17
సిస్సుల్‍చి మొక్మె యేసు పరలోకుమ్‍చి ఉజిడి జా మార్సుప జలిసి
(మార్కు 9:2-13; లూకా 9:28-36)
1 అన్నె సొవ్వు దీసల్ గెలి పడ్తొ, యేసు పేతురుక, యాకోబుక చి యాకోబుచొ బావొస్ జలొ యోహానుక పట్టి కడ దెరన, డోంక్ తిలి ఏక్ మెట్టయ్ వెగ కెర,
2 జోవయించి మొక్మె జోచి రూపుమ్ మార్సుప జా, జోచి మొకొమ్ పొద్దు రితి తల్కున ఉజిడ్ జలి, చి జోచ పాలల్ ఉజిడ్ రితి చోక్ డీసిల.
3 పడ్తొ, ఈందె, పూర్గుమ్‍చ దేముడుచి కబుర్లు సంగిత మోసే చి ఏలీయా దొగుల యేసు తెన్ లట్టబ్తె తా. జేఁవ్ తీగ్ల సిస్సుల్‍క డీసన్ సేడ్ల.
4 జేఁవ్ దొగుల పూర్గుమ్‍చ యేసు తెన్ లట్టబ్తె తతికయ్, పేతురు యేసుక, “ప్రబు, అమ్ ఇన్నె తంక చెంగిలి. తుక ఇస్టుమ్ తిలె, ఏక్ తుక, ఏక్ మోసేక, ఏక్ ఏలీయాక, మొత్తుమ్ తిన్ని కుడియల్ బందిందె” మెన సంగిలన్.
5 పేతురు దస్సి సంగితె తతికయ్, ఈందె, ఉజిడ్ తిలి ఏక్ మబ్బు జోవయింక డంకి జలన్, చి “ఈందె, ఈంజొ అంచొ ప్రేమ తిలొ సొంత పుత్తు. ఇన్నెచి రిసొ అంక ఒగ్గర్ సర్దసంతోసుమ్. ఇన్నెచి కోడు తుమ్ సూన” మెన, జా మబ్బు తెంతొ అవాడ్ సంగిలిసి సూన్ల.
6 సిస్సుల్ ఈంజ కోడు సూన పుడ్జొ సేడ ఒగ్గర్ బియఁ గెల.
7 గని యేసు జోవయించి పాసి జా కెర, జోవయింక చడ, “ఉట్ట. బియఁ నాయ్” మెన సంగిలన్.
8 జేఁవ్ సిస్సుల్ అంకివొ ఉగుడ దెకిలె, యేసు ఎక్కిలొయి డీసిలన్, అన్నె కక్క దెకిత్ నాయ్.
మొర గెలె అన్నె జీవ్ జతిస్‍చి రిసొ యేసు అన్నె సంగిలిసి
9 యేసుచి సిస్సుల్ జా మెట్టయ్ తెంతొ ఉత్ర జెతె తతికయ్, “ఆఁవ్ మాన్సు జా జెర్మున్ అయ్‍లొసొ మొర గెచ్చ అన్నె జీవ్ జతె ఎద, ఈంజ తుమ్‍క డీసిలిస్‍చి రిసొ తుమ్ కక్క సంగ నాయ్” మెన యేసు జోవయింక సంగిలన్.
10 తెదొడి జోచ సిస్సుల్, “క్రీస్తు మెలొ రచ్చించుప కెర్తొసొ నే జెతె అగ్గె ఏలీయా పూర్గుమ్‍చొ జెంక అస్సె, మెన మోసే తెన్ దేముడు దిలి ఆగ్నల్ సికడ్తస కిచ్చొక సంగితతి?” మెన, యేసుక పుసిల.
11 జో జోవయింక, “ ‘ఏలీయా పూర్గుమ్‍చొ జా కెర ఎత్కి తెయార్ కెరుక అస్సె’ మెన పూర్గుమ్ దేముడు సంగిలి కోడు నిజుమి,
12 గని తుమ్‍క ఆఁవ్ కిచ్చొ మెంతసి మెలె, ఈంజొ ఏలీయా అగ్గెయి అయ్‍లన్. అయ్‍లె కి, జేఁవ్ జోక చినితి నాయ్, చి జోవయింక ఇస్టుమ్ అయ్‍లి రితి జేఁవ్ జోక కెర్ల. ఆఁవ్ మాన్సు జా జెర్మున్ అయ్‍లొసొ కి జోవయింతె దస స్రెమల్ సేడిందె” మెన యేసు సంగిలన్.
13 జో బాప్తిసుమ్ దెతె తిలొ యోహానుచి రిసొయి ఏలీయా పూర్గుమ్‍చొ రితొసొ మెన యేసు సంగిలన్, మెన సిస్సుల్ అర్దుమ్ కెరన్ల.
