Ɩsɔ́ɔ-dɛ́ɛ Tɔ́m Tákaraɖá 1TESALONÍIKI ŃBA 1

Wasɩ́ɩ́ka kaɖaa ńga Pɔ́ɔlɩ waaŋmáa kɛ

1 Tesaloníiki

ńba nɛ́

Naanɩ́ na ɖɩbáázɩ nɛ́

Wasɩ́ɩ́kawá nasɩ́lɛ gɛ Pɔ́ɔlɩ waaŋmáa Tesaloníiki Krísto ńba. Róóma ńba-dɛ́ɛ laadɔ́ɔ bánÿaá kɛ Masedʊwáanɩ nɛ́-dɛ́ɛ tɛɛbɔńdɩ gɛ bánÿaá Tesaloníiki. Gɩrɛ́ɛkɩ ńba-dɛ́ɛ laadɔ́ɔ-dɛ́ɛ fúu ɩsɔ́ɔ́dáá gɛ tɩwɛná. Pɔ́ɔlɩ wooboná na Yeésu Krísto-dɛ́ɛ Laabáárʊ Kífeńgi ńna, amá, ɩdɔcɔ́ɔ ilééri, káma, Yahúúɖuwá bɔwɛ ńna nɛ́, badaá ɖabata ɩbá bángʊrʊ́ʊna yɩ. Igoobú Timotée waadasɩná ɩcɔ́ɔ ɩlá wɛ́ náálɛ.

Sáátɩ wenkí ɩwɛ Korɩ́ntɩ tɛ́ɛ́dɩ-daá nɛ́ gɛ Timotée wɔɔgɔ́nɩ ifééri yɩ nŋɩ́nɩ́ Tesaloníiki ńba, ɩbá bajaarɛ́ɛ badɩ bɛdɛ́ɛ toovonúm baava Yeésu Krísto nɛ́ bɩnɩ́bááwʊ-daá nɛ́. Ngɛ bɩɩbá bɩlá yɩ niíni. Ńna gɛ waaŋmáa wɛ wasɩ́ɩ́ka kaɖaa ńga kana. Kadaá nɛ́, Pɔ́ɔlɩ waazá Ɩsɔ́ɔ seríya wenkí Tesaloníiki ńba wánlɩzɩ́ɩ kɩ fáráńdɩ́ kɩḿ kɩdaá ɩráa baaganáa-jɔ́ nɛ́ kɩrɔɔzɩ́. Wɔɔdɔ́ɔ́zɩ wɛ tɩmɛ́rɛ wenɖé ɩdɩtɩŋa waalá ɖɛ bɛdɛ́ɛ ńna nɛ́, bɩka ɩbá ɩɖʊ wɛ tɔ́m, ɩtásɩ wɛ sɩsɩ bálááná badɩ caarɩ́ Krísto ńdɩ-dɛ́ɛ nɩ́bááwʊ-daá.

Tɔ́mwá tɩdɛɛzɩjɔɔ́ɔ wɛ temenuú, ngɛ bɔ́nbɔɔzɩ́ badɩ bádándɩlɩ́ tɩ nɛ́, Pɔ́ɔlɩ waalɩzɩ́ wɛ bugutoluú. Tɔ́mwá tɩḿ tɩgadamáa na ɩsɩɖáa-dɛ́ɛ fém, na Krísto-dɛ́ɛ sɩ ɩkɔnɩ ná yíko kʊ́bɔńgɩ na ásícé nɛ́ gɛ. Sɩ ɩtɛ́ɛ́zɩ nɛ́, Pɔ́ɔlɩ waawɩ́lɩ wɛ wenbíwá bɩmɔɔ́na balá nɛ́, ngɛ waabá ɩsɛ́ɛ wɛ.

