16
తెలివి మన్ని పెరిగొత్తియవన్ని కత
1 మరి, యేసు వన్ని సిసూర్‌ఙ ఈహు వెహ్తాన్‌. ఒరెన్‌ సంసారం మన్ని వన్ని ఇండ్రొణి సఙతిఙ సూణి పెరి గొతియయెన్‌ ఒరెన్‌ మహాన్‌. యా గొతియయెన్‌ సామనమ్‌కు పాడు కిజినాన్‌ ఇజి నేరం మొప్తిక వెహాన్.
2 అందెఙె వన్నిఙ్‌ కూక్‌పిస్తాండ్రె, “నీ వందిఙ్‌ నాను వెంజిని యా మాట ఇనిక? ఇండ్రొణి పణిఙ లెక్క తోరిస్‌అ. ఎందానిఙ్‌ ఇహిఙ, నీను ఏలుదాన్‌ నా గొతియయెన్‌ ఆఇ”, ఇజి వన్నిఙ్‌ వెహ్తాన్‌.
3 యాక వెహాండ్రె వాండ్రు ఈహు ఒడ్ఃబితాన్. “నా ఎజుమాని యా పణిదాన్‌ నఙి లాగ్‌జినాన్. అందెఙె నాను ఇనిక కిదెఙ్‌? కార్తెఙ్‌ అట్‌ఎ. లొసి ఉండెఙ్‌ సిగు వాజినాద్.
4 యా పణిదాన్‌ లాగ్నివెలె, లోకుర్‌ నఙి డగ్రు కినిలెకెండ్‌ ఇనిక కిదెఙ్‌ ఇజి నాను నెసిన.
5 అందెఙె వాండ్రు వన్ని ఎజుమాని బాన్‌ అప్పు ఒతివరిఙ్‌ ఒరెన్‌ ఒరెన్‌ వన్నిఙ్‌ కూక్‌పిస్తాన్. “నీను నా ఎజుమాని బాణిఙ్‌ ఎసొ ఒతిమన్ని?”, ఇజి మొదొహి వన్నిఙ్‌ వెన్‌బాతాన్.
6 వాండ్రు, “వంద కాయెఙ్‌ నూనె”, ఇజి వెహ్తాన్‌. అందెఙె వాండ్రు, “ఇదిలో నీ సీటి. బేగి బసి యాబయి కాయెఙ్‌ ఇజి రాస్‌అ”, ఇజి వెహ్తాన్‌.
7 వెన్కాహివన్నిఙ్, “నీను ఎసొ ఒతిమన్ని?”, ఇజి వెన్‌బాతాన్. వాండ్రు, “వంద తూముఙ్‌ గోదము”, ఇజి వెహ్తాన్‌. అయావలె వాండ్రు, “ఇదిలో నీ సీటి. ఎనబయి తూముఙ్‌ ఇజి రాస్‌అ”, ఇజి వెహ్తాన్‌.
8 అనెయం కిత్తి యా పెరి గొత్తియయెన్‌ తెలివందిఙ్‌ ఎజుమాని పొగిడిఃతాన్. ఎందానిఙ్‌ ఇహిఙ, వానికాలమ్‌ది వన్ని బత్కు వందిఙ్‌ వాండ్రు యా లెకెండ్ కితాన్. అందెఙె యేసు, వెహ్సినాన్, “దేవుణుదిఙ్‌ నమిజి వాండ్రు వెహ్తి వజ నడిఃనివరి ముస్కు, అయా పెరి గొతియయెన్‌ లెకెండ్, యా లోకమ్‌ది సఙతిఙ వందిఙె ఒడ్ఃబినికారె తెలిమనికార్. వారు వరిలెకెండ్‌ మన్ని వరివెట కూడ్ఃజి పాడిఃజి మండ్రెఙ్ తెలిమనికార్.
9 మీరు యా లోకమ్‌దు బత్కిజిని మనివలె ఇబ్బె మిఙి మనికెఙ్‌ విజు దని వెట మీరు నెగ్రెండ తెలిదాన్‌ మండ్రెఙ్ సుడ్ఃదు. ఎందనిఙ్‌ ఇహిఙ, మీరు మీ బత్కు ఇబ్బె డిఃస్నివలె దేవుణు మిఙి వాండ్రు మంజిని బాడిఃదు ఎలాకాలం మండ్రెఙ్ డగ్రు కినాన్‌లె.
