2
యేసు రక్సిస్నాన్ ఇని నిజమాతి పెరి సఙతి నెక్సిపొక్ఏండ జాగర్త వెండ్రెఙ్.
1 అందెఙె మాటు వెహిమని నిజమాతి సఙతిఙ్, మరి నండొ జాగర్తదాన్ వెండ్రెఙ్ వలె. ఎందనిఙ్ ఇహిఙ, దని బాణిఙ్ దూరం ఆఏండ మంజిని వందిఙె.
2 దేవుణు దూతారిఙ్ వాండ్రు వెహ్పిస్తి మాటెఙ్, నిజం ఇజి రుజుప్ ఆత మనాద్. అయా మాటెఙ్ తప్నికాన్, లొఙిఇకాన్ ఎయెన్ ఆతిఙ్బా, తగితి సిక్స వన్నిఙ్ దొహ్క్త మనాద్.
3 అహిఙ, దేవుణు లోకురిఙ్ సిక్సదాన్ ఎలాగ గెల్పిస్తెఙ్ ఇజి వెహ్సిని ముకెలమాతి బోద మాటు నమ్మిదెఙ్ కెఇతిఙ, అయా సిక్సదాన్ ఎలాగ తప్రె ఆదెఙ్ అట్నాట్? గెల్పిస్ని వందిఙ్ మని యా బోద ప్రబునె తొలిత వెహ్తాన్. వాండ్రు వెహ్తికెఙ్ వెహికార్, అయాక నిజం ఇజి మఙి రుజుప్ కిత్తార్.
4 మరి, దేవుణుబా విజు రకమ్కాణి సత్తుమని పణిఙ్, గొప్ప బమ్మాని పణిఙ్ కిజి రక్సణ వందిఙ్ వెహ్తిక నిజం ఇజి రుజుప్ కిత్తాన్. వన్నిఙ్ ఇస్టం ఆతివజ, దేవుణు ఆత్మెఙ్ సీబాజి సీజి దేవుణు రుజుప్ కిత్తాన్.
యేసుప్రబునె లోకురిఙ్ రక్సిస్నికాన్.
5 వాజిని కాలమ్ది లోకం ఏలుబడిః కిదెఙ్ దేవుణు, దూతారిఙ్ ఒపజెప్ఎతాన్. పరలోకం వందిఙె మాటు వర్గిజినాట్.
6 గాని దేవుణు మాటదు ఎంబెనొ ఎయెండ్రొ డటిసి ఈహు వెహ్సినాన్, “ఓ దేవుణు, నీను ఎత్తు కిదెఙ్ లోకు ఏపటిదికాన్? నీను బాగ సుడ్ఃదెఙ్ లోకు ఏపటిదికాన్?
7 నీను దూతారిఙ్ ఇంక వన్నిఙ్ సణెం ఇజ్రికాన్ కితి. నీను వన్నిఙ్ పెరికాన్ కితి. గవ్రవమ్దిఙ్ తగ్నికాన్ లెకెండ్ కితి.
8 విజు వన్కాఙ్ ముస్కు వన్నిఙ్ అతికారం సితి’. లోకురిఙ్ విజు వన్కాఙ్ ముస్కు దేవుణు అతికారం సితి”, ఇజి వెహ్సినాన్. ఇహిఙ, విజు వన్కాఙ్ ముస్కు అతికారం వన్నిఙ్ మనాద్. గాని ఏలు, లోకుర్ విజు వన్కాఙ్ ముస్కు అతికారం కిజినిక తొఎట్.
9 గాని ఏలు, యేసుఙ్ గొప్ప గనమ్దాన్, గొప్ప గవ్రవమ్దాన్ దేవుణు పెరికాన్ కితిక మాటు సుడ్ఃజినాట్. ఎందనిఙ్ ఇహిఙ, వాండ్రు నండొ బాదెఙ్ ఓరిసి సాతాన్. వన్నిఙ్ దూతారిఙ్ ఇంక సణెం దేవుణు ఇజ్రికాన్ కిత్తాన్. ఎందనిఙ్ ఇహిఙ, వాండ్రు యా లెకెండ్ లోకుర్ విజెరె వందిఙ్ సాదెఙ్. యా లెకెండ్, దేవుణు దయా దర్మం కిత్తాన్.
