Ɩsɔ́ɔ-dɛ́ɛ Tɔ́m Tákaraɖá 1 TIMOTÉE 1

Wasɩ́ɩ́ka kaɖaa ńga Pɔ́ɔlɩ waaŋmáa kɛ

1 Timotée

nɛ́

Naanɩ́ na ɖɩbáázɩ nɛ́

Pɔ́ɔlɩ-dɛ́ɛ wasɩ́ɩ́kawá ɖabata waaŋmáa tɩ nɛ́, Krísto-dɛ́ɛ Koduuzísi sɩwɛ tɛ́ɛ́dɩwá ndɩ‑ndɩ-daá nɛ́ gɛ waaŋmáa. Amá, sɩlɛ́ sɩbaasí, waaŋmáa nasɩ́rɩ ɖʊɖɔ ɩɖʊ ɩráa nɛbɛ́rɛ-dɛ́ɛ yɩrá sɩsɩ bɛlɛ́ badɩtɩŋa gɛ waaŋmáa. Ɩráa bɛḿ gɛ Timotée, na Tíiti na Filemɔ́n. Wasɩ́ɩ́kawá sɩḿ sɩdaá nɛ́, wensí waaŋmáa Timotée na Tíiti nɛ́ gɛ bánÿaá sɩsɩ «Ketiráa-dɛ́ɛ wasɩ́ɩ́kawá» sɩrɔ nasɩ́lɛ gɛ waaŋmáa Timotée, ngɛ kana ɖɔ́ kɛgɛ́ɛ na kʊ kaɖaa ńga.

Timotée ɩgɔɔ kɛ́ɛ Yahúúɖu waalá túúbá ivóo Yeésu Krísto nɛ́ gɛ, bɩka ɩjaa kɛ́ɛ Gɩrɛ́ɛkɩ ńnɩ́. Pɔ́ɔlɩ wéngilím Laabáárʊ Kífeńgi feerím nɛ́ gɛ wɛɛgɛ́gɛ́tɩ yɩ Lísitiri tɛ́ɛ́dɩ tɩwɛ Turikíi laadɔ́ɔ-daá nɛ́ tɩdaá. Ngɛ wɔɔgbɔ́ɔ yɩ ɩsɩ́ɩ ɩjɔ́. Bɩdɛ́ɛ sáátɩ kɩḿ, Timotée kɛ́ɛ afobúyɔ́ɔ gɛ. Pɔ́ɔlɩ-jɔ́ gɛ waanɩ́ɩ Ɖádʊ́ʊ-dɛ́ɛ Laabáárʊ Kífeńgi, ngɛ waava Yeésu toovonúm. Pɔ́ɔlɩ waalaaná yɩ tiríi wɔ́ngɔnyɔɔzɩ́ Koduuzísi lénlé nɔwɛ́yawá wɛ nɛ́. Nasɩ́rɩ-daá nɛ́, sɩ ɩkágbaazɩ sɩdɛ́ɛ ɩráa-dɛ́ɛ toovonúm fáa ɖóni gɛ.

Wasɩ́ɩ́ka kaɖaa ńga kana kadaá nɛ́, Pɔ́ɔlɩ wénveerím Koduuziya-dɛ́ɛ ɩráa sɩsɩ bókúná laakáarɩ na wentíwá nɛbɛ́rɛ wɔ́ngɔnɩ́ bánwɩlɩ́ɩ bɩ́na bɩndɩ na wentí Laabáárʊ Kífeńgi wánŋmatɩ́ nɛ́.

Sɩɩlɛ-dɛ́ɛ nɛ́, Pɔ́ɔlɩ wánwɩlɩ́ɩ Timotée nŋɩ́nɩ́ bɩɩbɔ́ɔ́zɩ bakpɩ́ɩ́rɩ Koduuziya basɩ́ɩ báa wenbí na bɩɖɩdáarɛ nɛ́.

Toozo-dɛ́ɛ nɛ́, ńŋɩnáa Timotée kɛ́ɛ Koduuziya-dɛ́ɛ ketirú nɛ́, Pɔ́ɔlɩ wánwɩlɩ́ɩ yɩ nŋɩ́nɩ́ bɩmɔɔ́na ɩlá tɩmɛ́rɛ ɖɩḿ, na ɩbɩ́sɩ Yeésu Krísto-dɛ́ɛ ketirú kazɔ́ɔ ńnɩ́ nɛ́.

Pɔ́ɔlɩ wɛ́nzɛɛ́ Timotée

1 Mɔ́ɔ́ Pɔ́ɔlɩ, Ɖádʊ́ʊ Yeésu Krísto-dɛ́ɛ tɩndʊ́ʊ mánŋmaa kʊ wasɩ́ɩ́ka kana. Ɩsɔ́ɔ Ɖɛ́lɛ́ɛ́rʊ́ na Yeésu Krísto ɖɔ́jɔɔ́ɔna yɩ tamɔ́ɔ nɛ́ baazɩɩ ná ma tɩndʊ́ʊ.

