4
‘ప్రార్దన కెర్తె తా’
1 ఎజొమాన్లు, తుమ్‍చ గొతిమాన్సుల్‍క సరిగా చెంగిల్ దెకితె తా, జోవయింక దెతిసి దాస. తుమ్‍క కి పరలోకుమ్‍తె ఎజొమాని అస్సె.
2 నిదానుమ్ తెన్ బద్దుకుమ్ నే జతె దేముడుచి దయ ఎత్కిచి రిసొ జోవయింక తుమ్‍చి సర్ద సంగ ప్రార్దన కెర్తె తా.
3 అమ్‍చి రిసొ కి ప్రార్దన కెర. కిచ్చొక మెలె, అమ్ కీసి గే జోవయించి సుబుమ్ కబుర్ కోడు, మెలె క్రీస్తుచి రిసొచి గుట్టు, అమ్ సూనయ్‍తె తతి రిసొ, జో అమ్‍క వాట్ దెవుసు మెన ప్రార్దన కెర. జా సుబుమ్ కబుర్ జా గుట్టు ఆఁవ్ సూనయ్‍లి రిసొ ఆఁవ్ జేలి జా అస్సి.
4 జా సుబుమ్ కబుర్ జా గుట్టు అన్నె సూనవుక అస్సె, చి ఆఁవ్ కీసి సంగిలె సొస్టుమ్ జయెదె గే జో అంక సికడ్సు మెన తుమ్ ప్రార్దన కెర.
మరియాద తెన్ ఇండ, లట్టబా
5 తుమ్‍క దిలి సమయుమ్ పాడ్ నే కెరంతి రితి, దేముడుచి క్రీస్తుచి గవురుమ్ దెకయ్‍త అవ్‍కాసుమ్ గెనన్లి రితి, వేర మాన్సుల్‍క తుమ్ మరియాద దెకితె తా.
6 తుమ్ లట్టబ్తిసి సూటి తవుస్. బమ్మ తెన్ లట్టబా నాయ్, గని సరిగా ఉచర, చెంగిల్ బెదవ, కామ్‍క జెతిసి లట్టబ, చి కక్క కిచ్చొ జబాబ్ దెంక గే, అజ్జ తయెదె.
7 ఆఁవ్ ఇన్నె కీస్ అస్సి గే, తుకికు తుమ్‍క జానయెదె. ప్రబుచి తెడి అమ్‍క జో ప్రేమ జలొ బావొ జయెదె, చి నిదానుమ్ సేవ కెర్తొసొ జా, అమ్‍చి తెన్ ప్రబుచొ గొతిమాన్సు రితొ జో జయెదె.
8 తుమ్‍తె ఆఁవ్ జోక కిచ్చొక తెద్రవ అస్సి మెలె, ఇన్నె అమ్ కీసి అస్సుమ్ గే తుమ్‍క జో ఒత్త సంగితి రిసొ, చి తుమ్‍క మెన్సుతె జో దయిరిమ్ కెర్తి రిసొ,
9 పడ్తొ, నిదానుమ్ తిలొ ప్రేమ తిలొ బావొ జలొ తుమ్‍చొ సొంత మాన్సు ఒనేసిముక కి తెద్రయ్‍తసి. ఇన్నె జర్గు జలిసి ఎత్కి తుమ్‍క జేఁవ్ దొగుల సంగుల.
పవులు తెన్ తిలసచి ప్రేమ సంగ తెద్రయ్‍లిసి
10 ఇన్నె కో కో తుమ్‍క జోవయించి ప్రేమ సంగ తెద్రయ్‍తతి మెలె, అంచి తెన్ జేలితె తిలొ అరిస్తార్కుక, పడ్తొ బర్నబాచొ సల్లొసి మార్కు ఇన్నెచి రిసొ అగ్గె తుమ్‍క కబుర్ తెద్రవ అస్సి. జో తుమ్‍తె అయ్‍లె, టాన్ దాస.
11 పడ్తొ యూస్తు మెన అన్నెక్ నావ్ తిలొ యేసు మెలొసొ కి జోచి ప్రేమ తుమ్‍క సంగ తెద్రయ్‍తయ్. దేముడుచి రాజిమ్‍చి రిసొచి సుబుమ్ కబుర్ కామ్ ఆఁవ్ కెర్తిస్‍తె, ఎక్కి ఈంజేఁవ్ తీగ్లయ్ యూదుల్ బెద అస్తి. ఈంజేఁవ్ అంక ఒగ్గర్ తోడు జా అస్తి.
12 పడ్తొ, క్రీస్తు జలొ యేసుక సేవ కెర్తొసొ జలొ తుమ్‍చొ సొంత మాన్సు ఎపప్రా కి తుమ్‍క జోచి ప్రేమ సంగ తెద్రయ్‍తయ్. తుమ్‍క ‘ఆత్మక పూర్తి వడ్డ డిట్టుమ్ టీఁవ, పూర్తి దయిరిమ్ తెన్ ప్రబుచి ఇస్టుమ్ రితి ఇండితె తత్తు’ మెన, తుమ్‍చి రిసొ కెద్దొడ్ తెదొడి జో ప్రార్దన కెర్తె తత్తయ్.
13 జోచి రిసొ ఆఁవ్ కిచ్చొ సాచి సంగితసి మెలె, తుమ్‍చి రిసొ కి, లవొదికయ పట్నుమ్‍చచి రిసొ కి, చి హియోరాపొలి పట్నుమ్‍చచి రిసొ కి, జో ఒగ్గర్ కామ్ కెర్తయ్.
14 పడ్తొ, ప్రేమ జలొ డాక్టర్ జలొ లూకా చి దేమా తుమ్‍క జోవయించి ప్రేమ సంగ తెద్రయ్‍తతి.
15 లవొదికయ పట్నుమ్‍తెచ బావుడ్లు జల నంపజలసక చి నుమ్‍పాక, చి జేఁవ్‍చి గెరి సబ కెర్తి సంగుమ్‍చక అంచి ప్రేమ సంగ.
16 పడ్తొ, తుమ్‍తె ఈంజ ఉత్రుమ్ సదు కెర సూనయ్‍లదు మెలె, లవొదికయ పట్నుమ్‍తెచ సంగుమ్‍తె కి సదు కెరవ సూనవ. పడ్తొ, జా లవొదికయ పట్నుమ్‍తె సంగుమ్‍తె ఆఁవ్ తెద్రయ్‍లి ఉత్రుమ్ తూమ్ కి సదు కెర.
17 పడ్తొ, ‘ప్రబు తుక దిలి కామ్ తుయి నిదానుమ్ తెన్ పూర్తి కెర కుట్టవు’ మెన అర్కిప్పుక కి తుమ్ సంగ.
18 ఆఁవ్ పవులు సొంత ఆతు తెన్ ఈంజ ముద్దు సంగితి ఆకర్ కోడు రెగ్డితసి. ఆఁవ్ జేలి జలిస్‍చి రిసొ తుమ్ ప్రార్దన కెరుక పఁవ్స నాయ్. ప్రబుచి దయ తుమ్‍చి తెన్ తవుసు!