9
దేముడుచి గుడితె కిచ్చొ కిచ్చొ తిలిసి
1 జలె, అగ్గెచి ప్రమానుమ్‍తె కీసి బక్తి కెరుక గే ఆగ్నల్ తిలి, చి ఈంజ లోకుమ్‍చి రగుమ్‍చి ప్రబుక బక్తి కెర్తి టాన్ తిలి.
2 మెలె, టంబుగుడ్డ తెయార్ కెర్ల, చి యూదుల్‍చ ప్రెజల్ ఎత్కిజిన్ పెసితి పుర్రెతొచి టంబుగుడ్డ గదితె దీవుకంబుమ్‍చి పోడియొ బలి దెతి బల్ల తిల. జా గదిక దేముడుక సుద్ది తతి టాన్ మెనుల.
3 పడ్తొ, జా వెల్లి గదిచి గుమ్ముమె తెర ఒడొవ తిల, అన్నె తెడిక, జా గది జీన్లె, అన్నెక్ టంబుగుడ్డ గది తిలి. జాక ‘దేముడుక ఒగ్గర్ సుద్ది తతి టాన్’ మెనుల. జాక అన్నెక్ తెర గూడు తిలి.
4 జా తెడిక తెడిచి గదితె దూపుమ్ డయితి బఙర్‍చి పీటుమ్ తిలి, చి దేముడుచి తెదొడ్‍చి ప్రమానుమ్‍క గుర్తు జతి పెట్టె తిలి. జా పెట్టెతె ఎత్కి పక్కలె ఉప్పిరి బఙార్ పుఙడ తిల. జా పెట్టెచి తెడి మన్నా మెన పరలోకుమ్ తెంతొ దేముడు పూర్గుమ్ సువ తిలి అన్నిమ్ ఇదిల్ దెర్లి బఙర్‍చి మర్రముంత తిలి. పడ్తొ అన్నె అగ్గె ఐగుప్తు దేసిమి జేఁవ్ అమ్‍చ యూదుల్ తిలి పొది గజ్జల్ జా తిలి అహరోనుచి టెక్నొ డండొ, పడ్తొ జా పొర్ని ప్రమానుమ్‍చ ఆగ్నల్ రెగిడ్ల పత్రల్ తిల.
5 జా పెట్టెచి ఉప్పిరి, మెలె, దేముడు పాపల్ చెమించుప కెర్తి గుర్తుచి జా పెట్టెచి ఉప్పిరి దొన్ని బఙర్‍చ దూతల్‍చ బొమ్మల్ టీఁవ, జా పెట్టెక దెకిల్ రితి వంపొ జా తిల. ఈంజ ఎత్కిచి రిసొ అన్నె ఒగ్గర్ సంగుక నెత్రుమ్.
6 జా ఎత్కి తెయార్ జలి తెంతొ, జా టంబుగుడ్డచి పుర్రెతొచి గదితె పూజర్లు గెచ్చుక జెంక జతె తా జోవయించి సేవచ నీతికమొ కెర్తె తత్తతి.
7 గని తెడిక తెడిచి గదితె ఎక్కి, ఎత్కిక వెల్లొ పూజరి, వెర్సెక్‍క ఎక్కి సుట్టు గెతయ్. గెలె, లొఁయి నెంఇతె బెరుక నాయ్. నే జాన్‍తి రితొ కెర్ల జోచ పాపల్‍చి రిసొచి, ప్రెజల్‍చ పాపల్‍చి రిసొ బలి దెతి లొయఁ తెన్ బెరుక అస్సె.
8 ఈంజ టాలి దెకవ దేముడుచి సుద్ది తిలి ఆత్మ కిచ్చొ అర్దుమ్ దెకయ్‍తయ్ మెలె, జా పుర్రెతొచి గదిచి తెడిచి తెర అడ్డు టీఁవ్‍తి ఎదిలి సేంపు, దేముడుక ఒగ్గర్ సుద్ది తిలి తెడిక తెడిచి గదితె పెసుక మాన్సుల్‍క వాటు నాయ్.
9 జా పుర్రెతొచి గదితె ఒడొయ్ జలి జేఁవ్‍చి జా తెర కిచ్చొచి రిసొ టాలి జయెదె మెలె, ఈంజయి ఉగుమ్‍కయ్ టాలి జతయ్. దేముడుక ఈంజ ఉగుమ్‍తె కో నంపజా గెచ్చుల గే, ఉగుమ్ కేడ్లె జోతె గెచ్చుక అడ్డు తయె నాయ్. జా రితితె, జలె, బక్తి కెర్తొసొచి ఆత్మక సుద్ది కెరుక నెత్తెర బలివొ అర్పితల్ దెతతి.