Pɔ́ɔlɩ wɛ́nzɛɛ́ Krísto-dɛ́ɛ Koduuziya kɔwɛ Tesaloníiki nɛ́

1 Mɔ́ɔ́ Pɔ́ɔlɩ na Siláasɩ na Timotée ɖánŋmaa kʊ mɩ́ɩ Caáwʊ Ɩsɔ́ɔ-dɛ́ɛ Koduuziya kovóo Ɖádʊ́ʊ Yeésu Krísto kɔwɛ Tesaloníiki tɛ́ɛ́dɩ-daá nɛ́ wasɩ́ɩ́ka kana. Ɩsɔ́ɔ-dɛ́ɛ alɩbáráka na ɩdɛ́ɛ fɛɛzɩrɛ ɩ́cɔ́ɔ́ná mɩ́ɩ. 2 Báa sáátɩ wenkí ɖánzám Ɩsɔ́ɔ mɩ́rɩ́ŋa mɩ́rɔ́ɔ́zɩ́, bɩka ɖáláána mɩ́rɔ́ɔ́zɩ́ maazɩ́ ɖɛ́dɛ́ɛ sʊlʊ́ńdɩ-daá. 3 Ɖájaa Ɩsɔ́ɔ ɩzá-daá, báa sáátɩ wenkí, ɖɔ́ndɔɔzɩ́ tɩmɛ́rɛ mɩ́dɛ́ɛ toovonúm-fáa weeyéle mɩ́nlám ɖɛ nɛ́ ɖɩrɔ; ɖɔ́ndɔɔzɩ́ ɖʊɖɔ nŋɩ́nɩ́ mɩ́dɛ́ɛ sɔɔlɩ́m ɩbá bɩbɛɛ́na nɛ́, na nŋɩ́nɩ́ mɩ́dɛ́ɛ tamɔ́ɔ mɩ́ɩ́ɖʊ́ Ɖádʊ́ʊ Yeésu Krísto-rɔ nɛ́ caarɛ́ɛ wenbí nɛ́.

4 Koobíya, ɖányɩ sɩsɩ Ɩsɔ́ɔ sɔɔlɛ́ɛ mɩ́ɩ, ngɛ waada ɩlɩzɩ́ mɩ́ɩ ɩsɩ́ɩ ɩdɩ. 5 Wenbí bʊrɔɔzɩ́ nɛ́, ɖɔ́ɔ́gɔ́nɩ ɖifééri mɩ́ɩ Laabáárʊ Kífeńgi nɛ́, bɩdɛkɛ́ɛ na nɔɔ́-daá ŋmatɩrɛ yéḿ gɛ ɖéévééri ná mɩ́ɩ kɩ, amá, na Kezeŋa Ɖacɩrɩ‑cɩrɩ ńga-dɛ́ɛ yíko gɛ. Bɩlɛ́ bibaasí, ɖééɖéézi sɩsɩ wentí ɖénveerím mɩ́ɩ nɛ́ kɛ́ɛ toovonúm. Mɩ́dɛ́ɛ kazɔ́ɔ-rɔ, mɩ́nyɩ nŋɩ́nɩ́ ɖɔ́ɔ́jɔ́ɔ́ná mɩ́lɔ́wʊ́táá nɛ́. 6 Míívú ɖɔ́nʊvɔ́-daá, ifu Ɖádʊ́ʊ nʊvɔ́-daá. Na bɩrɩ́ŋa mɩ́ɩ́bá mɩ́wɛ fúkúḿsi-daá nɛ́, míídísi Ɩsɔ́ɔ-dɛ́ɛ tɔ́m na Kezeŋa Ɖacɩrɩ‑cɩrɩ ńga-dɛ́ɛ wenbi‑niíni. 7 Biiyéle mɩ́ɩ́bɩ́sɩ wenbá Masedʊwáanɩ-daá yaraɖá-dɩnáa na Akayíi tɛ́ɛ́dɩ-daá yaraɖá-dɩnáa wɛ́nbɛɛŋnáa nɛ́. 8 Káma, Ɖádʊ́ʊ-dɛ́ɛ tɔ́m waalɩ́ɩ mɩ́dɛ́ɛ nɛ́, bɩdɛkɛ́ɛ Masedʊwáanɩ na Akayíi riké gɛ tiibó, amá, baanɩ́ɩ mɩ́dɛ́ɛ mɩ́ɩ́vá Ɩsɔ́ɔ toovonúm nɛ́ tɛ́nɩ báa lé, hálɩ biigúti bɩvɛ́yɩ́ sɩsɩ ɖɩŋmátɩ. 9 Ɩráa wánŋmatɩ́ ɖɔ́dɔ́m nɛ́, bánŋmatɩ́ nŋɩ́nɩ́ mɩ́ɩ́mʊ́ ɖáa ɩgɔ́ńdɩ sáátɩ wenkí ɖóóbó mɩ́jɔ́ nɛ́, na nŋɩ́nɩ́ mɩ́ɩ́lá túúbá ifu Ɩsɔ́ɔ, ikízi lɩzásɩ ɩlá ɩmʊ́ Ɩsɔ́ɔ weezuú-dʊ́ʊ na toovonúm ńnɩ́ bɔwʊtá nɛ́. 10 Mɩ́ɖamáa sɩsɩ Ibiyaalʊ́ Yeésu ɩlɩ́ɩ ɩsɔ́ɔ́dáá ɩkɔ́nɩ. Ɩmʊ́ weení Ɩsɔ́ɔ weevéézi yɩ ɩlɩ́ɩ ɩsɩɖáa-daá nɛ́, wánlɩzɩ́ɩ kʊ ɖáa tɔ́m fʊ́ʊ́dɩ wɩ́rɛ ɖɩgɛgɛrɛŋɛ nɛ́ ɖɩdaá.