1 నమకం ఇహిఙ, మాటు ఆస ఆనిక తప్‌ఎండ జర్గినాద్‌ ఇజి పూర్తి నమ్మిజినిక. కణకదాన్‌ సుడ్ఃఇకెఙ్‌ నిజం మన్నె ఇజి పూర్తి నమ్మిజినిక. 2 దేవుణు ముస్కు నమకం ఇడ్తి లోకుర్‌ పూర్‌బమ్మ్‌దు మహార్‌. అందెఙె దేవుణు బాణిఙ్‌ అనుపె ఆతార్. 3 దేవుణు మాటదానె యా బూలోకం తయార్‌ ఆత మనాద్‌ ఇజి నమకమ్‌దానె మాటు నెసినాట్. ఎందనిఙ్‌ఇహిఙ, మాటు ఏలు సూణికెఙ్, సుడ్ఃఇ వన్కా బాణిఙ్‌ తయార్‌ కితికెఙె. 4 నమకమ్‌దానె, కయిను సితి దని ముస్కు ఏబలు దేవుణుదిఙ్‌ నెగ్గి పూజ సితాన్. వన్ని నమకమ్‌దానె, నీతి నిజాయితి మనికాన్‌ ఇజి దేవుణు బాణిఙ్‌ మెపు దొహ్‌క్తాద్. ఎందనిఙ్‌ ఇహిఙ, వాండ్రు సితి సందదు దేవుణు సర్‌ద ఆతాన్. వాండ్రు సేనదినమ్‌కాఙ్‌ ముఙాలె సాత సొహాన్‌. అహిఙ్‌బా, వన్ని నమ్మకమ్‌దాన్‌ ఏలు బా మఙి వర్గిజినాన్. 5 నమకమ్‌దానె, హనోకు సాఎండ దేవుణు మంజిన బాడ్డిఃదు దేవుణు ఒత మనాన్. ఎయెర్‌బా వన్నిఙ్‌ సుడ్ఃదెఙ్‌ అట్‌ఎతార్. ఎందనిఙ్‌ ఇహిఙ, దేవుణునె వన్నిఙ్‌ ఒత మహాన్‌. వన్నిఙ్‌ ఒఇ ముఙాలె, దేవుణుదిఙ్‌ సర్‌ద కితికాన్‌ ఇజి అనుపె ఆతాన్. 6 నమకం సిల్లెండ, దేవుణుదిఙ్‌ సర్‌ద కిబిస్తెఙ్‌ అట్‌ఎట్. ఎందనిఙ్‌ఇహిఙ, వన్ని డగ్రు వానికాన్‌ ఎయెన్‌బా దేవుణు మనాన్‌ ఇజి నమ్మిదెఙ్‌వలె. వన్నిఙ్‌ నిజం రెబాని వరిఙ్‌ వాండ్రు నెగ్గికెఙ్‌ కినాన్‌ ఇజి నమ్మిదెఙ్‌వలె. 7 నమకందానె, నొవ వవి ఇండ్రొణి వరిఙ్‌ పెరి గడదాన్‌ రక్సిస్తెఙ్‌ ఉండ్రి ఓడః తయార్‌ కిత్తాన్‌. జర్గిదెఙ్‌ మని సఙతిఙ వందెఙ్‌ దేవుణు డటం వెహ్తివలె వాండ్రు లొఙితాన్. వన్ని నమకమ్‌దానె, లోకమ్‌దు మహి, మహి లోకురిఙ్‌ దేవుణు ముస్కు నమకం సిల్లెద్‌ ఇజి వాండ్రు తోరిస్తాన్. అందెఙె వారు తపు కిత్తార్‌‌ ఇజి దేవుణు తీర్పు కితాండ్రె, నోవెఙ్‌ నీతి నిజాయితి మనికాన్‌ఇ జి ఇట్తాన్. నోవ నమకమ్‌దానె నీతి నిజాయితి మనికాన్‌ ఇజి ఇట్తాన్. 8 నమకమ్‌దానె, అబ్రాహము, ‘నీను నీ ఇల్లు డిఃసి, నీది ఇజి వెనుక దొహ్‌క్ని బాడిఃదు సొన్‌అ’, ఇజి దేవుణు వెహ్తివలె, లొఙితాండ్రె సొహాన్‌. ఎంబె సొన్‌సినాన్‌ ఇజి తెలిఎండ వాండ్రు సొహాన్‌. 