10 దసచ రితి అన్నిమ్, పితిసి, ఆఁగ్ దొవన్‍తిసి, ఎక్కి ఆఁగ్‍కయ్ కామ్‍క జెత ఆగ్నల్ జతతి. నొవి ఆగ్నల్, నొవి వరుమ్ జర్గు నే జతె అగ్గె రకితె తిలిసి, జా.
క్రీస్తు పూజరి జా అర్పితుమ్ జలిసి
11 గని చెంగిల్ ప్రమానుమ్ అయ్‍లిస్‍క క్రీస్తు ఎత్కిక వెల్లొ పూజరి జా అయ్‍లిస్ తెన్, మాన్సు తెయార్ నే కెర్లి, ఈంజయ్ రగుమ్ జెర్మున్ నే జలి, అన్నె వెల్లి అన్నె పూర్తి జలి రగుమ్‍చి టంబుగుడ్డతె, మెలె పరలోకుమ్‍తె దేముడు అబ్బొస్ తిలిస్‍తెయి పెస,
12 దేముడుక ఒగ్గర్ సుద్ది తతి టాన్‍తె కెఁయఁక తెఁయఁక కామ్‍క జెతికయ్, ఎక్కి సుట్టుయి యేసు పెసిలన్. పెస, గొర్రెల్‍చి, వస్సొ పిల్లల్‍చి లొఁయి నాయ్, గని జోచి సొంత లొఁయి దా కెర, అమ్ అన్నె కెఁయఁక విడ్దల్ నే జతి రితి అమ్‍క అన్నె నెతొవన అమ్‍క జత బెదయ్‍లన్.
13 మెలె, గార్ జల మాన్సుల్‍చి ఉప్పిరి గొర్రెల్‍చి జవుస్, వస్సొ పిల్లల్‍చి జవుస్ లొఁయి చించితిసి, నెంజిలె వస్సి పిల్లక డయిలిస్‍చి సార్ వించితిసి, ఎక్కి జోవయించి ఆఁగుచి కీడు గెచ్చయ్‍తి రితి జతయ్.
14 గని అమ్‍చి పాపుమ్ గెచ్చయ్‍తి అర్పితుమ్ జంక మెనయ్ క్రీస్తు జోచి పరలోకుమ్‍చి తాఁ గెతి ఆత్మసెక్తిక జోచి జీవ్ దా మొర్లన్. జా అగ్గెచి ప్రమానుమ్‍చ ఆర్పితుమ్‍లు మాన్సుచి ఆఁగుక సుద్ది కెర్తయ్ జలె, జోవయించి ఆత్మక యేసు దిలి సొంత లొఁయి అన్నె కెద్ది కామ్ కెరెదె! జాకయ్, జీవ్ తిలొ జీవ్ దెతి దేముడుచి సేవ ఆమ్ కెర్తి రితి, కామ్‍క నెంజిల మొర్తి రిత అమ్‍చ కమొ జో పుంచ గెల కెర, అమ్ లాజ్ జంక నెంజితి రితి, అమ్‍చి ఆత్మ జో సుద్ది కెరెదె,
15 దస్సి, ఈంజ నొవి ప్రమానుమ్‍క ఈంజొయి దేముడు అబ్బొస్‍క చి అమ్‍క మదెనె జతొసొ జా అస్సె. దస్సి, ఈంజొ మొర దొర్కు జలి అర్పితుమ్ జలిస్ తెన్ అగ్గెచి ప్రమానుమ్‍చ కొడొ అమ్ పిట్టవన పాపుమ్ జలిస్‍చి సిచ్చ తెంతొ అమ్‍క విడ్దల్ కెర నెతొవ గెల అస్సె. కిచ్చొక ఇసి జర్గు కెర అస్సె మెలె, కక్క జో బుకారా తయెదె గే, ప్రమానుమ్ జలి కెఁయఁక తెఁయఁక చెంగిల్ తతి వాట్ జోవయింక దొర్కు కెరుక మెనయ్.
16 అన్నె కిచ్చొ ఉచరుక జయెదె మెలె, ‘ఆఁవ్ మొర్లె అంచి ఆస్తి ఇసి దస్సి వంట దెతు’ మెన మాన్సు ఏక్ కాగ్తుమ్ రెగ్డ తిలె, జేఁవ్ వాటల్ వంట దెంక జలె, తొలితొ జో మాన్సు మొర్లిస్‍చి రిసొ రుజ్జు జంక.
17 కిచ్చొక మెలె, మాన్సు మొర్లెకయ్ జో రెగిడ్లి దస్సి కాగ్తుమ్ కామ్‍క జెయెదె, గని జా రెగ్డయ్‍లొసొ జీవ్ తిలి పొది కామ్‍క జెయె నాయ్. దస్సికయ్ జోచి ఆస్తిచి వాట జోచ మాన్సుల్‍క దొర్కు జవుస్ మెనయ్ యేసు మొర గెలన్.
