6
Sanduku da lagano da Imulungu dogaligwa Yelusalemu
(1 Umwaka 13:1-4; 15:25-16:6; 16:43)
1 Avo Daudi kawating'haniza kabili wakalizi wanogile wa Waizilaeli elufu selasini.
2 Avo Daudi hamoja na wanhu zake wachola Baala ya Yuda kudisola sanduku da lagano dikemigwa kwa twaga jake Mndewa Imulungu yeli na udahi wose yokala mkigoda chake cha undewa hagati ya viumbe weli na mabawa wakalile uchanha ya disanduku.
3 Avo, wadisola wadika mumtuka wa sambi, wadilava mng'anda ya Abinadabu, ikalile mkigongo. Uza na Ahio wanage Abinadabu, awo wakalile owalongoza iwang'ombe wakalile obulula mtuka awo,
4 kuno disanduku da lagano damgati, Ahio kakala yalongole kuulongozi wa disanduku dijo.
5 Daudi na Waizilaeli wose wakala ovina haulongozi wa Mndewa Imulungu kwa udahi wao wose, kwa kwimba nyila, watowa bango na kilimba na ngoma na manyanga, na vinhu viyagwe.
6 Viwavikile hana ulubuga lwa kubigila lwa Nakoni, Uza kagolosa mkono wake yadigoge disanduku da lagano da Imulungu kwavija waja iwang'ombe wakala waikwalile.
7 Kwa mbuli ayo ng'hasiliki ya Mndewa Imulungu imvikila Uza, avo Imulungu kamkoma bahaja hadisanduku da lagano da Imulungu.
8 Daudi kagevuzika kwavija Mndewa Imulungu kagevuzika na kumkoma Uza. Avo hanhu aho hakemigwa Pelesi Uza, na mbaka lelo hokemigwa vivo.
9 Siku dijo Daudi kamdumba Mndewa Imulungu kalonga, “Nodahaze kudigala sanduku da Imulungu ukae kumwangu?”
10 Avo Daudi halondile disanduku da lagano divikile mdibuga da Daudi, avo Daudi kadigala disanduku da lagano da Mndewa Imulungu mng'anda ya Obedi Edomu, Mgiti.
11 Sanduku da lagano dikala kuko mng'anda ya Obedi Edomu, Mgiti kwa miezi midatu. Avo Mndewa Imulungu kamtendela ganogile heyo hamoja na wanhu wa mng'anda yake.
12 Abaho mndewa Daudi viyahulike kamba Mndewa Imulungu kamtendela ganogile Obedi hamoja na wanhu wa mng'anda yake na vinhu vake vose viyakalile navo, mbuli ya sanduku da lagano, avo Daudi kachola kudisola disanduku da lagano da Imulungu dili mng'anda ya Obedi Edomu na kadigala mdibuga da Daudi kwa deng'ho.
13 Wanhu waja wapapile sanduku da lagano da Mndewa Imulungu kila viwatembele hatuwa sita Daudi kalava nhosa ya ng'ombe mbigalo na bofu da ng'ombe dinonile.
14 Daudi kakala yavalile kikoti cha ulava nhosa, kavina kwa udahi wake wose haulongozi wa Mndewa Imulungu.
15 Avo, Daudi hamoja na wanhu wose wa Izilaeli wadigala disanduku da lagano da Mndewa Imulungu mdibuga da Daudi kwa deng'ho na kwa sauti ya mhalati.
16 Kipindi sanduku da lagano da Mndewa Imulungu vidikalile dokwingila kudibuga da Daudi, Mikali biti Sauli kasungulila kudidilisha kamona mndewa Daudi kocheza kuno kozumha zumha haulongozi wa Mndewa Imulungu, avo kambezeli mmoyo wake.
17 Wadigala disanduku da Mndewa Imulungu wadika mdihema diyasimike Daudi. Abaho Daudi kalava nhosa ya kusoma moto na nhosa za kugala kuilumba kuulongozi wa Mndewa Imulungu.
18 Daudi viyamambukize kulava nhosa za kusoma moto na nhosa za kugala kuilumba, kawatambikila iwanhu kwa twaga da Mndewa Imulungu yeli na udahi wose.
19 Abaho kawagolela wanhu wose wa Izilaeli, watwanzi na wambigalo kila munhu gate na kibonge cha nyama na bumunda da zabibu zinyalile. Abaho wanhu wose wasegela kila munhu kabwela ukayake.
20 Daudi viyabwelile ukayake ili yawatambikile wanhu wa mng'anda mmwake, Mikali mndele wa Sauli kalawa kunze kumbokela kalonga, “Lelo unzonza, mndewa wa Izilaeli kuigela kinyala, kwavija kuvikudula viwalo vako haulongozi wa watumwa wa kitwanzi wa wanhu zako kamba vija munhu yelibule nzewele viyokudula viwalo vake haulongozi wa wanhu bila kinyala!”
21 Daudi kamulongela Mikali, “Ng'hala haulongozi wa Mndewa Imulungu yanisagule niye hanhu ha tatako na ulelo wake, ili niwe mtawala wa wanhu wa Izilaeli wa Mndewa Imulungu. Avo niye novina haulongozi wa Mndewa Imulungu.
22 Noihumulusa mwenyego kubanza hano. Gweye konyona sifaya, lakini awo iwatumwa waulongile onitogola.”
23 Nayo Mikali, mndele wa Sauli hapatile wana mbaka ifa yake.