndewa Imulungu viyokala, kutenda ganogile kumwangu. Yahakuwile goya kamba twahacholile wose mwiing'hondo, kwavija siyonile mbuli yoyose ihile tangu viwizile mbaka lelo dino, lakini iwakulu okonela shaka gweye.
7 Avo bwela ukae, kwa tindiwalo ili sikuuwagevuze iwakulu wa Wafilisiti.”
8 Daudi kamulongela Akishi, “Nhenda choni? Kamba vuulonga hunyonile na mbuli yoyose ihile toka siku da ichanduso mbaka lelo, habali huchola na niye kuitowa na iwanhu omwihila mkulu wangu mndewa?”
9 Akishi kamulongela, “Nojuwa kamba kwabule mbuli ihile kumwangu kamba msenga wa Imulungu. Lakini awo iwakulu wa Wafilisiti walonga, ‘Sikuyachole hamoja na siye kuing'hondo.’
10 Avo mina, gweye hamoja na Waizilaeli wayago wezile hamoja na gweye, mayo vonda uche molondigwa musegele.”
11 Avo imitondo yake Daudi hamoja na wanhu zake wabwela mwiisi ya Wafilisiti. Lakini Wafilisiti wachola Yezileeli.