Ɩsɔ́ɔ-dɛ́ɛ Tɔ́m Tákaraɖá 2 TESALONÍIKI ŃBA 1

Wasɩ́ɩ́ka sɩɩlɛ ńga Pɔ́ɔlɩ waaŋmáa kɛ

2 Tesaloníiki

ńba nɛ́

Naanɩ́ na ɖɩbáázɩ nɛ́

Tɔ́mwá tɩvʊnɖɔ́kɩná Tesaloníiki ńba, ngɛ Pɔ́ɔlɩ waalɩzɩ́ wɛ tugutoluú wasɩ́ɩ́ka kaɖaa ńga-daá nɛ́, tɩdaá natɩ́rɩ-rɔ gɛ waadákabɩsɩ wasɩ́ɩ́ka sɩɩlɛ ńga kana kadaá; tɩlɛ́ gɛ Ɖádʊ́ʊ Yeésu Krísto-dɛ́ɛ sɩ ɩkɔ́nɩ nɛ́-dɛ́ɛ tɔ́m. Wenbí bʊrɔɔzɩ́ nɛ́, tɔ́m tɩḿ tɩdɛɛzɩwɛ tɩ́nɖʊ́ʊ Tesaloníiki ńba túrú‑túrú. Káma, badaá nɛbɛ́rɛ wánwɩlɩ́ɩ sɩsɩ wɩ́rɛ ɖɩḿ ɖɩ́ńdálɩ́. Nɛbɛ́rɛ bɛlɛ́ bekízi tɩmɛ́rɛ lám, káma, bɛbɛɛ́na sɩsɩ bɩdɛfɛ́yɩ́na fɔ́ɔ́zɩrɛ sɩsɩ ɩrʊ́ ɩlá tɩmɛ́rɛ, wenbí bʊrɔ nɛ́, bɩdɛkɛ́ɛ sɩ bukúti bilééri na wɩ́rɛ ɖɩḿ ɖɩtála.

Biiyéle wasɩ́ɩ́ka sɩɩlɛ ńga kana kadaá nɛ́, Pɔ́ɔlɩ waabá ɩŋmatɩná wɛ páá tɔ́m tɩḿ tɩrɔ. Weevééri wɛ wenbíwá bɩ́nbɩɩzɩ́ bɩkɔ́nɩ naanɩ́ bɩtála wɩ́rɛ ɖɩḿ nɛ́. Ngɛ waagbáázɩ wɛ ɖóni sɩsɩ bákanɩɩná wenbá bɔ́ngɔnɩ́ bénveerím wɛ natɩ́rɩ tɩ́na tɩndɩ na wentí bɛḿ badɩtɩŋa beevééri wɛ nɛ́. Bɛdɛ́ɛ baɖamáa Ɖádʊ́ʊ-dɛ́ɛ kɔnɩ́ nɛ́, tɔmɔɔná bɩtɔ wɛ nɩ́bááwʊ sɩsɩ bákalá wɩ́rɛ báa wenɖé-dɛ́ɛ tɩmɛ́rɛ.

Pɔ́ɔlɩ wɛ́nzɛɛ́ wenbá wánŋmaá wɛ wasɩ́ɩ́ka nɛ́

1 Mɔ́ɔ́ Pɔ́ɔlɩ, mána Siláasɩ na Timotée ɖánŋmaa kʊ mɩ́ɩ Ɖájaa Ɩsɔ́ɔ-dɛ́ɛ Koduuziya kovóo Ɖádʊ́ʊ Yeésu Krísto bɩka kɔwɛ Tesaloníiki tɛ́ɛ́dɩ-daá nɛ́ wasɩ́ɩ́ka kana. 2 Ɖájaa Ɩsɔ́ɔ na Ɖádʊ́ʊ Yeésu Krísto báɖʊ́ mɩ́ɩ alɩbáráka bɩka bafa mɩ́ɩ fɛɛzɩrɛ.

Pɔ́ɔlɩ wánzám Tesaloníiki ńba-dɛ́ɛ konkárɩ́

3 Koobíya, bɩ́nbɔɔzɩ́ sɩsɩ ɖɩlɔɔná Ɩsɔ́ɔ kɩzɛɛwʊ sɛɛ́ mɩ́rɔ́ɔ́zɩ́, ngɛ bɩlɛ́ bɩzɩɩzɛ́ɛ na, káma, mɩ́dɛ́ɛ yɩ toovonúm fáa bamáa caarɩ́, bɩka mɩ́rɩ́ŋa mɩ́dɛ́ɛ ɖamá sɔɔlɩ́m ɩbá bɩbamáa bɩɩ́. 4 Biiyéle Ɩsɔ́ɔ-dɛ́ɛ Koduuzísi sɩɩganáa ɩzá-daá, ɖáábá ɖánvaarɩnáa mɩ́ɩ. Káma, na bɩrɩ́ŋa mɩ́nnáa naazɩrɛ na wahálawá nɛ́, mɩ́zɩ́ŋɛ́ɛ ná Ɖádʊ́ʊ na toovonúm, bɩka mɩ́dɛ́ɛ yaraɖá ɩbá bɩjaarɛ́ɛ.