మోర్చ సేడ్తె తిలొ బూతుమ్ దెర్లొ నాడుక యేసు చెంగిల్ కెర్లిసి
(మార్కు 9:14-29; లూకా 9:37-43)
14 యేసుచి సిస్సుల్ జా మెట్టయ్ తెంతొ ఉత్ర జా కెర, ఒత్త బెర్లి జనాబ్‍తె పాఁవితికయ్, ఎక్కిలొ యేసుతె జా కెర, సెర్ను సేడ జొకర,
15 “బాబు, అంచొ పుత్తుచి ఉప్పిరి కన్కారుమ్ తీ. జో మోర్చ జబ్బు తెన్ ఒగ్గర్ బాద సేడ్తె తత్తయ్. జో కెఁయఁక తెఁయఁక ఆగితె నెంజిలె గడ్డె సేడుక అస్సె.
16 తుచ సిస్సుల్‍తె జోక కడ ఆన్లయ్, గని జోక చెంగిల్ కెరుక జేఁవ్ నెతిర్ల” మెన సంగిలన్.
17 యేసు, “నముకుమ్ నెంజిలి వెర్రి బుద్దిచి కాలుమ్‍చ, తుమ్. తుమ్‍చి తెన్ ఆఁవ్ కెత్తి దీసల్ తంక? కెత్తి దీసల్ తుమ్‍క ఆఁవ్ ఓర్సుప జంక? అల్లె, జో నాడుక అంచితె కడ ఆన” మెన, సంగిలన్.
18 జో నాడుక కడ ఆన్‍తికయ్, యేసు జోక దెర్లి బూతుమ్‍క గోల కెర్తికయ్, జా బూతుమ్ జోక ముల దా, ఉట్ట గెలన్. గెలి వెంటనె, జో నాడు చెంగిల్ జలన్.
19 పడ్తొ, అన్నె కో నెంతె, యేసుచ సిస్సుల్ జోతె జా కెర, “ఆమ్ కిచ్చొక జా బూతుమ్‍క ఉదడుక నెతిర్లమ్?” మెన పుసిల,
20 చి యేసు జోవయింక, “తుమ్ తొక్కి నంపతిలి రిసొ, తుమ్‍క సొర్సుగిడ్డచి ఎదిలి నముకుమ్ తిలెగిన, ఈంజ మెట్టక జవుస్ దెక ‘ఇన్నె తెంతొ ముల దా, ఒత్తల్‍తొ గో’ మెలె బేగి గెచ్చెదె. తుమ్ కిచ్చొ నంపజలెకి, జయ్యి జెయిమ్ జయెదె, మెన తుమ్‍క ఆఁవ్ కచితుమ్ సంగితసి
21 గని ఎక్కి చువ్వె తా ప్రార్దన కెర్లెకయ్ ఇసిచిక ఉదడుక జయెదె.”, మెన యేసు సంగిలన్.
22 పడ్తొ, జేఁవ్ గలిలయ ప్రాంతుమ్‍తె బెద బుల్తె తతికయ్. యేసు సిస్సుల్‍క దెక, “ఆఁవ్ మాన్సు జా జెర్మున్ అయ్‍లొసొక మాన్సుల్‍చి అత్తి విరోదుమ్ సుదల్ దెర దెవుల,
23 చి అంక జేఁవ్ మారుల. మార్లె కి, తిర్రత్‍క అన్నె జీవ్ జా ఉట్టిందె” మెన, యేసు అన్నె సంగిలి రిసొ, సిస్సుల్ ఒగ్గర్ దుకుమ్ జల.
దెంక తిలి పన్నుచి రిసొ యేసు సంగిలిసి
(మార్కు 9:30-32; లూకా 9:43-45)
24 యేసు కపెర్నహూమ్ పట్నుమ్‍తె పాఁవిలి పొది, దేముడుచి గుడితె దెతి చెత్తర్ వెండ్లుచి పన్ను నఙితస పేతురుతె జా కెర, “తుమ్‍క బోదన కెర్తొసొ ఈంజ చెత్తర్ వెండ్లుచి పన్ను దెయెదె గే నాయ్?” మెన పుసిల, చి “దెయెదె” మెలన్.
25 జో పేతురు గెరి జా కెర, నే లట్టబ్తె అగ్గె, యేసు జా సంగతి జాన్లి రిసొ, “ఓ సీమోను, తుయి కిచ్చొ ఉచర్తసి? ఈంజ లోకుమ్‍చ రానలు కచితె పన్ను నఙుల? సొంత పుత్తర్సుల్‍తె గే, వేర మాన్సుల్‍తె గె?” మెన పుసిలన్,
26 చి పేతురు “వేర మాన్సుల్‍తె” మెంతికయ్, యేసు, “దస్సి జలె, పుత్తర్సుల్‍తె సంగుక నాయ్.
27 గని, దేముడుచి గుడిక ఈంజ పన్ను నఙితసక అన్మానుమ్ నే కెర్తి రిసొ, తుయి సముద్రుమ్‍తె గెచ్చ, గాలుమ్ గలు. తొలితొ దెర్ను సేడ్తొ మొస్సొక దెర, జో మొస్సొచి చోండి చిర దెకిలె, ఒత్త ఏక్ అట్టు వెండ్లుచి విలువచి కాసు డీసెదె. జా దెర జా కెర, తుచి రిసొ కి అంచి రిసొ కి జోవయింక దేసు” మెన, యేసు పేతురుక సంగిలన్.