Ɩsɔ́ɔ-dɛ́ɛ Tɔ́m Tákaraɖá YƱHÁÁNƖ 1

Wasɩ́ɩ́ka kaɖaa ńga

1 Yʊháánɩ

waaŋmáa kɛ nɛ́

Naanɩ́ na ɖɩbáázɩ nɛ́

Ɖádʊ́ʊ Yeésu Krísto-dɛ́ɛ Laabáárʊ Kífeńgi Yʊháánɩ waaŋmáa kɩ nɛ́ kɩbaasí, woogúti ɩŋmáa wasɩ́ɩ́kawá nasúdoozo ɖʊɖɔ ɩtásɩ. Wasɩ́ɩ́kawá sɩḿ sidoozóóní sɩdaá, kaɖaa ńga kana kaaba ná kɔɖɔ́ɔ. Tidoozóóní tɩdaá, ɩdaŋmáa ɩyɩ́ɖɛ sɩsɩ ɩmʊ́ Yʊháánɩ wánŋmaa kʊ. Amá, nŋɩ́nɩ́ ŋmatɩrɛ wónboɖé nɛ́, weeyele ná batɩlɩ́ sɩsɩ waaŋmaa ná. Tɔ́m nabʊ́lɛ wɔɔɖɔkɩ ná ɩlaakáarɩ gɛ waaŋmáa tɩ.

Kaɖaa-dɛ́ɛ, Yʊháánɩ wánɖʊ́ʊ wenbá waaŋmáa wɛ nɛ́ tɔ́m sɩsɩ bána Ɩsɔ́ɔ na Ibiyaalʊ́ Yeésu Krísto baalá kʊ́ɖʊḿ nɛ́, bába bɔɖɔ́kɩ bɩlɛ́ bɩka bɔzɔɔlɛ́ɛ ɖamá. Bɛdɛ́ɛ ɖamá sɔɔlɩ́m sɩ ɩwɩlɩ ná sɩsɩ bɔwɛ Ɩsɔ́ɔ-dɛ́ɛ nɩ́bááwʊ-daá.

Sɩɩlɛ-dɛ́ɛ nɛ́, Yʊháánɩ wónÿoó tɔ́m kɩ́fatɩ ɩráa nɛbɛ́rɛ waabáázɩ koobíya wɩlɩ́ɩ tɩgɛ́ɛ bʊbɔ́tɩ bɩka tɩ́ndɛlɛ́sɩ ɩrʊ́ nɛ́. Ɩráa bɛḿ bavʊngɛ́ɛ Krísto ńba ɖʊɖɔ gɛ, ngɛ lɛlɛɛɖɔ́ nɛ́ boogúti basʊ́ʊ bánwɩlɩ́ɩ koobíya tɔ́m tɩ́na tɩndɩ na wentí baavʊ́ńwɩlɩ́ wɛ nɛ́; bɛ́nbɛlɩ́ɩ koobíya bʊbɔ́tɩ. Ɩsɔ́ɔ-dɛ́ɛ Tɔ́m Tákaraɖá wɔɔdɔ́ sɩsɩ Yeésu Krísto kɛ́ɛ Ɩsɔ́ɔ, wɔɔgbɔ́ɔ ɩrʊ́-dɛ́ɛ tɔnʊʊ́ ɩbɩ́sɩ ɩrʊ́ ɩkɔ́nɩ ɖúúlínya-daá nɛ́, bɛḿ bɔ́njɔɔlɩ́ sɩsɩ bɩdɛkɛ́ɛ bɩlɛ́.

