Wasɩ́ɩ́ka baaŋmáa kɛ
Éburu
ńba nɛ́
Naanɩ́ na ɖɩbáázɩ nɛ́
Wasɩ́ɩ́ka kana nɛ́, badaɖʊ weení waaŋmáa kɛ nɛ́ ɩdɛ́ɛ yɩ́ɖɛ. Amá, Krísto ńba wenbá baabá bánnáa kʊnyɔḿ páá bɛdɛ́ɛ baava Yeésu Krísto toovonúm-rɔ nɛ́ gɛ baaŋmáa kɛ.
Weení waaŋmáa kɛ nɛ́, wánwɩlɩ́ɩ sɩsɩ Krísto ńba bɛḿ nɛ́, wahálawá bánnáa tɩ nɛ́ wɛɛjɛzɩ́ na seríya, hálɩ bɩjɔɔ́ɔ wɛ nyazɩ beyéle Krísto-dɛ́ɛ nɩ́bááwʊ fúu bɩka babɩ́sɩ bofu Yahúúɖuwá-dɛ́ɛ aɖííni. Bɩlɛ́ bʊrɔ gɛ waaŋmáa wɛ sɩ ɩkpáázɩ wɛ ɖóni na babɩ́ɩ́zɩ bɔɖɔ́kɩ toovonúm baava Yeésu Krísto nɛ́.
Wánɖʊ́ʊ wɛ tɔ́m nɛ́, waawɩ́lɩ wɛ nŋɩ́nɩ́ Krísto-dɛ́ɛ kʊ́bɔńdɩ fɛ́yɩ́na tɩdaká nɛ́. Wɛɛgɛ́ɛ́zɩ wɛ nŋɩ́nɩ́ bɩɩlá gɛ Krísto waagɩ́lɩ anɖébiwá, ɩkɩ́lɩ malááyɩ́kawá, bɩkpɛdɩ́na Múúsá na Yohósuwa nɛ́.
Waawɩ́lɩ ɖʊɖɔ sɩsɩ Krísto kɛ́ɛ sarásɩ lanɖáa rɩ́ŋa-dɛ́ɛ kʊ́bɔnɩ́ gɛ, bɩka sarɔ́ɔ kʊ́ɖʊmɔ́ɔ kóŋ́ waalá kɛ kʊ́ɖʊńbɩ lám bɩcáŋ bɩtɛ́ nɛ́, waagɩ́lɩ sarásɩ tuutúúma bánvʊnlám sɩ caanawʊ́ nɛ́.
Tɩlɛ́ tɩbaasí, weení waaŋmáa wasɩ́ɩ́ka kana nɛ́, wénveerím Krísto ńba sɩsɩ bɛ́bɛ́ɛ́ŋná Keɖiyá Kɩ́bɩńga-dɛ́ɛ ɩráa wenbá baava Ɩsɔ́ɔ toovonúm páá nɛ́, bɩka banʊ́ŋ bɛlɛ́ banʊvɔ́-daá. Wénveerím wɛ sɩsɩ báɖʊ́ balaakáarɩ rɩ́ŋa Yeésu Krísto-rɔ, na babɩ́ɩ́zɩ bɔɖɔ́kɩ badɩ wahála-daá ńŋɩnáa ɩlɛ́ waalá nɛ́.
1
Lɛlɛɛɖɔ́ Ɩsɔ́ɔ waaŋmatɩná ɖáa na Ibiyaalʊ́
1 Ɖoo nɛ́, Ɩsɔ́ɔ waalaaná anɖébiwá banáa yáásɩ́wá ndɩ‑ndɩ-daá ɩŋmatɩná ɖájaájaanáa.
2 Amá, lɛlɛɛɖɔ́, wɛ́ kɛdɛɛzɩya ńná ana adaá nɛ́, waaŋmatɩná ɖáa na Ibiyaalʊ́. Biyaalʊ́ʊ ɩmʊ́ gɛ Ɩsɔ́ɔ waabaná ɩlá ɖúúlínya, ɩnáábɩ́lɛ́ weejéle bɩrɩ́ŋa sɩsɩ bɩ́bɩsɩ ɩdɛ́ɛ ńbɩ.
3 Biyaalʊ́ʊ ɩmʊ́ ɩrɔ gɛ bánnáa Ɩsɔ́ɔ-dɛ́ɛ ásícé, wenbí ɩjɔɔ́ɔ nɛ́, bɩlɛ́ nɔ́ɔ́ ɖʊɖɔ gɛ Ɩsɔ́ɔ cɔɔ́ɔ. Ɩnɔɔ́-daá tɔ́m wɛná yíko gɛ, bɩka tɩnáábɩ́lɛ́ ɩɖɔ́kɩná na ɖúúlínya. Waayáálɩ ɩráa bɛdɛ́ɛ alaháácɩ́wá, ɩlá wɛ ɖacɩrɩ‑cɩrɩ bɩtɛ́ nɛ́, waagba ɩsɔ́ɔ́dáá ɩcɔ́ɔ yíko-dʊ́ʊ-dɛ́ɛ kíɖiiwú-rɔ.