9 నమకమ్‌దానె, పయువాండ్రు లెకెండ్‌ దేవుణు సీన ఇజి ఒట్టు కితి దేసమ్‌దు బత్కితాన్. వాండ్రు గుడారమ్‌దు బత్కితాన్. అయాలెకెండె, ఇసాకు ని యాకోబు బా. వరిఙ్‌బా వెనుక అయా ఒట్టునె దేవుణు సితాన్. 10 అబ్రాహము పయువాండ్రు లెకెండ్‌ అబె బత్కితాన్. ఎందనిఙ్‌ ఇహిఙ, వాండ్రు ఎలాకాలం నిల్సిని నిజమాతి పునాది మని పట్నం వందిఙ్‌ ఎద్రు సుడ్ఃజి మహాన్‌. అయా పట్నం రూపు సీజి తొహ్నికాన్‌ దేవుణు. 11 నమకమ్‌దానె, అబ్రాహము నండొ డొక్ర ఆతిఙ్‌బా, సార గొడ్డు బోదెలి ఆతిఙ్‌బా అప్పొసి ఆతాన్. ఎందనిఙ్‌ ఇహిఙ, సీన ఇజి ఒట్టు కితికాన్‌ నమ్మిదెఙ్‌ తగ్నికాన్‌ ఇజి ఒడిఃబితార్. 12 అందెఙె, సాతిలెకెండ్‌ మని యా ఒరెన్‌ వన్ని బాణిఙ్, నండొ నండొ లోకుర్‌ ఆతార్. ఆగాసమ్‌దు మని సుకెఙ లెకెండ్, సమ్‌దరమ్‌ది ఒడ్డుదు మని లెక కిదెఙ్‌ అట్‌ఇ ఇస్క లెకెండ్, లోకుర్‌ ఆతార్. 13 యా లోకుర్‌ విజెరె, సానిదాక వారు నమకమ్‌దానె బత్కిజి మహార్‌. దేవుణు సీన ఇజి ఒట్టు కితికెఙ్‌ దొహ్‌కుతె. వారు నండొ ముఙాలె వన్కా వందిఙ్‌ ఆసదాన్‌ ఎద్రు సుడ్ఃజి వన్కాఙ్‌ సర్‌ద ఆతార్. యా బూమిదు వారు పయువారు ఇజి ఒప్పుకొటార్. 14 యా లెకెండ్‌ వెహ్ని లోకుర్, వరిఙ్‌ సొంత ఉండ్రి దేసెం వందిఙ్‌ ఎద్రు సుడ్ఃజినార్‌ ఇజి టెటాఙ్‌ తోరిసినాద్. 15 వారు డిఃసి వాతి దేసెం వందిఙ్‌ ఎత్తు కిఎర్. ఎత్తు కిత్తార్‌‌ ఇహిఙ, మర్‌జి సొండ్రెఙ్‌ అవ్‌సరం మహాద్‌మరి. 16 గాని వారు, ఇంక నెగ్గి ఉండ్రి దేసం వందిఙ్‌ కోరితార్. ఇహిఙ పరలోకమ్‌ది దేసం వందిఙ్‌ కోరితార్. అందెఙె, దేవుణు, వరి దేవుణు ఇజి వెహె ఆదెఙ్‌ సిగు ఆఎన్. ఎందనిఙ్‌ ఇహిఙ, వాండ్రు వరి వందిఙ్‌ పరలోకమ్‌దు ఉండ్రి పట్నం తయార్‌ కిత మనాన్. 17 నమకమ్‌దానె, దేవుణు అబ్రాహముఙ్‌ పరిస కితివలె, వన్ని మరిసి ఇస్సాకుఙ్, పూజ లెకెండ్‌ సితాన్. దేవుణు అబ్రాహముఙ్‌నె ఒట్టు సితాన్. గాని వన్ని ఒరెండ్రె ఒరెన్‌ మరిసిఙ్‌ పూజ లెకెండ్‌ సీదెఙ్‌ వాండ్రు తయార్‌ ఆతాన్. 