Ŋmatɩrɛ ɖɩ́nváa weezuú nɛ́

1 Ŋmatɩrɛ ɖɩ́nváa weezuú nɛ́-dɛ́ɛ tɔ́m gɛ ɖánŋmaá mɩ́ɩ. Ŋmatɩrɛ ɖɩḿ, ɖoo bɩgabaazɩya gɛ ɖɩvʊnwɛ; ɖééwélési ɖɛ, ɖááná ɖɛ na ɖáázá, ɖɛ́ɛ́bɛ́ɛ́ŋ ɖɛ, bɩka ɖánʊ́ʊ́zɩ itekiná ɖɛ. 2 Ngɛ weezuú waabɩ́sɩ ɩrʊ́ ɖɩna yɩ na ɖáázá, ɖázɩ́ŋɛ́ɛ bɩdɛ́ɛ seríya. Bʊrɔɔzɩ́ gɛ ɖénveerím mɩ́ɩ weezuú kɩ́dɛ́ndɛŋ́ nɛ́-dɛ́ɛ tɔ́m. Ɩsɔ́ɔ Caáwʊ-jɔ́ gɛ kɩvʊnwɛ, ngɛ kɩɩbɩ́sɩ ɩrʊ́ ɖɩna yɩ na ɖáázá. 3 Wenbí ɖááná bɩ bɩka ɖiwélesi bɩ nɛ́-dɛ́ɛ tɔ́m gɛ ɖénveerím mɩ́nyɔ́ɔ́ ɖʊɖɔ, na ɖána mɩ́ɩ ɖiyóózi ɖɩlá kʊ́ɖʊḿ. Ngʊ́ ɖɔ́ɔ́ nɛ́, ɖána Caáwʊ na Ibiyaalʊ́ Yeésu Krísto ɖóóyóózi ná ɖɩlá kʊ́ɖʊḿ. 4 Na ɖána mɩ́ɩ ɖɛ́dɛ́ɛ wenbi‑niíni ɩbá bisúlúki-rɔ gɛ ɖánŋmaá mɩ́ɩ tɩna tɩrɩ́ŋa ɖɔ́.

Ɩsɔ́ɔ kɛ́ɛ ɖɛnyɛm

5 Tɔ́m ɖáánɩ́ɩ tɩ Yeésu Krísto-jɔ́, ngɛ ɖénveerím mɩ́ɩ tɩ nɛ́ gɛ sɩsɩ Ɩsɔ́ɔ kɛ́ɛ ɖɛnyɛm gɛ, bɩka nabʊ́rʊ fɛ́yɩ́ ɩrɔ bɩgɛ́ɛ temenuú nɛ́. 6 Bʊrɔɔzɩ́ nɛ́, a ɖɔ́ndɔ́m sɩsɩ ɖáálá kʊ́ɖʊḿ ɖána Ɩsɔ́ɔ, bɩka ɖánnʊŋ́ temenuú-daá, bɩlɛ́ nɛ́, ɖɛ́gɛ́ɛ bʊbɔtɩnáa nbɩlɛ́, bɩka ɖáraavóo toovonúm. 7 Amá, a ɖánnʊŋ́ ɖɛnyɛm-daá nyazɩ wenbí ɩmʊ́ Ɩsɔ́ɔ ɩdɩtɩŋa ɩwɛ ɖɛnyɛm-daá nɛ́, ńna nɛ́, ɖériké-ɖériké ɖáálá kʊ́ɖʊḿ nbɩlɛ́, bɩka Ibiyaalʊ́ Yeésu Krísto-dɛ́ɛ azimá wánlɩzɩ́ɩ alaháácɩ́ báa wenkí ɖɔ́rɔ́ ɖɩlá ɖacɩrɩ‑cɩrɩ Ɩsɔ́ɔ ɩzá-daá.

8 A ɖɔ́ndɔ́m sɩsɩ ɖɛ́vɛ́yɩ́na alaháácɩ́, ɖádɩtɩŋa ɖɛ́nbɛlɩ́ɩ ɖádɩ bʊbɔ́tɩ nbɩlɛ́, bɩka ɖáásɩ wenbí bɩgɛ́ɛ toovonúm Ɩsɔ́ɔ waalɩzɩ́ ɩwɩ́lɩ nɛ́. 9 Amá, a ɖéévééri Ɩsɔ́ɔ ɖɛ́dɛ́ɛ alaháácɩ́wá, ɩlɛ́ ɩzɩɩzɛ́ɛ gɛ, bɩka ɩ́dánlɩɩ ɩdɔ́m wɔ́rɔ́, wɛ́njɛ́m ɖáa tɩ bɩka ɩlɩzɩ́ wenbí bɩrɩ́ŋa bɩdakazɔ́ɔ nɛ́ ɖɔ́rɔ́, ɖɩlá ɖacɩrɩ‑cɩrɩ waazá-daá. 10 A ɖɔ́ndɔ́m sɩsɩ ɖádálá alaháácɩ́, ɖááyáa Ɩsɔ́ɔ bʊbɔtʊ́ʊ nbɩlɛ́, bɩka ɖʊɖɔ ɖádámʊ́ ɩdɛ́ɛ tɔ́m ɖitísi.