8
Kawauwi ka Magono ma Aɗara̱kpi
1 Ili i pige iꞌya tsa dansa iꞌya na: Tsa̱ ta̱ n Magono ma Aɗara̱kpi uza ɗa u dusuki a ulyaki u karatsu ka tsugono ka Kashila̱ Uza u Ucira Gba̱ a zuba.
2 Magono ma Aɗara̱kpi ma tsunu a Asu u ɗa u Lakai Uwulukpi† u ɗa wa gbasha, asu u ulya u kayala u mayun u ɗa Kashila̱ ka yain, ama ɗa a yain asu vi wa.
3 Magono ma Aɗara̱kpi dem ma̱ ta̱ n manyan ma una̱ka̱sa̱ kune n uɗara̱kpusa ubana a asu u Kashila̱. Nala dem Magono ma Aɗara̱kpi ma tsunu u ka̱na̱ ta̱ dem u na̱ka̱ Kashila̱ kune ku ili i roku.
4 Wa̱ri baci na a likimba, wa̱ri wa woko kaɗara̱kpi wa ko kenu, kpaci aɗara̱kpi a ɗa pini na, aza ɗa a ka tono Mele a asu u una̱ka̱ Kashila̱ kune.
5 Manyan ma aɗara̱kpi a ka yan, iryoci iꞌya koshi ko kpam kulu ka ili iꞌya iꞌa̱ri a zuba ka. Ili i te iꞌya dem n Musa. An Musa wa foɓuso uyan Katani ka Kavasu, Kashila̱ ka tonuko yi, “Ciɓa aꞌayin a ɗa va̱ri a masasa, n tonuko vu ta̱ derere tyoku ɗa va yan ka. Vu kirana vu yain ka nala derere.”
6 Shegai manyan ma tsuɗara̱kpi ma Kashila̱ ka na̱ka̱i Yesu ma la ta̱ ma a na̱ka̱i aɗara̱kpi a ɗa a buwai. Aya kaꞌuwi ka mere ka kazuwamgbani ka savu ka Kashila̱ n ama, kpam kazuwamgbani ka nala ki ka la ta̱ ka cau. Nala u woko ta̱ an ili iꞌya Kashila̱ ka yain a kazuwamgbani ka savu i la ta̱ i ka cau.
7 Kazuwamgbani ka kagita̱ ka̱ri ka fuɗa baci ka yain ili gba̱, ili iꞌa̱ la iꞌya ya zuwa a yain ka ire wa.
8 Shegai Kashila̱ n kaci ka ne u wenei ka̱ tyoku ɗa ka gain ka woko wa, ɗa u danai:
“N tonuko ɗa̱, aꞌayin aꞌa̱ ta̱ a utuwa̱,
a ɗa ma yan kazuwamgbani ka savu
n aza a Isaraꞌila n aza a Yahuza.
9 Kazuwamgbani ka na ka woko icun i kazuwamgbani ka n yain n akaya a le,
an n ka̱na̱ le n akere n wutukpa̱ le a uyamba u Masar wa.
Shegai a tono ka wa,
aku n kpatala̱ka le kucina̱.
10 Aꞌayin a ka tuwa̱ ta̱ a ɗa ma yan kazuwamgbani ka savu
n aza a Isaraꞌila.
Mpa, Magono ma Zuba, ma zuwa ta̱ mele ma va̱
a asuvu a le tsa̱ra̱ a reve ma,
kpam ma korongu ta̱ ma a atakasuvu a le
tsa̱ra̱ a toni ma.
Ma woko ta̱ Kashila̱ ka le,
kpam a ka woko ta̱ ama a va̱.
11 Ama a ka doku kpam a wenishike atoku a le wa, a dana,
‘Revei Magono ma Zuba,’
kpaci gba̱ a ka reve mu ta̱,
ili iꞌya i ka̱na̱i uza u kenu ubana uza ɗa u lakai kalen gba̱.
12 Kpaci ma cimbusuka̱ le ta̱ tsicingi tsu le
kpam ma doku ma ciɓa unyushi u cingi u le wa, ko kenu.”
13 An Kashila̱ ka yain kadyanshi ka kazuwamgbani ka savu ki, ka cau ka ka buwa kpam n manyan wa. Ko ndya baci i kutsai kpam i wowoi, i yan la vi ɗe evu n upuwa̱n.