2 Nyɔ́ɔ́ Timotée gɛ mánŋmaá wasɩ́ɩ́ka kana ɖɔ́. Nyɛ́gɛ́ɛ mebiyaalʊ́ káŋ́-káŋ́ toovonúm fáa ɖɔ́wɛná kɩ nɛ́ kɩnɩ́bááwʊ-daá gɛ. Ɖájaa Ɩsɔ́ɔ na Ɖádʊ́ʊ Yeésu Krísto báɖʊ́ nya alɩbáráka, bánɩɩ nyágʊnyɔḿ bɩka bafa nya fɛɛzɩrɛ.

Pɔ́ɔlɩ wánbasɩ́ Timotée wɩlɩ́tɩwá tɩraazɩɩzɛ́ɛ nɛ́ tɩrɔ

3 Cɔɔ Efɛ́ɛzɩ tɛ́ɛ́dɩ-daá ńŋɩnáa sɩ mɛɖɛ́ɛ Masedʊwáanɩ laadɔ́ɔ-daá na mevééri nya nɛ́, bɩka ndɔ wenbá bánwɩlɩ́ɩ ɩráa wentí tɩraazɩɩzɛ́ɛ nɛ́ nɩ́bááwʊ. 4 Feeri wɛ sɩsɩ béyele mʊrá mʊrʊ́ʊ na caájaanáa yɩrá tɩ́m bɩ́dɛ́ndɛŋ́. Wenbí na bɩsɩná wenbí Ɩsɔ́ɔ wánlám bɩka toovonúm fáa wénÿelíi ɖánnáa nɛ́, ŋmatɩrɛ ɖɩvɛ́yɩ́na fɔ́ɔ́zɩrɛ nɛ́ gɛ bɩ́ngɔnáa. 5 Wenbí bʊrɔ mɔ́nbɔɔzɩ́ nya bɩlɛ́ nɛ́ gɛ sɩsɩ na biyéle boyuú sɔɔlɩ́m bɩ́ngalɩɩnáa wenbé ɖacɩrɩ‑cɩrɩ ńná ádánvʊʊná wɛ nɛ́, na toovonúm fáa tɩtɩndɩŋa-daá nɛ́. 6 Nɛbɛ́rɛ weeyéle nɩ́bááwʊ kɩḿ bɛtɛlɛ́ŋ basʊ́ʊ tɔ́m tɩvɛ́yɩ́na fɔ́ɔ́zɩrɛ nɛ́ ŋmatɩrɛ. 7 Bɛbɛɛ́na badɩ sɩsɩ bɛḿ gɛ Múúsá-dɛ́ɛ Mará wɩlɩɖáa, ngʊ́ baasɩ wentí bánŋmatɩ́ nɛ́, cáńfáná banɩ́ɩ wentí bánwɩlɩ́ɩ babá bazɩ́ŋɛ́ɛ tɩrɔ ɖóni nɛ́ tugutoluú.

8 Ɖáábá ɖányɩ bɩlɛ́ sɩsɩ Múúsá-dɛ́ɛ Mará cɔɔ́ɔ kazɔ́ɔ gɛ a ɖé ɩrʊ́ fóo yɛ ńŋɩnáa bɩɩbɔ́ɔ́zɩ nɛ́. 9 Ɖíyúú ɖɩtɩlɩ́ sɩsɩ bɩdɛkɛ́ɛ wenbá bánlám bɩzɩɩzɛ́ɛ nɛ́ bɔrɔ gɛ baazɩ́ɩ Mará, amá, wenbá bódónvúu wentí baazɩ́ɩ́zɩ sɩsɩ bála nɛ́, na wenbá bángʊrʊ́ʊna Ɩsɔ́ɔ nɛ́, na kʊjʊ-ɖóni-dɩnáa, na wenbá bánlám alaháácɩ́ nɛ́, na wenbá bɛ́dɛ́nnyɛŋ́ wenbí bɩgɛ́ɛ Ɩsɔ́ɔ-dɛ́ɛ ńbɩ nɛ́, na wenbá bédénzée Ɩsɔ́ɔ nɛ́, na wenbá bángʊ́ʊ bɔgɔɔnáa na bajaanáa nɛ́, na ɩráńgʊ́ʊ́ráa, 10 wásangarɩ́wá, na aláa bónɖoonáa ɖamá nɛ́, yáá abaaláa bónɖoonáa ɖamá nɛ́, na wenbá bánlám ɩráa yám-dɛ́ɛ fótóósi nɛ́, na bʊbɔtɩnáa, na wenbá bónɖuunáa Ɩsɔ́ɔ bɩka bɛ́nbɛlɩ́ɩ bʊbɔ́tɩ nɛ́, na wenbá barɩ́ŋa bánlám wenbí bɩrɩ́ŋa bɩraavóo Ɩsɔ́ɔ-dɛ́ɛ tɔ́m wánwɩlɩ́ɩ wenbí nɛ́ bɔrɔ gɛ baazɩ́ɩ Múúsá-dɛ́ɛ Mará. 11 Laabáárʊ Kífeńgi beejéle ma kɩ kɩɩlɩɩná Ɩsɔ́ɔ ásícé-dʊ́ʊ na kazɔ́ɔ lanɖʊ́-jɔ́ nɛ́ wánwɩlɩ́ɩ wenbí nɛ́ nbɩlɛ́.

