5
Maku ma Kondom ma kukpa̱i tagara̱da
1 Ili i roku iꞌya kpam n wenei a kuwene ku va̱ iꞌya, vuma ɗa wa̱ri ndishi a karatsu ka tsugono ka nala ki wa ɓa̱na̱ tagara̱da u ɗa wa̱ri wara̱ka u bululu n ikorongi a apashi a re gba̱. Kashila̱ ka ka̱ta̱la̱ ta̱ u ɗa kpam u paɗarai u ɗa mai n cira̱kpa̱† tsu shindere n ili i uzuwa iryoci.
2 Aku n wenei kpam katsumate ka zuba ka ucira, ka̱ri kadyanshi n kala̱ga̱tsu ka ucira, ka danai: “Ya ra̱tsai u fukpa̱ cira̱kpa̱ tsi aku u ba̱ra̱kpa̱ tagara̱da vi?
3 Shegai uza wa̱ la a zuba ko a likimba ko kpam a kere ka iyamba uza ɗa u ra̱tsai u kukpa̱ tagara̱da vi u yain u ɗa ka̱neshi wa.
4 Aku n rongoi a kushen cika, kpaci ko uza wa̱ la u rawai u kukpa̱ u ɗa u yain ka̱neshi wa.
5 Aku uza u te a asuvu a nkoshi mi u tonuko mu, “Paɗa kushen ki! Wene na, uza roku u ɗa pini uza ɗa u lyai kaci. Aya a tsu isa̱ Gabako, magono ma, uza ɗa u wuta̱i a asuvu a kaletsu ka Yahuza. Aya matsukaya ma pige ma Dawuda Magono. Aya uza ɗa wa fuɗa wa fukpa̱ cira̱kpa̱ tsu shindere tsu nala tsi, aku u ba̱ra̱kpa̱ tagara̱da vi.
6 Aku n wenei Maku ma Kondom kushani a mere ma asu u karatsu ka tsugono ki. Ili i uma i nishi i nala yi na̱ nkoshi mi n kyawan yi. Ikyamba i ne iꞌa̱ ta̱ yavu ama aꞌa̱ri a wuna yi a yankai uɗara̱kpa. Wa̱ ta̱ n avana a shindere n aꞌeshi a shindere, a ɗa aꞌulu a shindere a Kashila̱ a nala yi a ɗa Kashila̱ ka suki ubana a aɓon a likimba gba̱.
7 Maku ma Kondom mi ma banai ma bidyai tagara̱da u ɗa uza ɗa wa̱ri ndishi a karatsu ka tsugono wa ɓa̱na̱ a kukere ku ulyaki ku ne ki.
8 An wa̱ri pini uyan nala, aku ili i uma i nishi na̱ nkoshi kamanga n ama a nishi yi a kuɗa̱ngi a kapala ka ne. Ya dem wa ɓa̱na̱ molo n kabelu ka zinariya. Kabelu ki ka̱ ta̱ ushaɗangi n ili i magula̱ni iꞌya iꞌa̱ri kushani ka kavasu ka ama aza ɗa a ka gbashika Kashila̱.
9 Aku a shipai ushipa u savu u na:
“Vu ra̱tsa ta̱ vu bidya tagara̱da vi
vu fukpa̱ cira̱kpa̱ tsi vu ba̱ra̱kpa̱ u ɗa.
Ili iꞌya i zuwai iꞌya, ama aꞌa̱ri a wuna vu ta̱,
kpam mpasa n vunu n wokoi katsupi
an vu wutukpa̱i ama a agali kau‑kau, n aletsu, n ama, n iyamba,
kpam gogo‑na ama a Kashila̱ a ɗa aꞌa̱ri.
10 Vu zuwa le a woko kagali ka ne; wata,
aɗara̱kpi aza ɗa a ka gbashika Kashila̱.
Kpam a ka lya ta̱ tsugono tsu likimba.”
11 Aku n doki n weɓelei, n panai atsumate a zuba a ka shipa. Kakuma̱ ka le ka ka̱ri ukece wa. A kyawain karatsu ka tsugono ki n ili i uma i nishi na̱ nkoshi mi.
12 Aku a shipai n ala̱ga̱tsu a ucira:
“Tsa cikpala ta̱ Maku ma Kondom
ma aꞌa̱ri a wunai vi,
adama a ucira u pige,
n utsa̱ri, n kakiri n ucira u ne.
Wa wusha ta̱ karinga̱ n tsupige,
n icikpali cika!”
13 Aku n panai gba̱ ili i uma ya shipa; wata, gba̱ iꞌya iꞌa̱ri a zuba, n likimba, n iꞌya iꞌa̱ri a kere ka likimba, n asuvu a kushiva̱. Ushipa u le vi u ɗa na:
“Uza ɗa wa̱ri a karatsu ka tsugono
kaɓolo n Maku ma Kondom mi
wa̱ ta̱ n karinga̱ ka pige
n icikpali, n tsupige, n ucira
hal ubana bawu utyoku.”
14 Aku ili i uma i nishi yi a wushuki, “Nala wa̱ri!” Nkoshi mi kpam n kuɗa̱ngi n lyaka yi kayala.