10 తక్కు దన్నిముస్కు నమకం మంజినికాన్‌ లావు దన్నిముస్కుబా నమకమ్‌దాన్‌ మంజినాన్. తక్కు దన్నిముస్కు నమకం సిలికాన్, లావు దన్నిముస్కుబా నమకం మన్‌ఎన్.
11 అందెఙె, మిఙి మన్ని ఆస్తి నమకమ్‌దాన్‌ తొఎండ మహిఙ, నిజమాతి ఆస్తి ఎయెర్‌ మిఙి ఒపజెప్నార్.
12 పడఃకాతి వరి దన్నిముస్కు నమకమ్‌దాన్‌ తొఏండ మహిఙ, నీ సొంతదిక ఆతి నిజమాతి ఆస్తి ఎయెన్‌ మిఙి సీనాన్.
13 ఎమేణి గొతియయెన్‌బా రిఎర్‌ యజమానరిఙ వందిఙ్‌ఉండ్రె లెకెండ్‌పణి కిదెఙ్‌ అట్‌ఎన్. వాండ్రు ఒరెన్‌ వన్నిఙ్‌ ఇస్టం కిఎండ మరి ఒరెన్‌ వన్నిఙ్‌ ప్రేమిస్నాన్. సిలిఙ, ఒరెన్‌ వన్ని మాట వెంజి నమకమ్‌దాన్‌ మంజినాన్. మరి ఒరెన్‌ వన్నిఙ్‌ దుసలాడ్ఃనాన్. అయలెకెండ్‌నె దేవుణుదిఙ్‌ ని డబ్బుదిఙ్‌ ఉండ్రె లెకెండ్‌నె సేవకిదెఙ్‌ మీరు అట్‌ఇదెర్”, ఇజి వెహ్తాన్‌.
14 డబ్బు ఆస మన్ని పరిసయ్‌రు యా మాటెఙ్‌ విజు వెహరె, వన్నిఙ్‌ వెక్రిస్తార్.
15 వాండ్రు వరిఙ్‌ ఈహు వెహ్తాన్‌, “లోకుర్‌ ముఙాల మీరు నీతి నిజాయితి మనికిదెర్‌ ఇజి తోరిస్నిదెర్. గాని దేవుణు మీ మన్సుదికెఙ్‌ నెస్నాన్. లోకుర్‌ ఎద్రు గొప్ప విలువ మనిక దేవుణుదిఙ్‌ ఇస్టం సిల్లికాదె.
16 దేవుణు మోసెఙ్‌ సిత్తి రూలుఙ్‌ని ప్రవక్తరు రాస్తికెఙ్ బాప్తిసం సీని యోహాను కాలం దాక బోదిసి మహార్‌. అబెణిఙ్‌ అసి దేవుణు, వన్నిలోకురిఙ్‌ కిని ఏలుబడిః వందిఙ్‌ సువార్త వెహె ఆజి మహాద్‌. దేవుణు కిని ఏలుబడిఃదు మండ్రెఙ్‌లోకుర్‌నండొ కస్టబడిఃజినార్.
17 ఆగసం బూమి సిల్లెండ ఆదెఙ్‌సులునె, గాని దేవుణు సితి రూలుఙది ఉండ్రి గీతబా తప్సి సొన్‌ఏద్.
18 ఎయెన్‌బా వన్ని ఆల్సిఙ్‌ డిఃసి మరి ఉండ్రి బోదెల్‌దిఙ్‌ ఇడ్డెః ఆతిఙ, దని వెట వాండ్రు రంకు బూలాజినాన్. మాసిఙ్‌ డిఃస్తి దనిఙ్‌ ఒరెన్‌ఇడెః ఆతిఙ, వాండ్రు రంకు బూలాజినాన్.
ఆస్తిమన్నికాన్‌ని లొసిఉణి లాజరు
19 ఒరెన్‌ ఆస్తిమన్నికాన్‌ మహాన్‌. వాండ్రు నండొ కరీది సొక్కెఙ్‌ తొడ్ఃగిజి విజు దినమ్‌కు సుకం ముస్కు మహాన్‌.
