13
Amnoni na Tamali
1 Vigabitile gago, Abisalomu mwanage Daudi, kakala na lumbu jake yanogile ng'hani twaga jake Tamali. Amnoni mwana iyagwe wa Daudi kakala yomulonda Tamali lumbu jake.
2 Amnoni kadununzika ng'hani mbaka kapata utamu, kwavija Tamali kakala mwali, Amnoni kajuwa kamba havidahika kutenda nayo mbuli yoyose.
3 Avo Amnoni kakala na mbwigake twaga jake Yonadabu mwanage Shama ndugu yake Daudi. Yonadabu kakala mbala ng'hani.
4 Yonadabu kamuuza Amnoni, “Gweye kwa mwana wa mndewa habali kosoka kila siku?”
Amnoni kamulongela, “Nomulonda Tamali lumbu wa mdodo wangu Abisalomu.”
5 Yonadabu kamulongela, “Tambalala mulusazi itende kwa mtamu. Tatako yaheza kukulola mulongele, ‘Nolonda lumbu jangu Tamali yeze kunigwaa ndiya nije. Chonde muleke yanitandile ndiya kuno nomulola, na nije kulawa mmakono gake.’ ”
6 Avo Amnoni katambalala mulusazi, kaitenda mtamu. Mndewa viyezile kumulola, Amnoni kamulongela, “Chonde nompula Tamali yeze kunitandila magate kuno nomulola na niye nije kulawa mmakono gake.”
7 Daudi kamgalila usenga awo ukae kwa Tamali, kalonga, “Genda mwiing'anda ya lumbu jako Amnoni ukamtandile ndiya.”
8 Avo Tamali kachola kwa lumbu jake Amnoni. Amnoni kakala yatambalale, Tamali kasola usage wa ngano kaukanda na katenda gate kuno Amnoni kolola.
9 Tamali kehula nongo ya magate kamgalila, lakini Amnoni kalema kuja, kalonga, “Kila munhu yeli hano yalavigwe kunze.” Avo wanhu wose walawa kunze.
10 Abaho, Amnoni kamulongela Tamali, “Ngalila gamagate mdigati jangu unidime.” Tamali kasola gamagate gayatandile kamgalila lumbu jake mdigati jake.
11 Lakini viyamgalile ndiya ili yaje, Amnoni kamgoga kwa nguvu lumbu jake kamulongela, “Izo uwase na niye, lumbu jangu.”
12 Tamali kamulongela, “Aka lumbu jangu sikuuniwase kwa nguvu. Mbuli ayo haitendigwa mwiisi ya Izilaeli. Sikuunitendele kilozo acho.
13 Kinyala kino nokitendaze? Na gweye kokuwa kamba imoja wa wabozi wehile wa Izilaeli. Chonde longa na mndewa na heyo kotogola unisole.”
14 Lakini Amnoni kalema kumtegeleza na kwavija kakala na nguvu kubanza heyo, avo kamgoga kamuwasa kwa nguvu.
15 Abaho Amnoni kamwihila ng'hani Tamali. Kamwihila ng'hani kubanza vija viyakalile yomulonda. Kamulongela, “Segela hano, lawa kunze.”
16 Tamali kamulongela, “Bule lumbu jangu. Viuniwinga kobananga ng'hani kubanza kija kiunhendele.”
Lakini Amnoni halondile kumtegeleza.
17 Kamkema msang'hanaji wake kamulongela, “Mulave hano mtwanzi ino abaho hinda ulwivi kwa mhalaligwe.”
18 Avo msang'hanaji kamulava kunze Tamali na kahinda ulwivi kwa mhalaligwe. Tamali kakala yavalile kanzu tali digeligwe ulembo, kwavija avo vivo viwalo viwavalaga wandele wali wa mndewa ako umwaka.
19 Tamali kaibaka mitozi kudipala, kadega kanzu jake kwa usungu. Keka mkono wake kudipala, kasegela kuno yochola yolila kwa nyangi.
