17
1 Abaho Ahitofeli, kamulongela Abisalomu, “Nhogolela nisagule wanhu elufu longo na mbili, ny'hole kumzahila Daudi kilo kikino.
2 Nomvamila kwavija kokuwa kadonha na kabule tamanilo, wanhu zake nowagela bwembwe okimbila. Nomtowa mndewa yaiyeka.
3 Nowabweza wanhu wose awo kumwako kamba mhambe viyochola kwa mbigalo wake. Gweye koulonda ugima wa munhu imoja yaiyeka, wanhu wayagwe okuwa na tindiwalo.”
4 Mbuli ayo yoneka inoga kwa Abisalomu na kwa wavele wose wa Izilaeli.
Hushai komwagiza Abisalomu
5 Abaho Abisalomu kalonga, “Mkemeni Hushai wa isi ya Aliki tuhulike magesa gake.”
6 Avo Hushai viyavikile, Abisalomu kamulongela, “Ahitofeli kalava magesa gano, vilihi gweye kokonaze, tutende kamba viyalongile? Na kamba siyo tugwelele magesa gako.”
7 Hushai kamulongela Abisalomu, “Kwa kipindi kino magesa gago haganogile bule.
8 Komjuwa goya tatako na wanhu zake viwakuwile magalu wa kuitowa, na viwagevuzike kamba simba yabokigwe wanage kupoli. Vivija komjuwa goya tatako viyeli mbala wa kuitowa ng'hondo na ikilo hawasa na iwakalizi.
9 Hata vino vitulonga kaifisa mwiimhango hebu hanhu hayagwe. Kamba twahachola kuitowa na hewo na kamba wanhu wa kumwetu wahadanganika, usenga okwenela kamba wanhu wa Abisalomu wahumwa vihile.
10 Wanhu wako wahahulika avo, hata waja magalu weli na mizoyo ya simba okwingila bwembwe, kwavija Izilaeli yose ojuwa kamba tatako galu hamoja na wanhu zake magalu.
11 Magesa gangu, uweke hamoja wanhu wose wa Izilaeli kusongela Dani mbaka Beelisheba wawe wengi kamba msanga wa mwhani, abaho gweye uchole mwiing'hondo.
12 Na siye tomcholela Daudi hanhu hohose honda yoneke na tomvamila kamba vija tungwe vidigwa uchanha ya ulongo. Habule yonda yasigale mgima kamba heyo mwenyego hebu wanhu zake wose weli hamoja na heyo.
13 Kamba yahakimbilila kudibuga jojose dija, avo wanhu wose wa Izilaeli ogala nzabi na ogabulula gamabwe ga uluwa lwa buga dijo mbaka kubonde, honda kisigale kinhu chochose hata dibwe dodo da buga dijo.”
14 Abisalomu hamoja na wanhu wose wa Izilaeli walonga, “Magesa ga Hushai ganoga kubanza ga Ahitofeli.” Wagalema magesa ga Ahitofeli kwavija Mndewa Imulungu kagatenda galemigwe ili Abisalomu yabanangigwe.
Daudi kozumigwa na kutoloka kinyelegezi
15 Hushai kawalongela walava nhosa Sadoki na Abiatali vija Ahitofeli viyawalongele Abisalomu na iwavele wa Izilaeli, na heyo Hushai viyawalongele.
16 Abaho Hushai kawalagiza, “Tendeni hima hima mumgalile usenga Daudi kamba kilo cha lelo sambi yawase mna gamaloko ga kiwala, kolondigwa yaloke lwanda Yolidani ili sambi yagogigwe na kukomigwa heyo na wanhu zake wose.”
17 Kipindi acho Yonatani na Ahimaasi wakala waifisile behi na nzasa ya Eni Logeli. Mtwanzi imoja kakala kotumigwa na iwalava nhosa na kawagalila usenga awo Yonatani na Ahimaasi wakalile waifisile ili sikuwoneke okwingila mdibuga. Abaho hewo wamgalila usenga awo mndewa Daudi.
18 Lakini mbwanga imoja kakala yawonile, kamulongela Abisalomu. Avo wose wabili wasegela himahima wachola mwiing'anda ya munhu imoja ako Bahulimu. Munhu ayo kakala na sima behi na ng'anda yake, Yonatani na Ahimaasi wengila mdisima dijo waifisa.
19 Mtwanzi mwene ng'anda ayo kasola ngubiko ya idisima kadigubika, abaho kanika ngano uchanha yake, haduhu munhu yajuwile mbuli ayo.
20 Wanhu wa Abisalomu viwavikile kwa mtwanzi ayo, wamuuza, “Wakwahi Yonatani na Ahimaasi?”
Ija imtwanzi kawedika, “Waloka kizanda.” Lakini wanhu wa Abisalomu viwawazahile hawawonile, avo wabwela Yelusalemu.
21 Wasang'hanaji wa Abisalomu viwasegele, Yonatani na Ahimaasi walawa muja mdisima wachola kwa mndewa Daudi kumulongela. Wamulongela, “Segela, uloke mwambu wa lwanda, kwavija Ahitofeli kamgwaa magesa gehile Abisalomu mbuli yako.”
22 Avo Daudi kasegela heyo hamoja na wanhu zake iyakalile nao, waloka lwanda lwa Yolidani. Viivikile imitondo wose wakala walokile lwanda lwa Yolidani.
23 Ahitofeli viyone magesa gake hagatogoligwe, kamsasala na kamkwela kihongwe wake kachola ukayake. Viyavikile ukayake kagola vinhu vake, abaho kaibota, kadanganika na kazikigwa behi na panga da tatake.
24 Abaho, Daudi kachola Mahanaimu. Abisalomu kaloka lwanda lwa Yolidani na wanhu wose wa Izilaeli.
25 Abisalomu kakala yamwikile mkalizi mkulu Amasa hanhu ha Yoabu. Amasa kakala mwanage Yeseli, Mwishimaeli. Mamake kakemigwa Abigaili mndele wa Nahashi, yakalile mdodo wake Seluya, mamake Yoabu.
26 Abisalomu hamoja na wanhu zake wa Izilaeli weka ng'hambi yao mwiisi ya Gileadi.
27 Daudi viyavikile Mahanaimu, Shobi mwanage Nahashi kulawa buga da Laba mwiisi ya Waamoni, na Makili mwanage Amieli wa buga da Lodebali, na Balizilai Mgileadi kulawa buga da Logelimu,
28 wagala visazi, mabakuli na viya va ulongo, ngano, shaili, na usage, na muhindi wa kukanzinga, ng'hunde na dengu,
29 uki, maziwa, na ng'hondolo, na siagi, kwa Daudi na wanhu zake, kwavija wajuwa wakala na nzala na ng'hilu na wadonha kuluwala.