10
Vanu va n'ding'olo dya vana vanga Nuhu
(1 Mahiku 1:4-23)
1 Bada ya livambwe, vana vanga Nuhu, yani Shemu, Yafeti na Hamu, nkuvaveleka vavana. Na aino njo histoliya ya vanu va n'ding'olo dyavo.
Vanu va nnukolo lwanga Yafeti
2 Yafeti ámmeleke Gomeli na Magogu na Madayi na Yavani na Tubali na Mesheki na Tilasi.
3 Gomeli nkummaleka Ashikenazi na Lifati na Togama.
4 Yavani nkummaleka Elisha na Talishishi na Kitimu na Lodanimu.
5 Kuhalokana na vana anevo vanga Yavani, nkuvelekwa vanu vohe vayanjêle mmilambo vya pwani ya bahali ya Meditelaniya na mmisiwa vyake. Anevo njo vanu va nnukolo lwanga Yafeti kupapatana na matawa lao na luga dyavo na ding'olo dyavo na vilambo vyao.
Vanu va nnukolo lwanga Hamu
6 Hamu ámmeleke Kushi na Misili na Puti na Kanaani.
7 Kushi nkummaleka Seba na Havila na Sabita na Laama na Sabiteka. Na Laama nkummaleka Sheba na Dedani.
8 Uchocho, aneyo Kushi nkummaleka Nimlodi, anavele munu ntandi kuva mwing'ondo shujaa pachilambo.
9 Nimlodi ávele nkúlumbata nkulu kupunda vammalele pachilambo, njo mana pàvele na itangodi ivatangola vanu kuva, “Ayu munu àvele muchi Nimlodi, ayula nkúlumbata nkulu kupunda vammalele pachilambo.”
10 Dimanga dinandi dyanatandilike kuditawala dyávele, Babeli na Eleku na Akadi na Kaline, nchilambo cha Babiloni.
11 Nimlodi paukile nchilambo anecho nkuhwena mpaka chilambo cha ku Ashulu, aneko nkunadenga imanga ya Ninawi na Lehobosi-Ili na Kala,
12 na Leseni. Na imanga ya Leseni yávele ching'ati imanga ya Ninawi na imanga ya Kala, na imanga ya Kala yávele imanga ing'ulu.
13 Na Misili njo ánavele anakulwao Valudi na Vaanami na Valehabi na Vanafutuhi,
14 na Vapasilusi na Vakafutoli na Vakasiluhi. Na Vakasiluhi njo anakuluvao Vafilisti.
15 Kanaani nkummaleka Sidoni, mwanawe chihungula mikova. Na Sidoni njo anakulwao Vasidoni. Uchocho, Kanaani ávele anakulwao Vahiti,
16 na Vayebusi na Vaamoli na Vagiligashi,
17 na Vahivi na Vaaliki na Vasini,
18 na Valivadi na Vasemali na Vahamasi. Bahi lukoto, vanu va lukolo lwanga Kanaani nkuyanjala,
19 na lipalu lya chilambo chavo nkutandikila Sidoni kuloja m'bali wa kusini mpaka ku Gelali na ku Gaza. Na kutandikila Gaza kuloja m'bali wa mashaliki línihweneha mpaka ku Sodoma na ku Gomola na ku Adima na ku Seboimu, mpaka kuhwikila ku Lasha.
20 Anevo njo vanu va nnukolo lwanga Hamu kupapatana na matawa lao na luga dyavo na ding'olo dyavo na vilambo vyao.
Vanu va nnukolo lwanga Shemu
21 Shemu nkuluwe Yafeti, nang'e ávele anakulwao vanu vammalele va nnukolo lwanga Ebeli.
22 Shemu ámmeleke Elamu na Ashulu na Alifakisadi na Ludi na Alamu.
23 Na Alamu nkummaleka Uzi na Huli na Geseli na Mashi.
24 Alifakisadi nkummaleka Sela, na Sela nkummaleka Ebeli.
25 Ebeli nkuvaveleka vana vavili vachilume, yumo nkunchema lina Pelegi, ing'anya mahiku anelo vanu vánimwadilihanyijwa pachilambo chammalele, na mwana yunji nkunchema Yokitani.
26 Yokitani nkummaleka Alimodadi na Selefu na Hazalimaweti na Yela,
27 na Hadolamu na Uzali na Dikla,
28 na Obali na Abimaeli na Seba,
29 na Ofili na Havila na Yobabu. Anevo vammalele nni anavake Yokitani.
30 Vanu anevo váikelenge kutandikila ku Mesha mpaka ku Sefali, chilambo cha machinga chivêle m'bali wa mashaliki.
31 Anevo njo vanu va nnukolo lwanga Shemu kupapatana na matawa lao na luga dyavo na ding'olo dyavo na vilambo vyao.
32 Bahi aneyo njo histoliya ya vanu va n'ding'olo dya vana vanga Nuhu kupapatana na matawa lavo na vilambo vyao. Na bada ya livambwe, vanu anevo vániyanjala, na vanu va vilambo vyammalele vàhalokene na vanu va ding'olo anedyo.