Pɔ́ɔlɩ wánzám Ɩsɔ́ɔ ɩdɛ́ɛ kazɔ́ɔ lám-rɔɔzɩ́

12 Mɛ́nzɛɛ́ Ɖádʊ́ʊ Yeésu Krísto kɩzɛɛwʊ, ɩmʊ́ weení waava ma ɖóni malá tɩmɛ́rɛ ɖɩna nɛ́. Mɛ́nzɛɛ́ yɩ, káma, waava ma toovonúm ɩlɩzɩ́ ma sɩsɩ mála ɩdɩmɛ́rɛ, 13 mɔ́ɔ́ weení ɖoo máádʊ́ʊ yɩ, mava ɩdɛ́ɛ zamɔ́ɔ fúkúḿsi, bɩka madʊ́ʊ wɛ nɛ́. Amá, Ɩsɔ́ɔ waanɩ́ɩ mágʊnyɔḿ, káma, ɩnyɩ sɩsɩ mádafʊ́ńváa Yeésu toovonúm nɛ́ weeyéle na máásɩ wentí mánvʊnlám nɛ́. 14 Ɩɩ́n, Ɖádʊ́ʊ waabá gɛ ɩlá ma kazɔ́ɔ ńbɩ páá, hálɩ iyéle mava toovonúm, bɩka moyuú sɔɔlɩ́m bɩɩlɩɩná Yeésu Krísto-jɔ́ mána yɩ ɖáálá kʊ́ɖʊḿ nɛ́. 15 Tɔ́m tɩɩbá tɩgɛ́ɛ toovonúm báa weení mɔɔ́na itisi tɩ nɛ́ nɖɔ́: «Yeésu Krísto wɔɔgɔ́nɩ ɖúúlínya gɛ sɩ ɩlɛ́ɛ alaháácɩ́-dɩnáa,» ngɛ mɔ́ɔ́ gɛ barɩ́ŋa bɛdɛ́ɛ kpeŋ‑kpéŋ́. 16 Amá, Ɩsɔ́ɔ waanɩ́ɩ mɛ́dɛ́ɛ kʊnyɔḿ, na Yeésu Krísto ɩbaná mɔ́ɔ́ alaháácɩ́-dʊ́ʊ kpeŋ‑kpéŋ́, iyéle ɩráa ɩna nŋɩ́nɩ́ ɩbá ɩjɔɔ́ɔ suúru nɛ́, bɩka mɔ́ɔ́ mabɩ́sɩ wenbá ceré wɔ́rɔ́ sɩ bɔkɔ́nɩ bafa yɩ toovonúm boyuú weezuú kɩ́dɛ́ndɛŋ́ nɛ́ bɛdɛ́ɛ weení bɛ́nbɛɛŋnáa nɛ́. 17 Ɩsɔ́ɔ ɩmʊ́ weení wénɖíi kowúrɔ́ɔ kɛ́dɛ́ndɛŋ́ bɩka ɩvɛ́yɩ́ wánzɩ́m kɛtɛngɛrɛ nɛ́, ɩmʊ́ weení bádánnáa yɩ bɩka iriké gɛ Ɩsɔ́ɔ nɛ́, ɩnáábɩ́lɛ́ sám na ɖɔɔzɩ́tɩ mɔɔ́na báa ngbeére bɩvɛ́yɩ́na tɛ́m. Amí.

Wentí Pɔ́ɔlɩ wɔ́nbɔɔzɩ́ Timotée sɩ ɩ́la nɛ́

18 Móbú Timotée, wentí mánzɩɩzɩ́ nya nɛ́ nbɩlɛ́, tivóo wentí ɖoo wenbá bánŋmatɩnáa Ɩsɔ́ɔ nɔɔ́ nɛ́ baavʊ́ńŋmátɩ nyɔ́rɔ́ nɛ́; ɖɔkɩ bɛdɛ́ɛ tɔ́m tɩḿ kazɔ́ɔ, tɩ́nváa nya ɖóni na nbɩ́ɩ́zɩ nÿóo yowú kazɔ́ɔ ńgɩ, 19 bɩka nyɛ́dɛ́ɛ toovonúm fáa ɩbá bɩjaarɛ́ɛ, bɩka nyéwenbiré tánvʊʊná nya natɩ́rɩ. Nɛbɛ́rɛ weegízi bodofu bewenbé wɔ́nbɔɔzɩ́ wenbí nɛ́, hálɩ biyéle bɛdɛ́ɛ toovonúm fáa inúúdi. 20 Ɩráa bɛḿ badaá gɛ Imenée na Alɛkɩsándɩrɩ bɩlɛ́; mɔ́ɔ́ɖɔ́ɔ wɛ Krísto-dɛ́ɛ Koduuziya-daá, na bɩsáázɩ wɛ lɔ́nɩ beyéle Ɩsɔ́ɔ kʊdʊ́ʊ́nɩ.