20 Lumbu jake Abisalomu viyamonile kamuuza, “Lumbu jako Amnoni kawasa na gweye? Kwa sambi sikuumulongele munhu mbuli ino.” Avo Tamali kakala mwiing'anda ya lumbu jake Abisalomu kuno kana usungu na kanyunyuwala.
21 Mndewa Daudi viyahulike mbuli ayo kagevuzika ng'hani.
22 Abisalomu kamwihila ng'hani Amnoni na halondile hata kulonga nayo, kwavija kamgela kinyala lumbu jake.
Abisalomu koliha gehile
23 Viibitile miyaka mibili kumwande, Abisalomu kakala na kiwili cha kuwakanha mibahila ng'hondolo zake kudibuga da Baali Hazoli behi na Efulaimu. Kawagoneka wana wose wa kimbigalo wa mndewa.
24 Abisalomu kachola kwa mndewa Daudi kumulongela, “Niye msang'hanaji wako nina kiwili cha kuwakanha mibahila ng'hondolo. Chonde, nokupula gweye mndewa hamoja na wasang'hanaji zako mwize.”
25 Mndewa kamwidika, “Hailondigwa siye wose twize, bule tokuwa mzigo kumwako.” Lakini Abisalomu kagendelela kumsusumiza tatake yachole, lakini mndewa kalema, ila kamtambikila.
26 Avo, Abisalomu kamulongela, “Kamba gweye hauchola mtogolele ndugu yangu Amnoni tuchole nayo.”
Mndewa kamuuza, “Habali yachole na mweye?”
27 Lakini Abisalomu kagendelela kumsusumiza, abaho mndewa katogola Amnoni na wanage wayagwe wachole kuna ikiwili.
28 Abisalomu kawalongela wasang'hanaji zake, “Muloleni Amnoni vonda yang'we divai na kudeng'helela na niye nowalongela, ‘Mkomeni Amnoni,’ avo mumkome, sambi mudumbe, niye iyo niwalongela. Mugangamale na muwe magalu.”
29 Avo wasang'hanaji wa Abisalomu wamtendela Amnoni kamba viwalagizwe na Abisalomu, abaho wana wa kimbigalo wa mndewa wenuka kila imoja kakwela mnyama kamba kihongwe mkulu kakimbila.
30 Kipindi viwakalile mnzila usenga uvika kwa Daudi, “Abisalomu kawakoma wanago wose wa kimbigalo, habule hata imoja wao yasigale mgima.”
31 Mndewa Daudi kenuka, kadega viwalo vake kwa usungu, na katambalala hasi. Na waja wasang'hanaji zake wose wakalile wemile behi na heyo wadega viwalo vao kwa usungu.
32 Lakini Yonadabu mwanage Shama ndugu yake Daudi, kamulongela, “Mndewa wangu sambi ugese kamba wanago wose wakomigwa, Amnoni yaiyeka iyo yakomigwe. Abisalomu kakala yogelegeza kutenda mbuli ayo tangu kipindi kija Amnoni viyamuwasile kwa nguvu lumbu jake Tamali.
33 Avo, mndewa wangu sambi ugese mmoyo wako kamba wanago wose wa kimbigalo wakomigwa. Amnoni yaiyeka iyo yakomigwe.”
34 Kipindi acho, Abisalomu kakala yakimbile.
Mkalizi wa mndewa viyalolile kukisogo kajona bumbila kulu da wanhu dokwiza olawa nzila ya Holonaimu.
35 Yonadabu kamulongela Daudi, “Lola wanago okwiza kamba vinikulongele niye msang'hanaji wako.”
36 Viyamambukize kulonga, wanage mndewa walawilila, wasonga kulila kwa sauti. Mndewa na wasang'hanaji zake wose walila kwa usungu.
37 Lakini Abisalomu kakimbilila kwa Talimai mwanage Amihudi, mndewa wa Geshuli. Mndewa Daudi kagendelela kumulilila mwanage Amnoni siku nyingi.
38 Abisalomu viyakimbilile ako Geshuli, kakala kuko kwa miyaka midatu.
39 Lusikisiki lwa Daudi vuwishile mbuli ya ifa ya mwanage Amnoni, kamkumbuka mwanage Abisalomu.