20 లాజరు ఇని లొసిఉణికాన్‌ ఒరెన్‌ మహాన్‌. వన్ని ఒడొఃల్‌కండి విజు పుట్కు మహె. ఆస్తిమన్ని వన్ని ఇండ్రొణి డేవాద్‌ వన్నిఙ్‌ ఇట్తా మహార్‌.
21 వన్ని బల్లదాన్‌ అర్తి జావ పరెఙ్‌ ఉణిజి బఙ సొన్‌పిస్తెఙ్‌ ఆసఆజి మహాన్‌. నుకుడిఃఙ్‌బా వాజి వన్ని పుట్కు నాక్సి మహె.
22 లొస్ని ఉణికాన్‌ సాతాన్. దేవుణు దూతెఙ్‌ వన్నిఙ్‌ దేవుణు మంజిని బాడిఃదు అబ్రాహం పడఃకాదు ఒతాన్. ఆస్తిమన్నికాన్‌బా సాతాన్. వన్నిఙ్‌ ముస్తార్.
23 వాండ్రు అయా లోకమ్‌దు బాదఆజినె, బుర్ర పెర్జి ముస్కు బేస్తాన్. దూరం మన్ని అబ్రాహముఙ్‌ని వన్నిపడఃకాద్‌ మన్ని లాజరుఙ్‌ సుడ్ఃతాన్.
24 అందెఙె వాండ్రు, “బుబ్బ ఆతి అబ్రాహము, నా ముస్కు కనికారం తోరిస్‌అ. నాను యా సిసుదు నండొ బాద ఆజిన. అందెఙె లాజరు వాజి వన్ని డెఃస్క ఏరుదు ముడుక్సి నా నాలిక సలెఙ్‌ కిదెఙ్‌ వన్నిఙ్‌ పోక్‌అ”, ఇజి డేల్సి వెహ్తాన్‌.
25 అందెఙె అబ్రాహము, “మరిన్‌ నీను బత్కితి కాలమ్‌దు సుకం ముస్కు మహి. గాని లాజరు కస్టమ్‌దు మహాన్‌. ఏలు వాండ్రు ఇబ్బె సుకం దాన్‌ మనాన్. నీను కస్టమ్‌దు మన్ని.
26 యాకదె ఆఏండ, ఇబ్బెణికార్‌ అబ్బె వాదెఙ్‌ అట్‌ఏండ, అబెణికార్‌ ఇబ్బె వాదెఙ్‌ అట్‌ఏండ మఙి నిఙి నడిఃమి పెరిజోరె ఇట్తా మనాద్”, ఇజి వెహ్తాన్‌.
27-28 అయావలె వాండ్రు, “అహిఙ, ఓ బా, నఙి అయ్‌దుగురు దాదార్‌ మనార్. వారు బా యా కస్టమ్‌కు మన్నిబాడిఃదు రఏండ మండ్రెఙ్ నా బుబ్బ ఇండ్రొ లాజరుఙ్‌ పోక్‌అ. వాండ్రు సొన్సి వరిఙ్‌ వెహ్నన్, ఇజి నాను నిఙి బతిమాల్‌జిన”, ఇహాన్‌.
29 అందెఙె అబ్రాహము, “వరి డగ్రు మోసె రాస్తికెఙ్, ప్రవక్తరు రాస్తికెఙ్ మనె. వారు అయాకెఙ్‌ వెంజి మండ్రెఙ్”, ఇజి వన్నిఙ్‌ వెహ్తాన్‌.
30 వాండ్రు, “బుబ్బాతి అబ్రాహము, ఆహె వారు కిఎర్. సాతికాన్‌ ఒరెన్‌ వరి డగ్రు సొన్సి వెహ్తిఙనె, వారు పాపమ్‌కు డిఃసి సీనార్”, ఇజి వెహ్తాన్‌.
31 అందెఙె వాండ్రు, “మోసె రాస్తి మనికెఙ్‌ ప్రవక్తరు రాస్తికెఙ్ వారు వెన్‌ఎండ మహిఙ, సాతికాన్‌ మర్‌జి నిఙ్‌జి సొన్సి వెహ్తిఙ్‌బా వారు నమ్మిఏర్”, ఇజి వెహ్తాన్‌.