18 ఇసి, తొలితొ చి ప్రమానుమ్ కి లొఁయి సూఁయి జలిస్‍చి జలి.
19 మెలె, ప్రెజల్ ఎత్కిక దేముడుచ ఆగ్నల్‍చి ఎత్కి ఆగ్న మోసే పూర్గుమ్‍చొ సూనవ కేడయ్‍లి పడ్తొ వస్సొ పిల్లల్‍క చి, గొర్రెల్‍క కండ జోవయించి లొఁయి దెరన, పాని, ఎరన ఊలు, హిస్సోపు మొక్కచ రొడ్డల్ తెన్ జేఁవ్ ఆగ్నల్ రెగిడ్లిస్‍చి ఉప్పిరి కి, ప్రెజల్ ఎత్కిచి ఉప్పిరి కి చించ దా,
20 “ఇసి కెర మెన దేముడు తుమ్‍క ఆడ్ర దిలి ప్రమానుమ్‍చి గుర్తుచి లొఁయి ఈంజ” మెన సంగిలన్.
21 దస్సి కి, జా టంబుగుడ్డతెచి బక్తి కెర్తిస్‍తె వాడిక కెర్తి సామన్ ఎత్కితె జా లొఁయి చించ దిలన్.
22 నిజుమి, ఆగ్నల్ రితి తెన్, కేన్‍గె ఏక్‍క ముల, ఎత్కి వస్తువక లొఁయికయ్ సుద్ది కెరుల, చి లొఁయి నే సూఁయి జలె, పాపల్ చెమించుప జయె నాయ్.
యేసు అమ్‍చి పాపుమ్ పుంచ దా
23 దస్సి పరలోకుమ్‍తె జతిస్‍క టాలి జతిసి ఎత్కి లొఁయి సూఁయి జతిస్ తెన్ దస కమొకయ్ సుద్ది జంక అగ్గెయి దొర్కు జా తిలి, గని పరలోకుమ్‍తె బెదితిసి ఎత్కి అన్నె చెంగిలి బలి జతిస్‍కయ్ సుద్ది జంక దొర్కు జలి. మెలె, క్రీస్తు బలి జలిస్‍కయ్.
24 మెలె, దేముడుక సుద్ది తతి టాన్‍తె క్రీస్తు పెస అస్సె. జా టాన్ మాన్సు తెయార్ కెర్లిస్ నెంజె, గని పరలోకుమీ, చి దేముడుచి సొంతచి మొక్మె క్రీస్తు టీఁవ అమ్‍చి పచ్చెన జతయ్.
25 పడ్తొ అన్నె, జోచి సొంత నెంజిలి లొఁయి దెరన, మాములుమ్ ఎత్కిక వెల్లొ పూజరి కో జలెకు వెర్సెక్‍క ఏక్ సుట్టు ఈంజయ్ లోకుమ్‍తె తిలి దేముడుచి గుడితెచి, ఒగ్గర్ సుద్ది తిలి టాన్‍తె పెసుక జతయ్. గని ఒగ్గర్ సుట్లు క్రీస్తు అర్పితుమ్ జంక నాయ్, కెఁయఁక తెఁయఁక అర్పితుమ్ జతె తంక నాయ్.
26 దస్సి జతి జలె, లోకుమ్ జెర్మయ్ జలి మొదొల్ తెంతొ ఒగ్గర్ సుట్లు జో జా స్రెమ సేడుక తత్తి. గని, ఉగుమ్‍చి ఆకర్ పొది జోచి సొంత జీవ్ దా, మాన్సుల్‍చి పాపుమ్ గెచ్చయ్‍తి అర్పితుమ్ జా, పాపుమ్ గెచ్చవుక మెన ఎక్కి సుట్టు జో టీఁవిలిస్ సరి జా అస్సె.
27 అన్నె, మాన్సుల్ కీసి ఎక్కి సుట్టు మొరుక అస్సె గే, చి పడ్తొ దేముడుచి పరిచ్చ జవుల గే,
28 దస్సి, క్రీస్తు, ఒగ్గర్‍జిన్‍చ పాపల్ వయన గెచ్చవ గెలుక మెన సరిపుచుప జతి జా, ఎక్కి సుట్టు మొర గెలన్. చి అన్నెక్ సుట్టు డీసెదె; పాపుమ్ గెచ్చయ్‍తి రిసొ నాయ్ గని సర్ద తెన్ జోవయింక రకితస రచ్చన జతిసి పూర్తి నెరవెర్సుప జతి రితి జర్గు కెరుకయ్ మెన జో అన్నె డీసెదె.