13
Ɖɩ́fʊʊzɩ ɖádɩ Laadɔ́ɔ-dɛ́ɛ nɩ́baadɛɛráa-dɛɛzɩ́
Báa weení mɔɔ́na ɩfʊ́ʊ́zɩ ɩdɩ nɩ́baadɛɛráa baazɩ́ɩ wɛ bánlám tɩmɛ́rɛ nɛ́ bɛdɛɛzɩ́. Káma, yíko nakɩ́rɩ fɛ́yɩ́ kɩdalɩɩná Ɩsɔ́ɔ-jɔ́ nɛ́, ngɛ wenbá bɔwɛ bánlám tɩmɛ́rɛ ɖɔ́ nɛ́, Ɩsɔ́ɔ waazɩɩ ná wɛ. Bɩlɛ́ nɛ́, weení wángʊrʊ́ʊna nɩ́baadɛɛráa nɛ́, wenbí Ɩsɔ́ɔ bɛɛ́na sɩsɩ bɩzɩɩzɛ́ɛ ngɛ waazɩ́ɩ nɛ́ gɛ wángʊrʊ́ʊna bɩlɛ́. Ngɛ wenbá béngizíi bádánnɩɩná wɛ nɛ́, badɩtɩŋa bánjáádɩ kʊ bɛdɛ́ɛ nɩgbamʊʊ́ narɩ́ɩ. Káma, a bɩgɛ́ɛ sɩsɩ ɩrʊ́ wánlám kazɔ́ɔ, ɩ́dánnɩɩ nɩ́baadɛɛráa-dɛ́ɛ nɩdáárɛ, asée wánlám bɩdaavé. A nyɔ́ɔ́ ńdánjaa nɩ́baadɛɛráa ɩlá nya nɩdáárɛ, bɩlɛ́ nɛ́, la kífeńbi na basá nya. Káma, tɩmɛ́rɛ Ɩsɔ́ɔ waaɖʊ wɛ nɛ́ gɛ bánlám, na bɩsɩná nya nlá kazɔ́ɔ. Amá, a nyánlám kidaavééníti, nɩɩ banɩdáárɛ, káma, bɩdɛkɛ́ɛ yéḿ-rɔ gɛ bɔwɛná nɩgbamʊʊ́ fɔ́m-dɛ́ɛ yíko. A bɔ́nvɔ́m weení waalá bɩdaavé nɛ́ ɩnɩgbamʊʊ́, Ɩsɔ́ɔ-dɛ́ɛ tɩmɛ́rɛ gɛ bánlám, na bawɩ́lɩ bɩdɛ́ɛ ɩrʊ́ Ɩsɔ́ɔ-dɛ́ɛ baaná. Bʊrɔ gɛ bɩ́nbɔɔzɩ́ sɩsɩ ɖɩ́fʊʊzɩ ɖádɩ ɖɩnɩɩná wɛ; bɩdɛkɛ́ɛ sɩ na Ɩsɔ́ɔ-dɛ́ɛ baaná íketí ɖɔ́rɔ́ riké-rɔɔzɩ́, amá, ɖádɩtɩŋa ɖányɩ sɩsɩ bɩlɛ́ bɩjɔɔ́ɔ na kazɔ́ɔ nɛ́-rɔɔzɩ́ ɖʊɖɔ gɛ.
Bʊrɔɔzɩ́ ɖʊɖɔ gɛ mɩ́nvɛrɩ́ɩ lanpóowá. Káma, tɩmɛlanɖáa wenbá bɔ́nbɔɔzɩ́ lanpóo nɛ́, Ɩsɔ́ɔ waaɖʊ ná wɛ sɩsɩ bála tɩmɛ́rɛ ɖɩḿ kazɔ́ɔ. Ijéle báa weení wenbí bɩ́nbɔɔzɩ́ sɩsɩ ícéle yɩ nɛ́. A lanpóo gɛ bɩ́nbɔɔzɩ́ sɩsɩ ɩfɛ́rɛ, ɩvɛ́rɛ kɩ; a tikée gɛ sɩ ɩmʊ, ɩmʊ kɩ; a gírímá gɛ bɩ́nbɔɔzɩ́ sɩsɩ ɩɖʊ ɩrʊ́, ɩɖʊ yɩ kɩ; a ɖɔɔzɩ́tɩ gɛ sɩsɩ ɩɖɔ́ɔ́zɩ weení nɛ́, ɩɖɔ́ɔ́zɩ yɩ.