5 Bɩlɛ́ bɩ́nwɩlɩ́ɩ kʊ sɩsɩ nŋɩ́nɩ́ Ɩsɔ́ɔ sɩ ɩkɔ́nɩ ɩkávʊ́ʊ́ná ɩráa tɔ́m nɛ́ sɩɩzɛ́ɛ. Káma, wahálawá mɩ́nnáa tɩ ɖɔ́ nɛ́, wénÿelíi kʊ na Ɩsɔ́ɔ ɩtɔ́ sɩsɩ mɩ́ɩ́dála ɩsʊ́ʊ ɩdɛ́ɛ kowúrɔ́ɔ wenká kɔrɔ bánnaazɩ́ mɩ́ɩ nɛ́ kadaá. 6 Káma, Ɩsɔ́ɔ wánlám wenbí bɩzɩɩzɛ́ɛ nɛ́ gɛ. Wénÿelíi wenbá bánnaazɩ́ mɩ́ɩ nɛ́ bɔkɔ́nɩ bakáná wahála. 7 Bɩka mɩ́nyɔ́ɔ́ wenbá mɩ́nnáa wahála nɛ́, Ɩsɔ́ɔ wénÿelíi ɩfɛ́ɛ́zɩ ɖána mɩ́ɩ sáátɩ wenkí Ɖádʊ́ʊ Yeésu sɩ ɩkálɩɩ ɩsɔ́ɔ́dáá ɩkɔ́nɩ ɩ́gana ɩdɛ́ɛ malááyɩ́kawá ɖóni ńba nɛ́. 8 Nimíni kʊ́bɔnɩ́-daá gɛ sɩ ɩkɔnɩ ná, na ɩfɔ́ wenbá baasɩ Ɩsɔ́ɔ nɛ́ banɩgbamʊʊ́, bána wenbá bódónvúu Ɖádʊ́ʊ Yeésu-dɛ́ɛ Laabáárʊ Kífeńgi nɛ́. 9 Nɩgbamʊʊ́ fɔ́m wenkí sɩ bana kɩ nɛ́ gɛ sɩsɩ bánlaanáa wɛ nuudí bɩlɛ́ bogúti bɛvɛ́yɩ́ sɩ bakʊrʊ́ kɛtɛngɛrɛ. Bánlanáa Ɖádʊ́ʊ bolíni, balaná ɩdɛ́ɛ yíko-dɛ́ɛ ásícé bolíni. 10 Sáátɩ wenkí Ɖádʊ́ʊ sɩ ɩkɔ́nɩ nɛ́ gɛ bɩlɛ́ bɩrɩ́ŋa sɩ bɩlá. Bɩwɩ́rɛ ɖɩḿ wɔ́ngɔnɩ́ nɛ́, wenbá waada ɩlɩzɩ́ wɛ ɩsɩ́ɩ ɩdɩ nɛ́ bánzám yɩ, bɩka wenbá baalá yɩ yaraɖá nɛ́, bánnáa yɩ bocotiná yɩ. Mɩ́wɛ ɩráa bɛḿ badaá, káma, mɩ́ɩ́vá seríya wenkí ɖáálɩ́zɩ́ kɩ nɛ́, toovonúm.

11 Bɩlɛ́ bʊrɔ gɛ báa sáátɩ wenkí, ɖánzʊlʊ́ʊ Ɩsɔ́ɔ mɩ́rɔ́ɔ́zɩ́ sɩsɩ ɩ́ná sɩsɩ mɩ́jɔɔ́na cɔwʊrɛ wenɖé waayáa mɩ́ɩ sɩsɩ ɩ́cɔ́ɔ́ná nɛ́. Ɩ́sɩ́ná mɩ́ɩ na ɩdɛ́ɛ yíko, na ɩbɩ́ɩ́zɩ ɩlá kazɔ́ɔ ńbɩ wenbí bɩrɩ́ŋa mɩ́zɔɔlɛ́ɛ lám nɛ́; bɩka ɩfa mɩ́ɩ ɖóni ɩlá bɩ, wenbí bʊrɔ nɛ́, mɩ́ɩ́vá Yeésu toovonúm. 12 Bɩlɛ́ nɛ́, mɩ́rɔ́ɔ́zɩ́, ɩráa wɔ́nɖɔɔzɩ́ Ɖádʊ́ʊ Yeésu-dɛ́ɛ yɩ́ɖɛ, bɩka ɩlɛ́ ɖʊɖɔ iyéle basá mɩ́ɩ. Bɩrɩ́ŋa bɩlɛ́ bɩgɛ́ɛ Ɩsɔ́ɔ na Ɖádʊ́ʊ Yeésu Krísto bɛdɛ́ɛ kʊjɔɔwʊ gɛ.