4 Biiyéle wɛɛjɛzɩ́ malááyɩ́kawá, ngɛ Ɩsɔ́ɔ waava yɩ yɩ́ɖɛ ɖɩɩgɩ́lɩ bɛdɛ́ɛ ńɖɛ nɛ́.
5 Káma, malááyɩ́kawá-daá, weení gɛ kɛtɛngɛrɛ Ɩsɔ́ɔ wɔɔdɔ́ sɩsɩ:
«Nyɔ́ɔ́ gɛ Mebiyaalʊ́,
kpɔɔná sinje, mɔ́ɔ́ gɛ Njaa.»
Malááyɩ́kawá-daá weení gɛ kɛtɛngɛrɛ wɔɔdɔ́tɔḿ ɖʊɖɔ sɩsɩ:
«Mánbɩsɩ́ yɩ Caáwʊ,
bɩka ɩmʊ́ ɩbɩ́sɩ ma Biyaalʊ́ʊ.»
6 Amá, sáátɩ wenkí sɩ ɩkɔ́gɔ́ná Biyaalʊ́ʊ kaɖaa ńnɩ́ ɖúúlínya-daá nɛ́, wɔɔdɔ́ gɛ sɩsɩ:
«Ɩsɔ́ɔ-dɛ́ɛ malááyɩ́kawá rɩ́ŋa íkuu yɩ tɛ́ɛ́dɩ.»
7 Amá, Ɩsɔ́ɔ wánŋmatɩ́ malááyɩ́kawá-dɛ́ɛ tɔ́m nɛ́, wɔɔdɔ́ gɛ sɩsɩ:
«Wánlanáa ɩdɛ́ɛ malááyɩ́kawá nyazɩ fefelimá, bɩka
wánlanáa ɩdɛ́ɛ bɔwʊtá-dɩnáa nyazɩ nimidʊlʊʊ́.»
8 Amá, wánŋmatɩ́ Biyaalʊ́ʊ-dɛ́ɛ tɔ́m nɛ́, wɔɔdɔ́ gɛ sɩsɩ:
«Ɩsɔ́ɔ, nyógowúrɔ́ɔ fɛ́yɩ́na tɛ́m kɛtɛngɛrɛ.
Nyɛ́dɛ́ɛ kowúrátɩ ɖíi-daá, wenbí bɩzɩɩzɛ́ɛ nɛ́ gɛ nyánlám.
9 Nyɔ́zɔɔlɛ́ɛ wenbí bɩzɩɩzɛ́ɛ nɛ́, bɩka ńdánjaa kidaavééníti;
Ɩsɔ́ɔ, bʊrɔ gɛ nyɛ́dɛ́ɛ Ɩsɔ́ɔ waada ɩlɩzɩ́ nya,
ɩtáa nyágʊjʊʊ́ jíńgáárɩ́ núm,
ngɛ wɔɔzɔ́ɔ́lɩ nyɔ́dɔ́m bɩkɩ́lɩ nɖɔndɩnáa.»
10 Wɔɔdɔ́ ɖʊɖɔ sɩsɩ:
«Mádʊ́ʊ Ɩsɔ́ɔ, ɖoo bɩgabaazɩya, nyɔ́ɔ́ nyóózúu ná ɖúúlínya;
nyáálá ná ɩsɔ́ɔ́dáá.
11 Bɩlɛ́ bɩrɩ́ŋa ɖɔ́ bɩ́ngɔnɩ́ bɩtɛlɛ́ŋ; amá, nyɔ́ɔ́ nyɔ́wɛ gɛ.
Ńŋɩnáa tóko wánzɩ́m nɛ́, bɩlɛ́ gɛ bɩrɩ́ŋa sɩ bɩkɔ́nɩ bɩsɩ́.
12 Ńŋɩnáa bóngoodí baramáásʊ́ nɛ́, bɩlɛ́ gɛ sɩ ngóódi bɩ;
bɩrɩ́ŋa bɩ́ngɔnɩ́ bɩkɛ́ɛ ńŋɩnáa bɛ́ngɛɛ́ tóko nɛ́.
Amá, nyɔ́ɔ́, wenbí nyɔ́jɔɔ́ɔ nɛ́, bɩlɛ́ gɛ sɩ njɔ́ɔ, bɩka nyéweezuú fɛ́yɩ́ kɩ́ndɛ́m kɛtɛngɛrɛ.»
13 Kɛtɛngɛrɛ malááyɩ́kawá-daá, weení gɛ Ɩsɔ́ɔ wɔɔdɔ́ sɩsɩ:
«Cɔɔ mégíɖíiwú-rɔ,
hálɩ maɖʊ nbáɖaanáa
nyɔ́nʊvɔ́-dɛ.»
14 Malááyɩ́kawá nɛ́, we gɛ bɛgɛ́ɛ. Bɩdɛkɛ́ɛ Ɩsɔ́ɔ-dɛ́ɛ tɩndɩnáa bádánnáa wɛ, bɩka bánlám Ɩsɔ́ɔ bɔwʊtá nɛ́ gɛ bɛgɛ́ɛ? Ɩsɔ́ɔ wéndiríi wɛ gɛ bɛ́nɖɛɛ́ bángazɩnáa wenbá bɩmɔɔ́na boyuú lɛ́ɛ́dɩ nɛ́.