18 దేవుణు అబ్రాహముఙ్‌ వెహ్తాన్‌, “ఇస్సాకు వెటనె నీ తెగ్గదికార్‌ పుట్నార్”,✡ ఇజి 19 సాతి వరిఙ్‌ మర్‌జి బత్కిస్తెఙ్‌ దేవుణు అట్నాన్‌ ఇజి అబ్రాహము ఒడ్ఃబితాన్. యాక సుడ్ఃతిఙ, అబ్రాహముఙ్‌ సావుదాన్‌ ఇస్సాకుఙ్‌ మర్‌జి దొహ్‌క్తి లెకెండె మనాద్. 20 నమకమ్‌దానె, ఇస్సాకు, యాకోబుఙ్‌ని యాసావుఙ్, వరిఙ్‌ వానికాలం వందిఙ్‌ దీవిస్తాన్. 21 నమకమ్‌దానె, యాకోబు వాండ్రు సాని ముఙాలె యోసేపు మరిసిర్‌ రిఎరిఙ్‌ దీవిస్తాన్. వన్ని డుడుదు ఒర్గితాండ్రె దేవుణుదిఙ్‌ పొగిడిఃజి మాడిఃస్తాన్. 22 నమకమ్‌దానె, యోసేపు సాదెఙ్‌ డగ్రు ఆతివలె ఇస్రాయేలు లోకురిఙ్‌ అయిగుప్తు దేసెమ్‌దాన్‌ దేవుణు నడిఃపిసి తనిదని వందిఙ్‌ వెహ్తాన్‌. వన్ని డుముక వందిఙ్‌ ఇనిక కిదెఙ్‌ ఇజి ఆడ్ర సితాన్. 23 నమకమ్‌దానె, మోసె అయిసి అప్పొసిర్, వాండ్రు పుట్సి మూండ్రి నెలెఙ్‌ డాప్సి ఇట్తార్. ఎందనిఙ్‌ ఇహిఙ, వాండ్రు నెగ్గి ఒరెన్‌ కొడొః ఇజి వారు నెస్తార్. రాజు సితి ఆడ్రదిఙ్‌ తప్తెఙ్‌ వారు తియెల్‌ ఆఎతార్. 24 నమకమ్‌దానె, మోసె, వాండ్రు పిరితి వలె పరొ గాల్సి మరిసి ఇజి కూకె ఆదెఙ్‌ కెఎతాన్. 25 వాండ్రు, పాపం తపిస్ని సణెం మంజిని సర్‌దదు మంజిని దని ముస్కు దేవుణు లోకుర్‌ వెట బాద ఆదెఙ్‌ కోరితాన్. 26 అయ్‌గుప్తు దేసెమ్‌ది ఆస్తి ముస్కు, క్రీస్తు వందిఙ్‌ బాదెఙ్‌ ఆనికాదె విలువ మనిక ఇజి వాండ్రు ఒడ్ఃబితాన్. ఎందనిఙ్‌ ఇహిఙ, వాని కాలమ్‌దు దేవుణు వన్నిఙ్‌ కిని నెగ్గి దని వందిఙ్‌ వాండ్రు ఎద్రు సుడ్ఃతాన్. 27 నమకమ్‌దానె, మోసె, రాజు కోపమ్‌దిఙ్‌ తియెల్‌ ఆఏండ, అయ్‌గుప్తు దేసెం డిఃస్తాన్. వాండ్రు మర్‌జి వాదెఙ్‌ కెఎతాన్. ఎందనిఙ్‌ ఇహిఙ, వాండ్రు తోర్‌ఇ దేవుణుదిఙ్‌ సుడ్ఃతి లెకెండె మనాద్.

28 నమకమ్‌దానె, మోసె, ఇస్రాయేలు లోకురిఙ్‌ పులాఙ్‌ ఆఇ రొటెఙ్‌ తయార్‌ కిని పండొయి కిదెఙ్‌ ఇజి ఆడ్ర సితాన్. వరి తొలిత పుట్తి కొడొఃరిఙ్, సప్ని దూత సప్‌ఎండ మండ్రెఙ్, వరి దార్‌బందరమ్‌దు నల సిల్‌కరిస్తెఙ్‌ ఇజి ఆడ్ర సితాన్. 29 నమకమ్‌దానె, ఇస్రాయేలు లోకుర్‌ ఎర్రఙ్‌ సమ్‌దరమ్‌దాన్‌ వహ్తి బూమిదు నడిఃని లెకెండ్‌ నడిఃసి సొహార్‌. అయ్‌గుప్తు దేసెమ్‌దికార్‌ అయాలెకెండ్‌ కిదెఙ్‌ సుడ్ఃతి వలె వారు ముడుఃగితార్. 