10 విజు, దేవుణు తయార్ కిత్తాన్. విజు వన్నివందిఙె తయార్ కిత్తాన్. యేసుప్రబు బాదెఙ్ ఓరిసి సాజిని దనితాన్ దేవుణు వన్నిఙ్ పూర్తి కిజినాన్. వాండ్రు పూర్తి ఆతికాన్ ఆతాన్. అయ లెకెండ్ యేసుఙ్ పూర్తి కిజినిక తగ్నికాదె. ఎందనిఙ్ ఇహిఙ, నండొ కొడొఃరిఙ్ వాండ్రు ఎలాకాలం దేవుణు వెట బత్కిని బత్కుదు నడిఃపిస్తెఙ్. యేసునె వరిఙ్ రక్సణదు నడిఃపిస్నికాన్.
11 వాండ్రె లోకురిఙ్ దేవుణు వందిఙ్ కేట ఆతి వరి లెకెండ్ కిజినాన్. వన్నిఙ్ని వాండ్రు దేవుణు వందిఙ్ కేట కిత్తి లోకురిఙ్, బుబ్బ ఒరెండ్రె. అందెఙె వరిఙ్ తంబెరెఙు ఇజి కూక్తెఙ్ యేసు సిగు ఆఏన్.
12 వాండ్రు దేవుణుదిఙ్ వెహ్సినాన్, “నీ వందిఙ్ నాను నా తంబెరిఙ వెహ్న, నీ లోకుర్ కూడ్ఃనిబాన్, నాను నిఙి పొగిడిఃన” ఇజి.
13 మరి వాండ్రు వెహ్సినాన్, “నాను వన్ని ముస్కు నా నమకం ఇడ్న” ఇజి. మరి బా వెహ్సినాన్, “ఇదిలో, నానుని దేవుణు నఙి సితి కొడొఃర్”, ఇజి.
14 దేవుణు కొడొఃర్ నలని, కండదాన్ తయార్ ఆతి లోకుర్నె. అందెఙె యేసుప్రబుబా నలని, కండదాన్ తయార్ ఆతి లోకు వజ ఆతాన్. ఎందనిఙ్ లోకు ఆతాన్ ఇహిఙ, ఒరెన్ లోకు వజనె సాదెఙ్ అట్నాన్. వాండ్రు సాజినె, సావు ముస్కు అతికారం మని సయ్తానుఙ్ సిల్లెండ కిదెఙ్ అట్నాన్.
15 అయా లెకెండ్, సావుదిఙ్ తియెల్ ఆజి, వరి బత్కు విజు సావు తియెల్దిఙ్ అడిఃగి మని విజెరిఙ్ డిఃస్పిస్తెఙ్ అట్నాన్.
16 నిజమె, వాండ్రు దూతారిఙ్ సాయం కిఎన్. గాని అబ్రాహము తెగ్గాది వరిఙ్ సాయం కిజినాన్.
17 దిన్ని వందిఙ్, వాండ్రు ఎల్లగాతిఙ్బా వన్ని తంబెరిఙ లెకెండ్ ఆదెఙ్వలె. ఎందనిఙ్ ఇహిఙ, వాండ్రు నండొ కనికారం మని, నమ్మిదెఙ్ తగ్ని పెరి పుజెరి ఇజి, దేవుణుదిఙ్ సేవ కిదెఙ్ మరి, లోకురి పాపమ్క వందిఙ్ పూజ కిదెఙ్.
18 వాండ్రె పరిసెఙ్ కిబె ఆజి, బాదెఙ్ ఆతాన్. అందెఙె పరిసెఙ్ కిబె ఆని వరిఙ్ సాయం కిదెఙ్ అట్నాన్.