28
Paulu pashitingi sha Malita
Napanelo tuvanu uti tukapukange mushijoidyo asho, patuwikile kumwangu tundímanya kenga shitingi asho vashishema Malita. Bai vene shitingi asho vandílodya litananilo lyakujowa kwetu wetu. Vakatupwashalela na vakatumbulididya moto mwaa wakutunduvanga kutonya medi na mwaa wakutudidima imepo. Napanelo Paulu andílakota itu yadinang'ene kutenda akang'ela moto kutwala mo muding'uni mo kuma nyoka walina jaa-ntela atukuta ntukuka kunnamatila Paulu mulyanda lyake. Napanelo vene ikaja ayo pavagwene inyoka ìnamatidile mulyanda lyake Paulu, vandyáulanila shivenevene vaashidoni, “Munu aju patukamwambambidya ni shimalivanu. Mwaa lola, ata ikava kenga andipuka mmedi kanji jo mwene Ishaliya hanneka anama.” Kanji Paulu anímpatulidya nyoka jo pamoto na hashipali shintandéke. Napanelo vanu vapashitingi asho vashikumbukila kenga Paulu unammimba nkono kwali kupela shingangala. Kanji vakaikale wakati woe valindila, pavagwene kenga hashipali shimmilinganianga, vanavo dindívaida ding'ano dinji kutwala kutangola kenga Paulu avele nnungu.
Napanelo pepi na palyutu alyo, andípagwa mautu ake gavana washitingi asho walina Pubiliu. Nang'olo aju wetu andítushema na andítukalibisha paing'ande pake na tundíikanavo shana namene maduva matatu. Napanelo tatake Pubiliu unímpwateka mili na kudalola myadi. Paulu paukile nannola, ling'oto lyakushwali anímmikila makono kutwala kumponia. Shikatandeke shitendo asho, valwele uti vapashitingi asho vandímuukila Paulu navanavo vandípona momo. 10 Vanu avo vandítupa dinudyo dyoe namene na patuukile ndapanganikanga pakulota twinjile mwingalava vandítupa vinu vyoe vyakutupwashela mushimwanda shetu.
Paulu ankuwika pa Loma
11 Ling'oto lyakwikala wetu pashitingi asho myedi mitatu, tundíinjila mwingalava ye ipagwíte mulyutu alyo muwakati uti wakudidima imepo. Ingalava yoyo ivele ya ku Alishandaliya na mushu mwake indívanavo mashinamu avannungu mamaa.* 12 Tukawike panshiko wa Shilakusha, tundíikala maduva matatu. 13 Patuumile apo, tundyúka shalowa mpaka pa Legiu. Palyamba lyake kupunga imepo yakwalakela kwina shilambo kutwala muliduva lyake lyambili wetu kuwika panshiko wa Putiyoli. 14 Pa Putiyoli wetu kuvakodya vanung'unumunu, vovo vo kutujugwangila twikanavo ishumana imo. Kutwala apo, tundyúka ndawika ku Loma. 15 Napanelo vanung'unumunu váshiikala pa Loma vakapate dyabali dyakuwika kwetu, vandíida ndatushinga pashakoni sha pa Apiyo na pa Ding'ande Nnatu Dyavajeni. Paulu akavone vanung'unumunu avo, anínnambwalela Nnungu na ntima wake undímwikala shana.
16 Patuwikile nkaja mu Loma, Paulu andípata litala lyakunama paing'ande yagweka kutwala kummikila mwing'ondo jumo wakunnaledya.
Paulu ankukadyania na vayuda va pa Loma
17 Napanelo akapite maduva matatu, Paulu andívashamanga vanang'olo vavayuda kutwala vanavo pavaidanenge nae kuvaulila doni, “Mmanung'unumunu, nangu panikatenda shinu shakukowa kwavenentete vetu na kwashinamilo shavatulakadile vanakuluvetu, vayuda pa Yelusalemu vaningunga kutwala kungukamudya kumakono avaloma. 18 Valoma pavalalyenge myaa vyangu vashindalota vanguleke mwaa nkati mo havagwene likosha lyoelyoe lyakulota ngupalele. 19 Kanji vayuda ni kwita doni kutwala nanangu kujugwa mwaa wangu uwike akune kumwe Shashali pakulota alalyange ata ikava kenga nangu hanguvenavo mwaa woewoe wakuvakashalya venentetemwangu. 20 Ni ashi shitadídye ngujugwangile nimwone na ngwambange mwaa namu mwenu pakuva ni kwamwaa walilindilililo lyavanaishilaeli lyangunyukatila nangu mang'unyang'unya ala.”
21 Vanavo kutwala kushidoni, “Wetu hatupatile ata lyamba limo lyakwaloka ku Yudeya na pakati pavanung'unumunu vaidíle akuno hapali hatuvalangangidile shitendo shoeshoe shakunyata shako wako. 22 Nadoni tundilota tukwigwe wako umwene mwawonela. Mwaa tundimanya kenga kula kushinu vanu vankuvangedya ishama yawoda wako.”
23 Napane vakavike liduva lyakukadyania namu nae, vandímwidila vanu voe palyutu lyashiikala na nae kutunduvangila lyamba mpaka lyulo andívaigwiniya ataa ushuda yautawala wa Nnungu alingangila avashombe kwaing'ano imwe Yesu kutunduvangila mu Lilamulo lyake Musha namomo mu Vakulava. 24 Vanji napane vandívashambegwa na ashilá shitangaléke kanji vanji havakulupidíle. 25 Napavedoni vàpagwite mukutaukananga shivenevene, Paulu andívaulila vaumanange atangola lilove limo, “Imumu Wanashwe anditangola viu na vanakuluvenu kwaindila imwe nkúlava Ishaiya 26 patédoni,
 
“ ‘Wena kwavenentete ava ukavaulile doni,
Mundaigwilila matu ngambulii kanji hamumanya shitangaléka,
Mundalola ndoo kanji hamumanya shinu shene.
27 Mwaa mitima vyavenentete ava vindinanopa;
kumatu kwave vandidiva,
mevo ave vandyunidya
kwambangidya havanalole vamanye shinu shene,
havanaigwilile vamanye shitangaléka
na havanaitikile shitangaléka;
leka vakatandile avyo
vakandishinjiulila mitima vyave kwangu,
kutwala nangu kuvaponia.’ ”
 
28 Paulu kavili kushidoni, “Ikala mumanya doni ntenga au wakwambola wake Nnungu undipalakalegwa kwavamidi na vanavo vandaigwilila.” 29 
30 Bai Paulu andíikala vyaka vivili paing'ande yake yapangíle. Mulyutu lyolyo nae ashindavapwashalela vanu uti váshuka nannola 31 avalanganga utawala wa Nnungu na apundisha uti vimwámba Umu Yesu Klistu kwantima shii uti§ na kwabila kundingadinga shinu.
* 28:11 Ava vavele vannungu vavili vavagalegu na vandívanavo mena ala: Kashitoli namu Polushi. 28:27 Lola Ishaiya 6:9, 10. 28:29 Mumabuku anji akala na amana, nshitali wa 29 haupali. Kanji mumabuku anji mwaupagwite unkushidoni, Bai Paulu akatangole doni, vayuda vandyápukananga vauka vapwatananga namene shivenevene… § 28:31 Kwali: …kwaungala uti.