30 నమకమ్‌దానె, ఇస్రాయేలు లోకుర్‌ ఏడు రోస్కు యెరికొ పట్నం సుటులం బూలాతివలె, పట్నమ్‌ది గోడెఃఙ్‌ అర్తె. 31 నమకమ్‌దానె, సాని బూలాని రాహబు, దేవుణుదిఙ్‌ లొఙిఇ దని పట్నమ్‌ది వరివెట సాఎతాద్. ఎందనిఙ్‌ ఇహిఙ, దేసెమ్‌దిఙ్‌ గుటు లాగ్‌దెఙ్‌ వాతి వరిఙ్‌ అది డగ్రు కితాద్. 32 నాను మరిబా వెహ్తెఙా? గిదియొను, బరాకు, సంసొను, యెప్త, దావీదు, సముయెలు, ప్రవక్తరు నిని వరి వందిఙ్‌ వెహ్తెఙ్‌ నఙి సమయం సాల్‌ఎద్. 33 నమకమ్‌దానె, వారు దేసెమ్‌కాఙ్‌ ముస్కు విద్దెం కిజి గెలస్తార్. వారు నీతి నిజాయితికెఙ్‌ కితారె, దేవుణు ఒట్టు కితికెఙ్‌ దొహ్‌క్తె. వారు నొరెస్కు వెయ్కు మూక్తార్. 34 నండొ కస్ని సిసుదిఙ్‌ నప్తార్. కూర్దెఙాణిఙ్‌ సాఎండ తప్రె ఆతార్. వారు సత్తుసిలికార్‌ గాని సత్తు మనికార్‌ ఆతార్. వారు విదెమ్‌దు సత్తు మనికార్‌ ఆతార్‌ పయి సయ్‌నమ్‌ది వరిఙ్‌ ఉలుప్తార్. 35 సెగొండెక్‌ బోదెకాఙ్, వరి సొంతది వరిఙ్‌ సావుదాన్‌ మర్‌జి దొహ్‌క్తె. మహికార్‌ నండొ బాదెఙ్‌ ఆతిఙ్‌బా, వారు దేవుణు ముస్కు మని నమకం డిఃసి, డిఃబె ఆని దని ముస్కు సానిక నెగెద్‌ ఇజి సుడ్ఃతార్. ఎందనిఙ్‌ ఇహిఙ, వారు మర్‌జి నిఙ్‌ని వలె నెగ్గి బత్కు దొహ్‌క్తెఙ్. 36 సెగొండార్‌ దూసె ఆతార్. కొరడెఃఙాణిఙ్‌ డెయ్‌ఎ ఆతార్. మరి సెగొండార్‌ తొహె ఆతారె, జెలిదు ఇడ్డెః ఆతార్. 37 వారు పణకాణిఙ్‌ డెయ్‌ఎ ఆతార్. రంపమ్‌కాణిఙ్‌ రుండి ముకెఙ్‌ కొయె ఆతార్. కుర్దెఙాణిఙ్‌ సపె ఆతార్. సెగొండార్‌ మెండ గొర్రెదినొ, ఏలెటు గొర్రెదినొ తోలు పొర్‌పె ఆజి, బఙ ఆజి, బాదెఙ్‌ ఆజి, దూసె ఆజి బూలాతార్. 38 యా నెగ్గి లోకుర్‌ మండ్రెఙ్, యా లోకం తగ్‌ఎద్. వారు బీడిఃమ్‌ బూమిఙ, గొరొకాఙ్‌ బూలాతార్. సాలమ్‌క లొఇ, బూమిదు మని బొరోఙ డాఃఙితార్. 39 వారు నమకం ఇట్తార్. అందెఙె, నెగ్గికార్‌ ఇజి దేవుణు బాణిఙ్‌ మెపు దొహ్‌క్తాద్. గాని వరి లొఇ ఎయెరిఙ్‌బా, దేవుణు సీన ఇజి ఒట్టు కితికెఙ్‌ దొహ్‌కుతె. 40 ఎందనిఙ్‌ ఇహిఙ, దేవుణు మా వందిఙ్‌ ఇంక నెగ్గిక ఏర్‌పాటు కిత మనాన్. మా వెటనె, వరిఙ్‌ పూర్తి కిదెఙ్‌ ఇజి వన్ని ఉదెసం.