Múúsá-dɛ́ɛ Mará rɩ́ŋa kutoluú wɛ sɔɔlɩ́m-daá gɛ
Íkeɖi naárʊ kɩmɛ́rɛ, kɩmɛ́rɛ wenɖé mɩ́mɔɔ́na iɖi mɩ́ránáa nɛ́ gɛ sɩsɩ ɩ́sɔɔlɩ ɖamá. Káma, weení ɩzɔɔlɛ́ɛ ɩranáa nɛ́ waalá wenbí bɩrɩ́ŋa Múúsá-dɛ́ɛ Mará wɔɔbɔ́ɔ́zɩ nɛ́. Káma, tɔ́mwá Múúsá-dɛ́ɛ Mará waazɩ́ɩ́zɩ tɩ nɛ́, bɛɛ: «Nkalɩ́ɩ nɖɛɛlʊ́ yáá nwaalʊ́ wɔ́rɔ́, nkakʊ ɩrʊ́, nkaŋmɩ́ɩ́lɩ, nkaɖʊ ɩzɩ́rɛ wenbí nyáraadɩ bɩ nɛ́ bʊrɔ,» na tɩɩganáa rɩ́ŋa kadamáa na tɔ́m kʊ́ɖʊńtɩ tɩna gɛ, tɩlɛ́ gɛ sɩsɩ: «Sɔɔlɩ nyɔ́rɔwʊ́ nyazɩ nyádɩtɩŋa.» 10 Weení ɩzɔɔlɛ́ɛ ɩrɔwʊ́ nɛ́, tánlaḿ yɩ wenbí bɩdaavé nɛ́. Bɩlɛ́ nɛ́, a nyɔ́zɔɔlɛ́ɛ nyɔ́rɔwʊ́ nyáálá wenbí bɩrɩ́ŋa Múúsá-dɛ́ɛ Mará wɔ́nbɔɔzɩ́ nɛ́ nbɩlɛ́.
Krísto sɩ ɩkɔ́nɩ nɛ́, ɩ́mɔ́ɔ́ná ɖáa ɖáńgbɩɩrɩ
11 Bɩlɛ́ nɛ́, ɩjáárɩ mɩ́dɩ mɩ́nlám bɩlɛ́, káma, mɩ́nyɩ alɩwáátɩ ɖɔ́wɛ kɩdaá nɛ́. Bɩɩdála sɩsɩ ɩkʊrʊ́ ɖóm-rɔ. Káma, lɛ́ɛ́dɩ waabá bɩcʊʊná ɖáa lɛlɛɛɖɔ́ bɩkɩ́lɩ ɖɛ́dɛ́ɛ kabaazɩya ɖáává Yeésu Krísto toovonúm nɛ́. 12 Nuvoowú wɛ́nɖɛɛ́ tɛ́m nbɩlɛ́, tɛ́ɛ́wʊ waajʊ́ʊ fém. Bɩlɛ́ nɛ́, ɖíyele temenuú-daá-dɛ́ɛ lakásɩ bɩka ɖɩkpɔ́ɔ ɖɛnyɛm-daá yoogbɩná ɖusúu. 13 Ɖɩ́cɔɔ cɔwʊrɛ kífeńɖe ńŋɩnáa wenbí bɩ́nbɔɔzɩ́ sɩsɩ ɩrʊ́ ɩcɔ́ɔ ɖɛnyɛm-daá nɛ́. Ɖɩ́la laakáarɩ na ɖíi na nyɔ́ɔ́dɩ ɖabata, ɖíyele wásangarɩ́tɩ na tɩtɛ lakásɩ; ɖiyéle yóóni na sʊ́ʊ́zɩ. 14 Ɖádʊ́ʊ Yeésu Krísto-dɛ́ɛ cɔwʊrɛ ɩ́bɩsɩ mɩ́ɩ mígúsúúdi. Ɩ́kalá wenbí mílówú fáa bɩ nɛ́ ɩkʊ ná mɩ́dɛ́ɛ kɔɖɛyɩ́wá.